ವಿಜಯನಗರ ಕಾಲದ ದಾನ ಶಾಸನ ಪತ್ತೆ

ತೀರ್ಥಹಳ್ಳಿ: ಮಣ್ಣಿನೊಳಗೆ ಹುದುಗಿ ಹೋಗಿದ್ದ 500 ವರ್ಷ ಹಳೆಯದಾದ ವಿಜಯನಗರ ಅರಸರ ಕಾಲದ ದಾನ ಶಾಸನದ ಕಲ್ಲೊಂದು ಗುಡ್ಡೇಕೊಪ್ಪದ ಬಳಿ ದೊರೆತಿದೆ. ಸಂಶೋಧಕರಾದ ಎಲ್.ಎಸ್.ರಾಘವೇಂದ್ರ ಮತ್ತು ಪತ್ರಕರ್ತ ಜಿ.ಆರ್.ಸತ್ಯನಾರಾಯಣ ಇದನ್ನು ಸಂಶೋಧನೆ ಮಾಡಿದ್ದಾರೆ.

ಗುಡ್ಡೆಕೊಪ್ಪದ ಕೃಷಿಕ ಹೊಸತೋಟ ವಿಶ್ವನಾಥ ಎಂಬುವವರ ತೋಟದ ಸಮೀಪದಲ್ಲಿ ಮಣ್ಣಿನೊಳಗೆ ಅರ್ಧದಷ್ಟು ಹುದುಗಿ ಹೋಗಿತ್ತು. ಗ್ರಾಮಸ್ಥರೆಲ್ಲರು ಚೌಡಿ ಕಲ್ಲೆಂದು ಭಯ ಭಕ್ತಿಗೆ ಕಾರಣವಾಗಿತ್ತು. ಈ ಕಲ್ಲು ಮತ್ತೆ ಬೆಳಕಿಗೆ ಬರಲು ವಿಶ್ವನಾಥ ಅವರ ಆಸಕ್ತಿಯೇ ಕಾರಣ. ಈ ದಾನ ಶಾಸನದಲ್ಲಿ ಅಲ್ಲಲ್ಲಿ ಅಕ್ಷರಗಳು ಅಳಿಸಿ ಹೋಗಿದ್ದು, ಯಾವ ರಾಜರ ಕಾಲದಲ್ಲಿ ಎಂಬುದು ತಿಳಿಯುತ್ತಿಲ್ಲ. ಎಪಿಗ್ರಾಫಿಯ ಕರ್ನಾಟಕ ಗ್ರಂಥದ ಸಂಪುಟ 13ರ ಪುಟ 416ರಲ್ಲಿ ದಾಖಲಾಗಿರುವಂತೆ ಒಂದಷ್ಟು ವಿವರಗಳಿವೆ. ಸುಮಾರು 14-15ನೇ ಶತಮಾನದೆಂದು ಅಂದಾಜಿಸಲಾಗಿದೆ. ಸುಮಾರು 47 ಸಾಲುಗಳಿರುವ ಭೂಮಿ ದಾನ ಕೊಟ್ಟಿರುವ ಬಗ್ಗೆ ಈ ಶಾಸನದಲ್ಲಿ ತಿಳಿಸಲಾಗಿದೆ.