ಅನೈತಿಕ ಚಟುವಟಿಕೆಗಳ ತಾಣ ವಸತಿ ನಿಲಯ

1970ರಲ್ಲಿ ನಿರ್ಮಾಣವಾಗಿರುವ ಈ ವಸತಿ ನಿಲಯ 2022 ರವರೆಗೆ ಸುಸ್ಥಿತಿಯಲ್ಲಿತ್ತು. ಕೊಠಡಿಗಳ ಗೋಡೆಗಳಿಗೆ ಟೈಲ್ಸ್ ಹಾಕಲಾಗಿದ್ದು, ಈಗಲೂ ಫಳಫಳ ಹೊಳೆಯುತ್ತಿವೆ. ಇತ್ತೀಚಿನ ಕೆಲ ವರ್ಷಗಳಿಂದ ಸದುಪಯೋಗವಾಗದೆ ಪಾಳು ಬಿದ್ದಿದೆ. ಕಟ್ಟಡದ ತುಂಬ ಮದ್ಯದ ಬಾಟಲ್‌ಗಳು, ಕೊಳಕು ಬಟ್ಟೆಗಳು ಬಿದ್ದಿವೆ. ವಸತಿ ನಿಲಯ ಹಗಲು- ರಾತ್ರಿ ಎನ್ನದೆ ಮದ್ಯವ್ಯಸನಿಗಳ ಆಶ್ರಯ ತಾಣವಾಗಿದೆ. ವಿಶಾಲವಾದ ಹಲವಾರು ಕೊಠಡಿಗಳಿವೆ. ವಸತಿ ನಿಲಯದ ಒಳಗಿನ ಆವರಣದಲ್ಲಿ ವಿದ್ಯಾರ್ಥಿಗಳ ಅಧ್ಯಯನಕ್ಕೆ ಬೇಕಾದ ಪ್ರಶಾಂತ ವಾತಾವರಣವಿದೆ. ಆವರಣದಲ್ಲಿ ತೆಂಗು ಸೇರಿದಂತೆ ಇತರ ಮರಗಳಿದ್ದು, ಸರಿಯಾದ ಪೋಷಣೆ ಇಲ್ಲದೆ ಸೊರಗಿವೆ. ಈ ವಸತಿ ನಿಲಯದ ವಿದ್ಯಾರ್ಥಿಗಳು ಇದೀಗ ಬಾಡಿಗೆ ಕಟ್ಟಡದಲ್ಲಿದ್ದಾರೆ.

ಹಾಸ್ಟೆಲ್ ಗೋಡೆಗಳು ಸಂಪೂರ್ಣ ಶಿಥಿಲಾವಸ್ಥೆಯಲ್ಲಿದ್ದು, ಬಾಗಿಲು, ಕಿಟಕಿಗಳು ಮುರಿದು ಬಿದ್ದಿವೆ. ಶೌಚಗೃಹದ ಬಾಗಿಲು, ಕಿಟಕಿಗಳು ಗೆದ್ದಿಲು ಹಿಡಿಯುತ್ತಿವೆ. ಕೊಠಡಿಗಳ ಛಾವಣಿ ಶಿಥಿಲಗೊಂಡಿದ್ದು, ಕುಸಿಯುವ ಭೀತಿ ಇದೆ. ಕತ್ತಲಾದ ಬಳಿಕ ಈ ನಿಲಯದ ಮುಂಭಾಗದಲ್ಲಿ ಅಡ್ಡಾಡುವ ಪಕ್ಕದ ನಿಲಯದ ವಿದ್ಯಾರ್ಥಿಗಳು ಭಯದಿಂದ ನಡೆದಾಡಬೇಕಿದೆ.

ನಾನಾ ವಸತಿ ನಿಲಯಗಳು ಬಾಡಿಗೆ ಕಟ್ಟಡದಲ್ಲಿವೆ. ಇದರಿಂದಾಗಿ ಈ ವಿದ್ಯಾರ್ಥಿ ನಿಲಯವನ್ನು ಸರ್ಕಾರ ದುರಸ್ತಿ ಮಾಡಿಸಿ ಸದ್ಬಳಕೆ ಮಾಡಬೇಕಿದೆ.