ಕಾಫಿನಾಡು ಚಿಕ್ಕಮಗಳೂರು ಜಿಲ್ಲೆಯ ಗಿರಿಶ್ರೇಣಿ ಹಾಗೂ ಮಲೆನಾಡು ಭಾಗದಲ್ಲಿ ನಿರಂತರವಾಗಿ ಹದಮಳೆಯಾಗುತ್ತಿರುವುದರಿಂದ ಕಾಫಿ ಹಾಗೂ ಕಾಳು ಮೆಣಸು ಬೆಳೆಗಾರರ ಮೊಗ ಕಾಫಿ ಹೂವುಗಳಂತೆಯೇ ಅರಳಲಾರಂಭಿಸಿದೆ. ಈ ಬಾರಿಯ ಬಿರು ಬಿಸಿಲಿನಿಂದಾಗಿ ಕಾಫಿ ಗಿಡಗಳು ಹಾಗೂ ಕಾಳು ಮೆಣಸು ಬಳ್ಳಿಗಳು ಒಣಗಲಾರಂಭಿಸಿದ್ದವು. ಆದರೆ ಏಪ್ರಿಲ್ ತಿಂಗಳ ಅಂತ್ಯದಿಂದ ನಿರಂತರವಾಗಿ ಕೆಲ ದಿನಗಳ ಅಂತರದಲ್ಲಿಯೇ ಮಳೆಯಾಗುತ್ತಿರುವುದರಿಂದಾಗಿ ಈ ಎಲ್ಲ ಬೆಳೆಗಳಿಗೂ ಇದೀಗ ಜೀವಕಳೆ ಬಂದಿದೆ.
ಏಪ್ರಿಲ್ ತಿಂಗಳ ಅಂತ್ಯದಲ್ಲಿ ಬಂದ ಮಳೆಯಿಂದಾಗಿ ಒಣಗದೆ ಇದ್ದ ಕಾಫಿಗಿಡಗಳಲ್ಲಿ ಭರಪೂರ ಹೂವು ಕಾಣಿಸಿಕೊಂಡಿತ್ತು. ಆದರೆ ಮತ್ತೆ ಒಂದು ವೇಳೆ ಮಳೆ ಕೈಕೊಟ್ಟಿದ್ದಲ್ಲಿ ಕಾಫಿ ಹೀಚುಗಟ್ಟದೆ ಇಳುವರಿ ಕುಂಠಿತಗೊಳ್ಳುವ ಆತಂಕ ಎದುರಾಗಿತ್ತು. ಆದರೆ ಅಂದಿನಿಂದ ಇಂದಿನವರೆಗೆ ಕೆಲ ದಿನಗಳ ಅಂತರದಲ್ಲಿ ನಿರಂತರವಾಗಿ ಮಳೆಯಾಗುತ್ತಿರುವುದರಿಂದಾಗಿ ಕಾಫಿ ಹೀಚುಗಟ್ಟಲು ಉತ್ತಮ ವಾತಾವರಣ ನಿರ್ಮಾಣವಾಗಿದೆ ಎನ್ನುತ್ತಾರೆ ಕಾಫಿ ಬೆಳೆಗಾರರು.
ಡಿಸೆಂಬರ್, ಜನವರಿ, ಫ್ರೆಬ್ರವರಿ ಹಾಗೂ ಮಾರ್ಚ್ ತಿಂಗಳಿನಲ್ಲಿ ಬಿಸಿಲಿನಲ್ಲಿ ಬಾಡಿದಂತಾಗುವ ಕಾಫಿ ಗಿಡಗಳು ಮಾರ್ಚ್ ಅಥವಾ ಏಪ್ರಿಲ್ ತಿಂಗಳಿನಲ್ಲಿ ಸುರಿಯುವ ಮಳೆಯಲ್ಲಿ ಮತ್ತೆ ಹಸಿರಿನಿಂದ ಕಂಗೊಳಿಸುವ ಜತೆಗೆ ಹೂವು ಬಿಡುವ ಮೂಲಕ ಹೊಸ ಲೋಕವನ್ನೇ ಸೃಷ್ಟಿ ಮಾಡುತ್ತವೆ. ರಸ್ತೆಯಲ್ಲಿ ಹೋಗುವಾಗ ಎಲ್ಲೆಲ್ಲೂ ಬಿಳಿ ಹೂವುಗಳೇ ಕಾಣಿಸುತ್ತವೆ. ಜತೆಗೆ ಹೂವುಗಳ ಸುವಾಸನೆ ಮನಸಿಗೆ ಮುದ ನೀಡುತ್ತದೆ. ಹೀಗೆ ಹೂವಾದ ಬಳಿಕ ಮಳೆ ಬಂದಲ್ಲಿ ಹೂವು ಹೀಚಾಗಿ ಪರಿವರ್ತನೆಗೊಂಡು ಕಾಳುಗಟ್ಟಲಾರಂಭಿಸುತ್ತದೆ. ಇದೀಗ ಸುರಿಯುತ್ತಿರುವ ಮಳೆ ಕಾಫಿ ಕಾಳುಗಟ್ಟಲು ಪೂರಕ ವಾತಾವರಣ ನಿರ್ಮಾಣ ಮಾಡಿದ್ದರಿಂದಾಗಿ ಬೆಳೆಗಾರರು ಸಂತಸಗೊಂಡಿದ್ದಾರೆ.
