ಮಹಾವೀರ ಜಯಂತಿ ಅಂಗವಾಗಿ ವಿವಿಧ ಕಾರ್ಯಕ್ರಮ

ಹುಬ್ಬಳ್ಳಿ : ಅಹಿಂಸೆಯ ಅಗ್ರ ಪ್ರತಿಪಾದಕ 24ನೇ ತೀರ್ಥಂಕರರಾದ ಭಗವಾನ ಮಹಾವೀರರ ಜನ್ಮಕಲ್ಯಾಣ ಜಯಂತಿ ಮಹೋತ್ಸವವನ್ನು ಹುಬ್ಬಳ್ಳಿ ದಿಗಂಬರ ಜೈನ ಸಮಾಜ ಅದ್ದೂರಿಯಿಂದ ಆಚರಿಸಲು ನಿರ್ಧರಿಸಿದೆ.

ಈ ಹಿನ್ನೆಲೆಯಲ್ಲಿ ಏ. 6 ರಿಂದ 10ರವರೆಗೆ ವಿವಿಧ ಕಾರ್ಯಕ್ರಮಗಳನ್ನು ಆಯೋಜಿಸಿದೆ. ಜನಕಲ್ಯಾಣ ಕಾರ್ಯಕ್ರಮಗಳ ಅಂಗವಾಗಿ 6ರಂದು ಬೆಳಗ್ಗೆ 11 ರಿಂದ ಶಾಂತಿನಾಥ ಭವನದಲ್ಲಿ ಉಚಿತ ಆರೋಗ್ಯ ತಪಾಸಣೆ ಶಿಬಿರವನ್ನು ಶಾಂತಿನಾಥ ಮಹಿಳಾ ಸಮಾಜ, ಜೈನ ಮಿಲನ್​ ಹಾಗೂ ಪದ್ಮಾವತಿ ಮಹಿಳಾ ಮಂಡಳಗಳ ಸಹಯೋಗದೊಂದಿಗೆ ಏರ್ಪಡಿಸಿದೆ.

ಸಾಮಾನ್ಯ ಆರೋಗ್ಯ ಪರೀಕ್ಷೆ, ನೇತ್ರ ತಪಾಸಣೆ, ಚರ್ಮರೋಗ, ಸ್ತ್ರೀ ರೋಗ, ನರರೋಗ ತಪಾಸಣೆಗಳನ್ನು ತಜ್ಞ ವೈದ್ಯರು ಮಾಡುವರು. ಇದೇ ಸಂದರ್ಭದಲ್ಲಿ ರಾಷ್ಟ್ರೊತ್ಥಾನ ರಕ್ತಕೇಂದ್ರದಿಂದ ಬೆಳಗ್ಗೆ 10 ರಿಂದ ಮಧ್ಯಾಹ್ನ 2 ಗಂಟೆವರೆಗೆ ರಕ್ತದಾನ ಶಿಬಿರ ಏರ್ಪಡಿಸಲಾಗಿದೆ.

ಏ. 7 ರಂದು ಪೂಜೆ, ಪ್ರಾರ್ಥನೆಗಳು ನಡೆಯುವವು. 8ರಂದು ಬೆಳಗ್ಗೆ 11 ರಿಂದ ಶಾಂತಿನಾಥ ಭವನದಿಂದ ಸ್ಕೇಟಿಂಗ್​ ಮೇಲೆ ಜೈನ ಧ್ವಜ ರ್ಯಾಲಿ ಪ್ರಮುಖ ಬೀದಿಗಳಲ್ಲಿ ನಡೆಯುವುದು.

9 ರಂದು ಜಿತೋ ಆಯೋಜನೆಯಲ್ಲಿ ಬೆಳಗ್ಗೆ 8 ಗಂಟೆಗೆ ಶ್ರೀನಿವಾಸ ಗಾರ್ಡನ್​ ನಲ್ಲಿ "ವಿಶ್ವ ಣಮೋಕಾರ ದಿವಸ" ಸಾಮೂಹಿಕ ವಿಶ್ವಶಾಂತಿ ಪ್ರಾರ್ಥನೆ ಆಯೋಜಿಸಲಾಗಿದೆ. ಸಂಜೆ 5.30ಕ್ಕೆ ಶಾಂತಿನಾಥ ಭವನದಲ್ಲಿ ನಡೆಯುವ ಧರ್ಮ ಸಭೆ ಕಾರ್ಯಕ್ರಮವನ್ನು ಜಿಲ್ಲಾಧಿಕಾರಿ ದಿವ್ಯ ಪ್ರಭು ಉದ್ಘಾಟಿಸುವರು. ಪೊಲೀಸ್​ ಆಯುಕ್ತ ಎನ್​. ಶಶಿಕುಮಾರ ಅತಿಥಿಯಾಗಿ ಪಾಲ್ಗೊಳ್ಳುವರು. ಧಾರವಾಡ ಜಿಲ್ಲಾ ಕಸಾಪ ಗೌರವ ಕಾರ್ಯದಶಿರ್ ಪ್ರೊ. ಕೆ.ಎಸ್​. ಕೌಜಲಗಿ ಪ್ರಧಾನ ಉಪನ್ಯಾಸ ನೀಡುವರು. ಜೈನ ಸಮಾಜ ಅಧ್ಯಕ್ಷ ರಾಜೇಂದ್ರ ಬೀಳಗಿ ಅಧ್ಯಕ್ಷತೆ ವಹಿಸುವರು.

ಏ. 10 ರಂದು ಮಹಾವೀರ ಜಯಂತಿ ದಿನದಂದು ಬೆಳಗ್ಗೆ 6 ಗಂಟೆಗೆ ನಗರದ ಎಲ್ಲ ಬಸದಿಗಳಲ್ಲಿ ವಿಶೇಷ ಪೂಜೆ, ಶಾಂತಿಪಾಠ, ನಾಮಕರಣೋತ್ಸವ ನಂತರ ಹಳೇಹುಬ್ಬಳ್ಳಿಯ ಪ್ರಾಚಿನ ಶ್ರೀ ಆನಂತನಾಥ ಬಸದಿಯಲ್ಲಿ ಧರ್ಮಧ್ವಜಾರೋಹಣ ಹಾಗೂ ಅಲ್ಲಿಂದಲೇ ಬೆಳಗ್ಗೆ 8 ಗಂಟೆಗೆ ಜಿನಬಿಂಬ ಮತ್ತು ಭಾವಚಿತ್ರ ಸಹಿತ ಭವ್ಯ ಮೆರವಣಿಗೆ ಪ್ರಮುಖ ಬೀದಿಗಳಲ್ಲಿ ಸಂಚರಿಸಲಿದೆ.

ಮೆರವಣಿಗೆಯ ನಂತರ ಮಧ್ಯಾಹ್ನ 1 ಗಂಟೆಗೆ ಶಾಂತಿನಾಥ ಭವನದಲ್ಲಿ ಶಾಂತಿನಾಥ ಮಹಿಳಾ ಸಮಾಜದ ವತಿಯಿಂದ ಮಹಾವೀರ ತೊಟ್ಟಿಲೋತ್ಸವ ಕಾರ್ಯಕ್ರಮ ನಡೆಯುವುದು.

ಅಂದು ಸಂಜೆ 6 ಗಂಟೆಗೆ ವಿವಿಧ ಸ್ಪರ್ಧಾ ವಿಜೇತರಿಗೆ ಬಹುಮಾನ ವಿತರಣೆ ಹಾಗೂ ದಾನಿಗಳ ಸನ್ಮಾನ ಸಮಾರಂಭ ಆಯೋಜಿಸಿದ್ದು, ಡಿಸಿಪಿ ರವಿ ಚಿಕ್ಕನಾಯಕನಹಳ್ಳಿ ಅತಿಥಿಯಾಗಿ ಪಾಲ್ಗೊಳ್ಳುವರು.