ಕೈಗಾ ಐದು ಮತ್ತು 6 ನೇ ಘಟಕಕ್ಕೆ ದೇವಕಾರು ಗ್ರಾಮದಲ್ಲಿ ಕಲ್ಲು ಕ್ವಾರಿ

ಕಾಳಿ ಹುಲಿ ಸಂರಕ್ಷಿತ ಅರಣ್ಯ ಪ್ರದೇಶ ವ್ಯಾಪ್ತಿಯ ದೇವಕಾರ ಗ್ರಾಮದ ಸರ್ವೇ ನಂಬರ್ 87 ರಲ್ಲಿ 3.70 ಹೆಕ್ಟೇರ್ ಪ್ರದೇಶವನ್ನು ಕೈಗಾದಲ್ಲಿ ಐದು ಮತ್ತು ಆರನೇ ಘಟಕ ನಿರ್ಮಾಣಕ್ಕಾಗಿ ನೀಡಬಹುದು ಎಂದು ಶಿಫಾರಸು ಮಾಡಲಾಗಿದ್ದು, ಪರಿಸರವಾದಿಗಳು ಅದಕ್ಕೆ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.

ದೇವಕಾರ ಗ್ರಾಮವು ಪರಿಸರ ಸೂಕ್ಷ್ಮ ಪ್ರದೇಶವಾಗಿದೆ. ಅಲ್ಲಿ ಗಣಿಗಾರಿಕೆ ಸಂಪೂರ್ಣ ನಿಷಿದ್ಧವಾಗಿದೆ. ನಿಗಮವು ಅದಕ್ಕೆ ಅಗತ್ಯವಿರುವ ಪರಿಸರ ಅನುಮತಿ ಮತ್ತು ವನ್ಯಜೀವಿ ಅನುಮತಿಯನ್ನು ಸಲ್ಲಿಸಿಲ್ಲ ಎಂದು ಡಿಡಿಜಿಎಫ್ ಎಸ್.ಸೇಂಥಿಲ್ ಅವರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಆದರೆ, ಅನುಮತಿ ನೀಡಬಹುದು ಎಂಬ ಶಿಫಾರಸನ್ನೂ ಮಾಡಿರುವುದು ಅಚ್ಚರಿ ಮೂಡಿಸಿದೆ.

ಬೆಳಗಾವಿ ಮೂಲದ ಪರಿಸರ ಹೋರಾಟಗಾರ ಗಿರಿಧರ ಕುಲಕರ್ಣಿ ಅವರು ಪರಿಸರ ಮಂತ್ರಾಲಯಕ್ಕೆ ಪತ್ರ ಬರೆದು, ಕ್ವಾರಿ ಅನುಮತಿಗೆ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ಕೈಗಾ ಅಣು ವಿದ್ಯುತ್ ಸ್ಥಾವರಕ್ಕಾಗಿ 1994ರಲ್ಲಿ ಪಡೆದ, ಕಾರವಾರ ಡಿಸಿಎಫ್ ಶಿಫಾರಸಿರುವ ಅನುಮತಿಯನ್ನೇ ಮತ್ತೆ ಸಲ್ಲಿಸಲಾಗಿದೆ. ಅರಣ್ಯ, ವನ್ಯಜೀವಿ ಮಂಡಳಿಯ ಅನುಮೋದನೆ ಪಡೆಯದೇ ನೇರವಾಗಿ ಕೇಂದ್ರ ಸರ್ಕಾರಕ್ಕೆ ಪ್ರಾಥಮಿಕ ಅನುಮೋದನೆಗೆ ಸಲ್ಲಿಸಲಾಗಿದೆ. ಇದು ಕಾನೂನಿಗೆ ವಿರುದ್ಧವಾಗಿದೆ.

ಕೈಗಾದಲ್ಲಿ 5 ಮತ್ತು 6 ನೇ ಘಟಕ ನಿರ್ಮಾಣಕ್ಕೆ ನೀಡಿರುವ ಪರಿಸರ ಅನುಮತಿಯ ವ್ಯಾಪ್ತಿಗೆ ಕಲ್ಲು ಕ್ವಾರಿಯೂ ಒಪಪಡುತ್ತದೆ ಎಂದು ಬಿಂಬಿಸಲಾಗುತ್ತಿದೆ. ಅಣು ವಿದ್ಯುತ್ ಘಟಕ ನಿರ್ಮಾಣ ಹಾಗೂ ಗಣಿಗಾರಿಕೆ ಪ್ರತ್ಯೇಕ ಚಟುವಟಿಕೆಗಳಾಗಿವೆ. ಕಲ್ಲು ಗಣಿಗಾರಿಕೆಗೆ ಮಂತ್ರಾಲಯದಿಂದ ಪ್ರತ್ಯೇಕ ಅನುಮತಿ ಪಡೆಯಬೇಕು. ಇದು ಪರಿಸರ ಸೂಕ್ಷ್ಮ ವಲಯವಾಗಿದ್ದು, ಯಾವುದೇ ಕಾರಣಕ್ಕೂ ಪರಿಸರ ಅನುಮತಿ ನೀಡಬಾರದು ಎಂದು ಗಿರಿಧರ ಕುಲಕರ್ಣಿ ಅವರು ಮಂತ್ರಾಲಯಕ್ಕೆ ಮನವಿ ಮಾಡಿದ್ದಾರೆ.

ದೇವಕಾರು ಎಂಬುದು ಹೆಸರೇ ಹೇಳುವಂತೆ ದೇವರ ಭೂಮಿಯಂತಿತ್ತು. ಸುತ್ತಲೂ ದಟ್ಟಾರಣ್ಯ. ನಡುವೆ ದೇವಲೋಕದಿಂದ ಧುಮುಕಿದಂತೆ ಭಾಸವಾಗುವ ಜಲಪಾತ. ಅಲ್ಲಿ ಪರಿಸರ ಪ್ರೀತಿಸುವ ಜನಸಮುದಾಯ, ದೇವಸ್ಥಾನ. ಒಟ್ಟಿನಲ್ಲಿ ಸುಂದರ ಊರು. ಕದ್ರಾ ಅಣೆಕಟ್ಟೆ ಹಾಗೂ ಕೈಗಾ ಅಣು ವಿದ್ಯು ಸ್ಥಾವರಗಳು ಈ ಗ್ರಾಮದ ಜನಜೀವನವನ್ನೇ ಇಲ್ಲವಾಗಿಸಿದವು.

ದೇವಕಾರು ಗ್ರಾಮದಲ್ಲಿ 30 ಕ್ಕೂ ಅಧಿಕ ಕುಟುಂಬಗಳಿದ್ದವು. 90 ಕ್ಕೂ ಹೆಚ್ಚು ಜನಸಂಖ್ಯೆ ಇತ್ತು. ಕದ್ರಾ ಅಣೆಕಟ್ಟೆಯ ನಿರ್ಮಾಣದ ನಂತರ ಊರಿನ ಮೂರು ಭಾಗದಲ್ಲಿ ನೀರು ಬಂದು ನಿಂತಿತ್ತು. ಇನ್ನೊಂದು ಕಡೆ ಹತ್ತಾರು ಕಿಮೀ ನಡೆದರೂ ಒಂದು ಮನೆ ಸಿಗದ ದಟ್ಟಾರಣ್ಯ.ಅದರ ನಡುವೆ ಕಾಲು ಹಾದಿ ಇತ್ತು. ಕೈಗಾ ಅಣು ವಿದ್ಯುತ್ ಸ್ಥಾವರವಾದ ನಂತರ ಆ ದಾರಿಯನ್ನೂ ಬಂದ್ ಮಾಡಲಾಯಿತು. ಇದರಿಂದ ಊರು ಅಕ್ಷರಶಃ ದ್ವೀಪವಾಗಿತ್ತು. ಸುಮಾರು ಎರಡು ದಶಕಗಳಲ್ಲಿ ಗ್ರಾಮಸ್ಥರು ಸೌಕರ್ಯವಿಲ್ಲದೇ ಕಷ್ಟದ ಜೀವನ ನಡೆಸಿದ್ದರು. ಕೊನೆಗೂ ಆಡಳಿತಕ್ಕೆ ಮಣಿದರು, ಐದು ವರ್ಷಗಳ ಹಿಂದೆ ಅಲ್ಪ ಪರಿಹಾರ ಪಡೆದು,ಯಾವುದೇ ಪುನರ್ವಸತಿ ಸೌಲಭ್ಯವಿಲ್ಲದೇ, ಅನಿವಾರ್ಯವಾಗಿ ಊರು ಬಿಟ್ಟರು. ಸದ್ಯ ಇಡೀ ಗ್ರಾಮ ಖಾಲಿಯಾಗಿದೆ. `ಈಗ ಕ್ವಾರಿಯಾಗಿ ಮಾರ್ಪಡುತ್ತಿದೆ ಎಂಬ ಸುದ್ದಿ ಕೇಳಿ ಬೇಸರವಾಯಿತು' ಎಂದು ಗ್ರಾಮದ ರಾಜೇಶ ಮರಾಠಿ ಬೇಸರ ವ್ಯಕ್ತಪಡಿಸಿದರು.