ಅತ್ತೆಯ ಮೇಲೆ ಸೊಸೆ ನಡೆಸುತ್ತಿರುವ ಪೈಶಾಚಿಕ ಹಲ್ಲೆಯ ವಿಡಿಯೋ ಸೋಮವಾರ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡಿತು. ಈ ವಿಡಿಯೋ ಸಾಕಷ್ಟು ವೈರಲ್ ಆದ ತಕ್ಷಣವೇ ಕಾರ್ಯಪ್ರವೃತ್ತರಾದ ಗ್ರಾಮಾಂತರ ಪೊಲೀಸರು ಗ್ರಾಮಕ್ಕೆ ಭೇಟಿ ನೀಡಿ ವಿಚಾರಣೆ ನಡೆಸಿದರು. ತನಿಖೆ ವೇಳೆ ಈ ಹಲ್ಲೆ ನಡೆದಿರುವುದು ಏಪ್ರಿಲ್ ತಿಂಗಳಲ್ಲಿ ಎಂಬುದು ತಿಳಿದುಬಂದಿದೆ. 8 ವರ್ಷಗಳ ಹಿಂದೆ ಶಾಂತಮ್ಮ ಪತಿ ಮೃತಪಟ್ಟಿದ್ದು, ಮಗ ಹಾಗೂ ಸೊಸೆಯ ಜೊತೆ ಜೀವನ ಸಾಗಿಸುತ್ತಿರುತ್ತಾರೆ. ಏ ೧೯ ರಂದು ಮನೆಯಲ್ಲಿ ತನ್ನಷ್ಟಕ್ಕೆ ಕುಳಿತಿದ್ದ ಶಾಂತಮ್ಮ ಮೇಲೆ ಪಾಪಿ ಸೊಸೆ ಸಂಜನಾ, ಅವಾಚ್ಯ ಶಬ್ದಗಳಿಂದ ನಿಂದಿಸಿ, ಎಳೆದಾಡಿ ದೊಣ್ಣೆಯಿಂದ ಹಲ್ಲೆ ನಡೆಸುತ್ತಾಳೆ. ಜೊತೆಗೆ, ಹಲ್ಲೆಯ ಬಗ್ಗೆ ಯಾರಿಗಾದರೂ ತಿಳಿಸಿದರೆ ಸಾಯಿಸುವ ಬೆದರಿಕೆ ಒಡ್ಡುತ್ತಾಳೆ. ಹಲ್ಲೆಯಿಂದ ಗಾಯಗೊಂಡಿದ್ದ ಶಾಂತಮ್ಮರನ್ನು ಸಂಬಂಧಿಕರೊಬ್ಬರು
ಸಾರ್ವಜನಿಕ ಆಸ್ಪತ್ರೆಗೆ ಕರೆದುಕೊಂಡು ಹೋಗಿ ಚಿಕಿತ್ಸೆ ಕೊಡಿಸಿ, ಶಾಂತಮ್ಮನವರ ತವರು ಮನೆಗೆ ಬಿಟ್ಟುಬಂದಿರುತ್ತಾರೆ. ಶಾಂತಮ್ಮ ಸಹೋದರ ರಾಮನಗರ ಜಿಲ್ಲಾ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಕೊಡಿಸಿ, ಹುಷಾರಾದ ಮೇಲೆ ಮತ್ತೆ ಗ್ರಾಮಕ್ಕೆ ಕರೆತಂದು ಬಿಟ್ಟಿರುತ್ತಾರೆ. ಇಷ್ಟರ ನಡುವೆಯೂ ಮಗ ಹಾಗೂ ಸೊಸೆಯ ಮೇಲಿನ ಮಮಕಾರದಿಂದ ವೃದ್ದಜೀವ ಯಾವುದೇ ದೂರನ್ನು ನೀಡಿರುವುದಿಲ್ಲ.
