ಬೆಂಡೆಕಾಯಿ, ಮೂಲಂಗಿ, ಕೋಸು, ಬದನೆಕಾಯಿ, ಶಿರವಾಳ-ಬರದವಳ್ಳಿಯ ಸೌತೇಕಾಯಿ ಹೆಚ್ಚು ಮಾರಾಟವಾಯಿತು. ಮಹಾರಾಷ್ಟ್ರದಿಂದ ಬಂದಿದ್ದ ಟೊಮಾಟೋ ಬೆಲೆ ಹೆಚ್ಚಾಗಿದ್ದರೆ, ಚಿಕ್ಕಮಗಳೂರು ಭಾಗದಿಂದ ಟೊಮಾಟೋ ಕೆಜಿಗೆ 20 ರೂ. ಇತ್ತು. ಇನ್ನು ಹೂ, ಹಣ್ಣು, ಬಾಳೆಕಂಬ, ಕಬ್ಬಿನ ಜಲ್ಲೆ ಮಾರಾಟ ಸಹ ಭರದಿಂದ ಸಾಗಿತು. ಅಲಂಕಾರಿಕಾ ವಸ್ತುಗಳು ಮತ್ತು ಹೂವಿನ ಬೆಲೆ ಕೊಂಚ ದುಬಾರಿಯಾಗಿದ್ದರೂ ಜನ ಖರೀದಿಯಲ್ಲಿ ತೊಡಗಿಕೊಂಡಿದ್ದರು. ಸಾಗರದ ಪೇಟೆ ಗ್ರಾಮೀಣ ಜನರ ಓಡಾಟ, ಖರೀದಿಯಿಂದ ಗಿಜಿಗಿಜಿಗೊಡುತ್ತಿತ್ತ್ತು. ಸಂತೆ ಮಾರುಕಟ್ಟೆಯ ಪಕ್ಕದಲ್ಲೇ ಮಹಿಳಾ ಕಾಲೇಜು ಇರುವುದರಿಂದ ರಸ್ತೆಗಳ ಮೇಲೆ ಎಲ್ಲೆಂದರಲ್ಲಿ ವಾಹನಗಳನ್ನು ನಿಲ್ಲಿಸುತ್ತಿರುವುದರಿಂದ ಸಾರ್ವಜನಿಕರು ಮತ್ತು ವಿದ್ಯಾರ್ಥಿಗಳ ಓಡಾಟಕ್ಕೆ ತೀವ್ರ ತೊಂದರೆ ಉಂಟಾಗಿತ್ತು.
ವರಮಹಾಲಕ್ಷ್ಮೀ ಬಹುಮುಖ್ಯವಾದ ಹಬ್ಬ ಆಗಿರುವುದರಿಂದ ಸಂತೆಯಲ್ಲಿ ತರಕಾರಿ ವ್ಯಾಪಾರ ಚೆನ್ನಾಗಿ ನಡೆದಿದೆ. ನಾವು ಶಿವಮೊಗ್ಗ, ಹೊನ್ನಾಳಿ ಮುಂತಾದ ಕಡೆಗಳಿಂದ ಸೊಪ್ಪು, ತರಕಾರಿ ತಂದು ಮಾರುತ್ತಿದ್ದೇವೆ ಎಂದು ಶಿರಾಳಕೊಪ್ಪ ವ್ಯಾಪಾರಿ ಅಬ್ಬಾಸ್ ಹೇಳಿದರು.
ಸಾಗರದ ಸಂತೆ ಮಾರುಕಟ್ಟೆಗೆ ಜನರು ಬಂದು ಖರೀದಿ ಮಾಡುವುದೇ ಕಷ್ಟವಾಗುತ್ತಿದೆ. ವಾಹನಗಳನ್ನು ಎಲ್ಲೆಂದರಲ್ಲಿ ನಿಲ್ಲಿಸುತ್ತಾರೆ. ಮಹಿಳೆಯರು, ಮಕ್ಕಳು, ವಯೋವೃದ್ಧರು ಓಡಾಡಲು ಸಾಧ್ಯವಾಗದ ಪರಿಸ್ಥಿತಿ ಎದುರಾಗಿದೆ. ಸಂತೆಯಲ್ಲಿ ಮೊಬೈಲ್, ಬೈಕ್ ಮತ್ತು ಪರ್ಸ್ಗಳು ಕಳ್ಳತನವಾಗುತ್ತಿವೆ. ರಕ್ಷಣಾ ಇಲಾಖೆ ಈ ಬಗ್ಗೆ ಅಗತ್ಯ ಕ್ರಮಕೈಗೊಳ್ಳಬೇಕು ಎಂದು ಸಾಗರದ ಗಿರಿರಾಜ್ ಒತ್ತಾಯಿಸಿದರು.
