ತರಕಾರಿ ಬಲು ದುಬಾರಿ

ವಿರೂಪಾಕ್ಷಯ್ಯ ಗುದ್ನಯ್ಯನವರಮಠ ಹುಬ್ಬಳ್ಳಿ

ದಿನಸಿ ವಸ್ತುಗಳಾದ ಅಕ್ಕಿ, ತೊಗರಿಬೇಳೆ, ಉದ್ದಿನಬೇಳೆ, ಜೀರಗಿ, ಮತ್ತಿತರ ವಸ್ತುಗಳ ಬೆಲೆ ಸದ್ದಿಲ್ಲದೇ ಶೇ. 15ರಿಂದ 20ರಷ್ಟು ಹೆಚ್ಚಳವಾಗಿವೆ. ಇದರ ಜತೆಗೆ ಟೊಮ್ಯಾಟೊ ಬೆಲೆ ಪ್ರತಿ ಕೆಜಿ 100 ರೂಪಾಯಿಯಾಗಿದೆ.

ಮಾರುಕಟ್ಟೆಯಲ್ಲಿ ದಿನಸಿ ಮತ್ತು ತರಕಾರಿ ದರ ಹೆಚ್ಚಾಗಲು ಮಳೆ ಆಗದಿರುವುದೇ ಪ್ರಮುಖ ಕಾರಣವಾಗಿದೆ. ಅಲ್ಲದೆ, ಅಗತ್ಯ ವಸ್ತುಗಳ ಕೊರತೆ ಕಂಡು ಬಂದಾಗ ಎಂಎನ್​ಸಿ ಕಂಪನಿಗಳು ದೊಡ್ಡ ಪ್ರಮಾಣದಲ್ಲಿ ಸ್ಟಾಕ್ ಮಾಡಿಕೊಳ್ಳಲು ಮುಂದಾಗುತ್ತವೆ.

ಆಗ ಒಂದು ರೀತಿಯಲ್ಲಿ ಕೃತಕ ಅಭಾವ ವಾತಾವರಣ ಸೃಷ್ಟಿಯಾಗುತ್ತದೆ. ನಂತರದ ದಿನಗಳಲ್ಲಿ ದೊಡ್ಡ ವ್ಯಾಪಾರಸ್ಥರು ಮತ್ತು ಎಂಎನ್​ಸಿ ಕಂಪನಿಗಳು ಸ್ಟಾಕ್ ಮಾಡಿಕೊಂಡಿದ್ದ ದಿನಸಿ ವಸ್ತುಗಳನ್ನು ಕೊಂಚ ಹೆಚ್ಚಿನ ಬೆಲೆಗೆ ಮಾರುಕಟ್ಟೆಗೆ ಬಿಡುಗಡೆ ಮಾಡುತ್ತಾರೆ ಎನ್ನುತ್ತಾರೆ ಎಪಿಎಂಸಿಯ ಪ್ರಮುಖ ವ್ಯಾಪಾರಸ್ಥರೊಬ್ಬರು.

ಈಗ ಮೊದಲೇ ಸರ್ಕಾರ ವಿದ್ಯುತ್ ದರ ಹೆಚ್ಚಳ ಮಾಡಿದ್ದರಿಂದ ಜನರು ಹೈರಾಣಾಗಿದ್ದಾರೆ. ಮತ್ತೆ ದಿನಸಿ ಬೆಲೆ ಹೆಚ್ಚಳ ಸರದಿ. ಇದೆಲ್ಲದರ ಪರಿಣಾಮ ಮಧ್ಯಮ ವರ್ಗದ ಜನರಿಗೆ ಆಗುತ್ತದೆ. ಶ್ರೀಮಂತ ವರ್ಗದವರಿಗೆ ಅಷ್ಟೇನು ಪರಿಣಾಮ ಬೀರುವುದಿಲ್ಲ. ಮುಂದೇನು ಎಂಬುದೇ ಸಾರ್ವಜನಿಕರ ಪ್ರಶ್ನೆಯಾಗಿದೆ.

• ಅಕ್ಕಿ (ಜೀರಾ) ಈಗಿನ ಬೆಲೆ ಪ್ರತಿ ಕೆಜಿಗೆ 65, ಕಳೆದ ವಾರದ ಬೆಲೆ 60
• ತೊಗರಿಬೇಳೆ ಈಗಿನ ಬೆಲೆ ಪ್ರತಿ ಕೆಜಿಗೆ 150, ಕಳೆದ ವಾರದ ಬೆಲೆ 130
• ಹೆಸರು ಬೇಳೆ ಈಗಿನ ಬೆಲೆ ಪ್ರತಿ ಕೆಜಿಗೆ 112, ಕಳೆದ ವಾರದ ಬೆಲೆ 104
• ಉದ್ದಿನಬೇಳೆ ಈಗಿನ ಬೆಲೆ ಪ್ರತಿ ಕೆಜಿಗೆ 130, ಕಳೆದ ವಾರದ ಬೆಲೆ 115
• ಅವಲಕ್ಕಿ ಈಗಿನ ಬೆಲೆ ಪ್ರತಿ ಕೆಜಿಗೆ 48, ಕಳೆದ ವಾರದ ಬೆಲೆ 40
• ಗುರೆಳ್ಳ ಈಗಿನ ಬೆಲೆ ಪ್ರತಿ ಕೆಜಿಗೆ 145, ಕಳೆದ ವಾರದ ಬೆಲೆ 120
• ಜೀರಗಿ ಈಗಿನ ಬೆಲೆ ಪ್ರತಿ ಕೆಜಿಗೆ 720, ಕಳೆದ ವಾರದ ಬೆಲೆ 450
• ಲವಂಗ ಈಗಿನ ಬೆಲೆ ಪ್ರತಿ ಕೆಜಿಗೆ 1,000, ಕಳೆದ ವಾರದ ಬೆಲೆ 850
• ಸಾಬುದಾನಿ ಈಗಿನ ಬೆಲೆ ಪ್ರತಿ ಕೆಜಿಗೆ 76, ಕಳೆದ ವಾರದ ಬೆಲೆ 60
• ಶೇಂಗಾ ಈಗಿನ ಬೆಲೆ ಪ್ರತಿ ಕೆಜಿಗೆ 130, ಕಳೆದ ವಾರದ ಬೆಲೆ 115
• ಜೋಳ ಈಗಿನ ಬೆಲೆ ಪ್ರತಿ ಕೆಜಿಗೆ 60, ಕಳೆದ ವಾರದ ಬೆಲೆ 50