ಮಂಡ್ಯ: ಎಂಡಿಸಿಸಿ ಬ್ಯಾಂಕ್ ಠೇವಣಿ ಮೇಲಿನ ಬಡ್ಡಿಗೆ ಸಂಬಂಧಿಸಿದಂತೆ ನಿಯಮ ಉಲ್ಲಂಘಿಸಿ ಆದಾಯ ತೆರಿಗೆ ಇಲಾಖೆ ಕೆ.ಆರ್.ಪೇಟೆ ತಾಲೂಕು ಹೊಸಹೊಳಲು ಗ್ರಾಮದ ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರ ಸಂಘಕ್ಕೆ ವಿಧಿಸಿದ್ದ ತೆರಿಗೆ ವಿಧಿಸಿತು. ಇದರ ವಿರುದ್ಧ ಆದಾಯ ತೆರಿಗೆ ನ್ಯಾಯಾಲಯ(ಕಮೀಷನರ್ ಆಫ್ ಇನ್ಕಮ್ ಟ್ಯಾಕ್ಸ್-ಅಪೀಲ್ಸ್)ದಲ್ಲಿ ದಾವೆ ಹೂಡಿ ತೆರಿಗೆ ವಿನಾಯಿತಿ ಕೊಡಿಸಲಾಗಿದೆ ಎಂದು ಹಿರಿಯ ಸಹಕಾರಿ ಕೌಡ್ಲೆ ಚನ್ನಪ್ಪ ಹೇಳಿದರು.
ಮಂಡ್ಯದ ಚಾರ್ಟಡ್ ಅಕೌಂಟೆಂಟ್ ಎಚ್.ಶಂಕರೇಗೌಡ ಅವರು ಆದಾಯ ತೆರಿಗೆ ನ್ಯಾಯಾಲಯದಲ್ಲಿ ದಾವೆ ಹೂಡಿ ಹೊಸಹೊಳಲು ಗ್ರಾಮದ ಸೊಸೈಟಿಗೆ ತೆರಿಗೆ ವಿನಾಯಿತಿ ಕೊಡಿಸಿದ್ದಾರೆ. ಇದು ಜಿಲ್ಲೆಯಲ್ಲಿ ಮೊದಲ ಪ್ರಕರಣವಾಗಿದ್ದು, ಸಹಕಾರ ಕ್ಷೇತ್ರ ಮತ್ತು ಆದಾಯ ತೆರಿಗೆ ಇಲಾಖೆಯಲ್ಲಿ ಹೊಸ ಇತಿಹಾಸ ಸೃಷ್ಟಿಸಿದೆ. ಆದಾಯ ತೆರಿಗೆ ನ್ಯಾಯಾಲಯದ ಈ ಆದೇಶವು ಇತರ ಸಹಕಾರ ಸಂಘ ಸಂಸ್ಥೆಗಳಿಗೆ ನೆರವಾಗಲಿದೆ ಎಂದು ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.
ಹೊಸಹೊಳಲು ಗ್ರಾಮದ ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರ ಸಂಘವು ಎಂಡಿಸಿಸಿ ಬ್ಯಾಂಕ್ನಲ್ಲಿ ಇಟ್ಟಿದ್ದ ಠೇವಣಿಗೆ 25,08,402 ರೂ ಬಡ್ಡಿ ಬಂದಿತ್ತು. ಆದರೆ, ಈ ಮೊತ್ತಕ್ಕೆ ಮಂಡ್ಯದ ಆದಾಯದ ತೆರಿಗೆ ಇಲಾಖೆ 10,57,454 ರೂ ತೆರಿಗೆ ವಿಧಿಸಿತ್ತು. ಇದನ್ನು ಸವಾಲಾಗಿ ಸ್ವೀಕರಿಸಿದ ಚಾರ್ಟಡ್ ಅಕೌಂಟೆಂಟ್ ಎಚ್.ಶಂಕರೇಗೌಡ ಅವರು ಆದಾಯ ತೆರಿಗೆ ನ್ಯಾಯಾಲಯಕ್ಕೆ ಮೇಲ್ಮನವಿ ಸಲ್ಲಿಸಿ, ಸಮರ್ಥ ವಾದ ಮಂಡಿಸಿ ಕಾನೂನು ಹೋರಾಟ ನಡೆಸಿದ್ದರು. ಇದರೊಂದಿಗೆ ಆದಾಯ ಇಲಾಖೆ ವಿಧಿಸಿದ್ದ ತೆರಿಗೆಯನ್ನು ನ್ಯಾಯಾಲಯವು ರದ್ದುಗೊಳಿಸಿ ತೆರಿಗೆ ವಿನಾಯಿತಿ ನೀಡಿದೆ ಎಂದರು.
ಜಿಲ್ಲಾ ಸಹಕಾರಿಗಳ ವೇದಿಕೆ ಟ್ರಸ್ಟ್ ಅಧ್ಯಕ್ಷ ಎಚ್.ಸಿದ್ದಯ್ಯ, ಚಾರ್ಟಡ್ ಅಕೌಂಟೆಂಟ್ ಎಚ್.ಶಂಕರೇಗೌಡ ಇದ್ದರು.
