ಎ.26ರಂದು ರಾಜ್ಯಾದ್ಯಂತ ಈಡುಗಾಯಿ ಚಳುವಳಿ

ಉಡುಪಿ: ಮೇಕೆದಾಟು, ಮಹದಾಯಿ ಯೋಜನೆ, ಕಳಸಾ ಬಂಡೂರಿ ಯೋಜನೆ ಜಾರಿ ಹಾಗೂ ಗ್ರೇಟರ್​ ಬೆಂಗಳೂರು ವಿರೋಧಿಸಿ, ಸಮಗ್ರ ಬೇಡಿಕೆ ಈಡೇರಿಕೆಗೆ ಆಗ್ರಹಿಸಿ ಏ.26ರಂದು ರಾಜ್ಯಾದ್ಯಂತ ಮಸೀದಿ, ದೇವಸ್ಥಾನ, ಅಂಗಡಿ, ಹೋಟೆಲ್​ ಸೇರಿದಂತೆ ವಿವಿಧ ಸ್ಥಳಗಳಲ್ಲಿ 2 ಕೋಟಿ ಈಡುಗಾಯಿ ಒಡೆಯುವ ಚಳುವಳಿ ಹಮ್ಮಿಕೊಳ್ಳಲಾಗಿದೆ ಎಂದು ಕನ್ನಡಪರ ಹೋರಾಟಗಾರ ವಾಟಾಳ್​ ನಾಗರಾಜ್​ ತಿಳಿಸಿದ್ದಾರೆ.

ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಕನ್ನಡಿಗರಿಗೆ ಉದ್ಯೋಗ ಕಡ್ಡಾಯ ಕಾನೂನು ಸಚಿವ ಸಂಪುಟದಲ್ಲಿ ಅನುಮೋದನೆಗೊಂಡಿದ್ದರೂ ಐಟಿ, ಬಿಟಿ ಕಂಪೆನಿಗಳ ಬೆದರಿಕೆಗೆ ಮಣಿದು ಸರ್ಕಾರ ಕಾಯ್ದೆ ವಾಪಾಸು ಪಡೆದಿದೆ. ಮಂಗಳೂರಿನಲ್ಲಿಯೂ ಮಲಯಾಳಿಗಳ ಪ್ರಾಬಲ್ಯ ಹೆಚ್ಚಾಗುತ್ತಿದೆ. ಕಾಸರಗೋಡಿನಲ್ಲಿ ಕನ್ನಡ ಶಾಲೆಗಳನ್ನು ಮುಚ್ಚಲಾಗುತ್ತಿದೆ. ಈ ಬಗ್ಗೆ ಗಡಿಭಾಗದಲ್ಲಿ ಹೋರಾಟ ನಡೆಸಲಾಗುವುದು ಎಂದರು.

ಕರಾವಳಿಯಲ್ಲಿ ಸಚಿವ ಸಂಪುಟ ಸಭೆ

ದ.ಕ., ಉಡುಪಿ, ಉ.ಕ. ಜಿಲ್ಲೆಗಳ ಸಮಗ್ರ ಅಭಿವೃದ್ಧಿ ಹಿನ್ನೆಲೆಯಲ್ಲಿ ವರ್ಷಕ್ಕೊಮ್ಮೆಯಾದರೂ ಸರ್ಕಾರ ಈ ಭಾಗದಲ್ಲಿ ಸಚಿವ ಸಂಪುಟ ಸಭೆ ನಡೆಸಬೇಕು. ಇದರಿಂದ ಬಹಳಷ್ಟು ಅನುಕೂಲವಾಗಲಿದೆ ಎಂದರು.

ಶಾಸಕರ ಅಮಾನತು ಸಲ್ಲದು

ವಿಧಾನಸಭಾ ಅಧಿವೇಶನದಲ್ಲಿ ರಾಜ್ಯದ ಅಭಿವೃದ್ಧಿ ಬಗ್ಗೆ ಸಮಗ್ರ ಚರ್ಚೆ ನಡೆಸಲು ಉತ್ತಮ ಅವಕಾಶವಿದೆ. ಇದನ್ನು ಆಡಳಿತ ಮತ್ತು ವಿರೋಧಪಕ್ಷಗಳು ಸುದುಪಯೋಗಿಸಿಕೊಳ್ಳಬೇಕು. ದುರಾದೃಷ್ಟವಶಾತ್​ ಗದ್ದಲಗಳಿಂದ ಅಮೂಲ್ಯ ಸಮಯ ಹಾಳಾಗುತ್ತಿದೆ. ಈ ಬಾರಿಯ ಅಧಿವೇಶನದಲ್ಲಿ ಸ್ಪೀಕರ್​ ವಿರೋಧ ಪಕ್ಷದ ಶಾಸಕರನ್ನು ಅಮಾನತು ಮಾಡಿರುವುದು ಸರಿಯಾದ ಕ್ರಮವಲ್ಲ. ಇದರಿಂದ ಶಾಸಕರ ನತೆಗೆ ಕುಂದು ಉಂಟಾಗುತ್ತಿದೆ . ರಾಜ್ಯದ ಶಾಸನ ಸಭೆಗೆ ಬಹಳ ಗೌರವವಿದೆ ಎಂದರು.

ರಿಯಲ್​ ಎಸ್ಟೇಟ್​ ಆಗುತ್ತಿದೆ

ಚುನಾವಣೆಗಳು ರಿಯಲ್​ ಎಸ್ಟೇಟ್​ ವ್ಯಾಪಾರವಾಗುತ್ತಿದೆ. ಅವರೇ ಗೆಲುವು ಸಾಧಿಸುತ್ತಿದ್ದಾರೆ. ವಿಧಾನ ಪರಿಷತ್​ಗೆ 3 ಜನರನ್ನು ನಾಮಕರಣ ಮಾಡಲು ಸರ್ಕಾರಕ್ಕೆ ಅವಕಾಶವಿದೆ. ಸಾಧಕರ ಬದಲು ರಾಜಕೀಯ ನಾಯಕರನ್ನೇ ಆಯ್ಕೆ ಮಾಡುತ್ತಿರುವುದು ದುರದೃಷ್ಟಕರ ಎಂದರು.

ಕಾಂತಾರದ ಗೌರವ ಶಿವಾಜಿಯಲ್ಲಿ ಹೋಯಿತು

ನಟ ರಿಷಭ್​ ಶೆಟ್ಟಿ ಅವರು ಕಾಂತಾರ ಸಿನೆಮಾದಲ್ಲಿ ಗಳಿಸಿದ ಗೌರ ಶಿವಾಜಿ ಸಿನೆಮಾದಿಂದ ಹೊರಟು ಹೋಗಿದೆ. ನಮ್ಮ ರಾಜ್ಯದಲ್ಲೇ ಅನೇಕ ಮಂದಿ ಮಹನೀಯರಿದ್ದು, ಅವರ ಸಿನೆಮಾ ಮಾಡಬಹುದಿತ್ತು ಎಂದು ವಾಟಾಳ್​ ಹೇಳಿದರು. ವಾಟಾಳ್​ ಪಕ್ಷದ ಮುಖಂಡ ಚಂದನ್​ ವಾಟಾಳ್​ ಉಪಸ್ಥಿತರಿದ್ದರು.