ಚಿಕ್ಕಬಳ್ಳಾಪುರ: ಜಿಲ್ಲಾ ಕೇಂದ್ರ ನಗರಿಯ ಬಜೆಟ್ ಸಿದ್ಧತೆ ಕೈಗೊಳ್ಳಲು ನಗರಸಭೆ ಮುಂದಾಗಿದ್ದು ಜನರಲ್ಲಿ ಸಾಕಷ್ಟು ಕೊಡುಗೆಗಳ ನಿರೀಕ್ಷೆಗಳಿವೆ.
ಫೆ.6 ರಂದು ನಗರಸಭಾ ಕಚೇರಿಯ ಸಭಾಂಗಣದಲ್ಲಿ 2025-26 ನೇ ಸಾಲಿನ ಬಜೆಟ್ ತಯಾರಿಕೆಗೆ ಸಂಬಂಧಿಸಿದಂತೆ ಸಾರ್ವಜನಿಕರ ಸಲಹೆಗಳನ್ನು ಪಡೆಯುವ ಉದ್ದೇಶದೊಂದಿಗೆ ಪೂರ್ವ ಸಿದ್ಧತೆ ಚರ್ಚೆಯ ಸಭೆಯನ್ನು ಕೈಗೊಳ್ಳಲಾಗಿದೆ. ಇದರಲ್ಲಿ ನಗರಸಭಾ ಮಾಜಿ ಸದಸ್ಯರು, ವಿವಿಧ ಸಂಘಟನೆಗಳ ಮುಖಂಡರು, ವ್ಯಾಪಾರಿಗಳು ಸೇರಿದಂತೆ ಹಲವರು ನಿರೀಕ್ಷೆಯ ಯೋಜನೆ ರೂಪಿಸಿ, ಅನುದಾನ ಮೀಸಲಿಡಲು ಗಮನ ಸೆಳೆಯಲಿದ್ದಾರೆ. ಪ್ರತಿ ಬಾರಿ ಬಜೆಟ್ ಮಂಡನೆಯ ಸಂದರ್ಭದಲ್ಲಿ ಅಭಿಪ್ರಾಯಗಳನ್ನು ಸಂಗ್ರಹಿಸಲಾಗುತ್ತಿದೆಯಾದರೂ ಮಹತ್ತರವಾದ ಯೋಜನೆಗಳನ್ನು ಅನುಷ್ಠಾನಗೊಳಿಸುವಲ್ಲಿ ವೈಫಲ್ಯವನ್ನು ಹೊಂದಲಾಗಿದೆ. ಕೋಟ್ಯಂತರ ರೂ ವೆಚ್ಚದಲ್ಲಿ ತಜ್ಞರ ಮೂಲಕ ಹಿಂದೆ ರೂಪಿಸಲಾಗಿದ್ದ ಸೂಪರ್ 20 ವಿಜನ್ ಯೋಜನೆಯು ಅರ್ಧಂಬರ್ಧ ಕಾಮಗಾರಿಗಳಲ್ಲಿ ಉಳಿದು ಹೋಗಿದೆ. ಹಲವು ಘೋಷಣೆಯ ಕೆಲಸಗಳು ಪ್ರಾರಂಭವಾಗಿಲ್ಲ. ಕಂದವಾರ ಕೆರೆಯ ವಾಕಿಂಗ್ ಪಾಥ್, ಉದ್ಯಾನ ನಿರ್ಮಾಣದ ಪ್ರಕ್ರಿಯೆಯು ರೂಪುರೇಷೆಗೆ ಅನುಗುಣವಾಗಿ ನಡೆದಿಲ್ಲ. ಅಪ್ಪಯ್ಯನಕುಂಟೆ ಜಾಗದಲ್ಲಿ ಅಪೂರ್ಣ ಹಂತದಲ್ಲಿರುವ ಕಾಮಗಾರಿಯು, ಜಿಲ್ಲಾ ಕೇಂದ್ರದಲ್ಲಿನ ಯುಜಿಡಿ ಚರಂಡಿ ಅವ್ಯವಸ್ಥೆಯು ಸ್ಥಳೀಯ ಜನಪ್ರತಿನಿಧಿಗಳು ಹಾಗೂ ಅಧಿಕಾರಿಗಳ ದೂರದೃಷ್ಟಿ ಹೇಗಿದೆ?ಎಂಬುದಕ್ಕೆ ನಿದರ್ಶನ. ವ್ಯಾಪಕವಾಗಿ ಸರ್ಕಾರಿ ಜಾಗಗಳು ಅಕ್ರಮ ಒತ್ತುವರಿಯಾಗಿವೆ. ಇದರಲ್ಲಿ ಕೆಲ ನಗರಸಭಾ ಸದಸ್ಯರು, ಮಾಜಿ ಸದಸ್ಯರೇ ಮುಂಚೂಣಿಯಲ್ಲಿರುವುದು ದುರದೃಷ್ಟಕರ.
