ಪ್ರತಿಷ್ಠಿತ ಸರ್ಕಾರಿ ಶಾಲೆಗಳಲ್ಲಿ ಪ್ರವೇಶ ಕುಸಿತ

106 ವಸಂತಗಳನ್ನು ಪೂರೈಸಿದ ಸರ್ಕಾರಿ ಮಾದರಿ ಹಿ.ಪ್ರಾ.ಬಾಲಕಿಯರ ಶಾಲೆಯಲ್ಲಿ ವರ್ಷದಿಂದ ವರ್ಷಕ್ಕೆ ದಾಖಲಾತಿ ಕುಸಿತಗೊಳ್ಳುತ್ತಿದೆ. ಸದ್ಯ ಒಂದರಿಂದ 7ನೇ ತರಗತಿ ತನಕ 32ಮಕ್ಕಳಿದ್ದಾರೆ. ಒಂದನೇ ತರಗತಿಯಲ್ಲಿ ಒಬ್ಬ, ಎರಡನೇ ತರಗತಿಯಲ್ಲಿ ಇಬ್ಬರು, ಮೂರನೇ ತರಗತಿಯಲ್ಲಿ ಮೂರು, ನಾಲ್ಕನೇ ತರಗತಿಯಲ್ಲಿ ಮೂರು, ಐದನೇ ತರಗತಿಯಲ್ಲಿ ಏಳು, ಆರನೇ ತರಗತಿಯಲ್ಲಿ ಹನ್ನೆರೆಡು, ಏಳನೇ ತರಗತಿಯಲ್ಲಿ ನಾಲ್ಕು ಮಕ್ಕಳಿದ್ದಾರೆ. ಕಳೆದ ವರ್ಷ 40ಮಕ್ಕಳಿದ್ದು ಈಗ 32ಕ್ಕೆ ಕುಸಿತಗೊಂಡಿದೆ. ಈ ಶಾಲೆ ವ್ಯಾಪ್ತಿಯ ಅಂಗನವಾಡಿ ಮಕ್ಕಳು ಬೇರೆಡೆ ತೆರಳಿರುವುದು, ಇಲ್ಲಿನ ಸೋಮಪ್ಪಕೆರೆ ದಡದ ನಿವಾಸಿಗಳನ್ನು ಬೇರೆಡೆ ಸ್ಥಳಾಂತರಿಸಿದ್ದರಿಂದ ದಾಖಲಾತಿ ಕುಸಿತಕ್ಕೆ ಪ್ರಮುಖ ಕಾರಣ ಎಂದು ಮುಖ್ಯಶಿಕ್ಷಕಿ ವೀರಮ್ಮ ತಿಳಿಸಿದರು.

1959ರಲ್ಲಿ ಆರಂಭಗೊಂಡಿದ್ದ ಬಸವೇಶ್ವರ ಎಲಿಮೆಂಟರಿ ಶಾಲೆ 1999ರಲ್ಲಿ ಇಂದಿರಾನಗರಕ್ಕೆ ಸ್ಥಳಾಂತರಗೊಂಡ ನಂತರ ಸಕಿಪ್ರಾ ಶಾಲೆಯಲ್ಲಿ ದಾಖಲಾತಿ ಕುಸಿಯುತ್ತ ಸಾಗಿದೆ. ಸದ್ಯ 1ರಿಂದ 5ರತನಕ 18ಮಕ್ಕಳಿದ್ದಾರೆ. ಏಕೋಪಾಧ್ಯಾಯ ಶಾಲೆಯಾಗಿದೆ. ಇದ್ದ ಒಬ್ಬ ಶಿಕ್ಷಕನನ್ನು ಗೋಪಾಲಪುರದ ಸಹಿಪ್ರಾ ಶಾಲೆಗೆ ನಿಯೋಜನೆಗೊಳಿಸಿದೆ. ಒಂದನೇ ತರಗತಿಯಲ್ಲಿ ಒಬ್ಬ, ಎರಡನೇ ತರಗತಿಯಲ್ಲಿ ಮೂವರು, ಮೂರನೇ ತರಗತಿಯಲ್ಲಿ ಮೂರು, ನಾಲ್ಕನೇ ತರಗತಿಯಲ್ಲಿ ಮೂರು, ಐದನೇತರಗತಿಯಲ್ಲಿ ಎಂಟು ಮಕ್ಕಳಿದ್ದಾರೆ.

ಬಿಸಿಯೂಟ ತಯಾರಿ, ಕಾಯಿಪಲ್ಯೆ ತರುವುದು, ಮಕ್ಕಳನ್ನು ಮನೆಗಳಿಗೆ ತೆರಳಿ ಕರೆತರುವುದು, ಸಭೆಗೆ ಹಾಜರಾಗುವುದು ಏಕೋಪಾಧ್ಯಾಯರಿಗೆ ಸವಾಲಾಗಿ ಪರಿಣಮಿಸಿದೆ. ಒಬ್ಬ ಅತಿಥಿ ಶಿಕ್ಷಕರನ್ನು ನೀಡಬೇಕಿದೆ. ಈ ಶಾಲೆಗೆ ಹಕ್ಕಿಪಿಕ್ಕಿ ಸಮುದಾಯದ ಮಕ್ಕಳು ದಾಖಲಾಗಿದ್ದು ಶಾಲೆಗೆ ಬರುತ್ತಿಲ್ಲ. ನಿತ್ಯ ಮನೆಮನೆಗೆ ಕರೆಯಲು ಹೋದರು ಆರೆಂಟು ಮಕ್ಕಳು ಮಾತ್ರ ಶಾಲೆಗೆ ಬರುತ್ತಾರೆ. ರಜೆಗೆ ವಲಸೆ ಹೋದ ಮಕ್ಕಳು ಇನ್ನು ಮನೆಗೆ ಬಂದಿಲ್ಲ. ಪೋಷಕರು ಮಕ್ಕಳನ್ನು ಶಾಲೆಗೆ ಕಳುಹಿಸಲು ಉತ್ಸುಕತೆ ತೋರುತ್ತಿಲ್ಲ. ಎಸ್‌ಡಿಎಂಸಿ ಅವಧಿ ಮುಗಿದಿದ್ದು ನೂತನ ಎಸ್‌ಡಿಎಂಸಿ ರಚನೆ ಮಾಡಬೇಕಿದೆ ಎಂದು ಮುಖ್ಯಶಿಕ್ಷಕ ವಸಂತ ತಿಳಿಸಿದರು.

1956ರಲ್ಲಿ ಸ್ಥಾಪನೆಗೊಂಡಿದ್ದ ಮುಕ್ಕಣ್ಣ ಶಾಲೆಯೆಂದು ಪ್ರಸಿದ್ಧಿಗೊಂಡ 8ನೇವಾರ್ಡ್ ಸಹಿಪ್ರಾ ಶಾಲೆಯಲ್ಲಿಯೂ ಮಕ್ಕಳ ದಾಖಲಾತಿ ಕುಸಿಯುತ್ತಿದೆ. ಸದ್ಯ ಒಂದನೇ ತರಗತಿಗೆ ಮಕ್ಕಳು ದಾಖಲಾಗಿಲ್ಲ. ಎರಡನೇ ತರಗತಿಯಲ್ಲಿ ಮೂವರು, ಮೂರನೇ ತರಗತಿಯಲ್ಲಿ ನಾಲ್ವರು, ನಾಲ್ಕನೇ ತರಗತಿಯಲ್ಲಿ ಐದು, ಐದನೇ ತರಗತಿಯಲ್ಲಿ ಆರು, ಆರನೇ ತರಗತಿಯಲ್ಲಿ ಐದು, ಏಳನೇ ತರಗತಿಯಲ್ಲಿ ಒಂಬತ್ತು ಮಕ್ಕಳು ಸೇರಿ 32ಮಕ್ಕಳು ದಾಖಲಾಗಿದ್ದಾರೆ. ಕಳೆದ ವರ್ಷ 36ಮಕ್ಕಳು ದಾಖಲಾಗಿದ್ದರು. ಪಾಲಕರ ಸಭೆ ನಡೆಸಿ, ಪ್ರಭಾತ್‌ಪೇರಿ ಮಾಡಿ, ಮನೆಮನೆಗೆ ಭೇಟಿ ನೀಡಿ, ದಾಖಲಾತಿ ಆಂದೋಲನ ಮಾಡಿದರೂ ಮಕ್ಕಳ ದಾಖಲಾತಿಯಾಗಿಲ್ಲ. ಸದ್ಯ 5ವರ್ಷ5ತಿಂಗಳಿಂದ 5ವರ್ಷ 10ತಿಂಗಳೊಳಗಿನ 3ಮಕ್ಕಳಿದ್ದು ದಾಖಲಾತಿ ಸಮಸ್ಯೆಯಾಗಿದೆ. ಈ ಶಾಲೆಯ ವ್ಯಾಪ್ತಿಯ ಅಂಗನವಾಡಿ ಮಕ್ಕಳಿಲ್ಲ ಎಂದು ಮುಖ್ಯ ಶಿಕ್ಷಕ ಖಲೀಲ್ ಅಲವತ್ತುಕೊಂಡರು.

ಏಕೋಪಾಧ್ಯಾಯ ಶಾಲೆ: ತಾಲೂಕಿನ ಮೆಟ್ರಿ ಕ್ಲಸ್ಟರ್‌ನಲ್ಲಿ ಒಂದು, ಸುಗ್ಗೇನಹಳ್ಳಿಯಲ್ಲಿ ಒಂದು, ಎಸ್.ಎನ್.ಪೇಟೆ ಕ್ಲಸ್ಟರ್‌ನಲ್ಲಿ ಒಂದು, ದೇವಸಮುದ್ರ ಕ್ಲಸ್ಟರ್‌ನಲ್ಲಿ ಒಂದು ಸೇರಿ ಒಟ್ಟಾರೆ 4ಏಕೋಪಾಧ್ಯಾಯ ಶಾಲೆಗಳಿದ್ದು, ಕಂಪ್ಲಿಯ 3ನೇವಾರ್ಡ್ ಶಾಲೆ ಹೊರತುಪಡಿಸಿ ಉಳಿದ ಶಾಲೆಗಳಲ್ಲಿ ಅತಿಥಿ ಶಿಕ್ಷಕರನ್ನು ನೇಮಿಸಿದೆ. ತಾಲೂಕಿನ ನಾಲ್ಕು ಶಾಲೆಗಳಲ್ಲಿ ಮುಖ್ಯಶಿಕ್ಷಕ ಸೇರಿ ಯಾವುದೇ ಶಿಕ್ಷಕರಿಲ್ಲದಿದ್ದರಿಂದ ಬೇರೆ ಶಾಲೆಗೆ ಶಿಕ್ಷಕರನ್ನು ನೇಮಿಸಿದೆ.