CLEAN: ಗಟಾರ ಸ್ವಚ್ಛತೆ, ದುರಸ್ತಿಗೆ ಕ್ರಮ

ದಾಂಡೇಲಿ: ಕಳೆದ ಒಂದು ವಾರದಿಂದ ಪಟೇಲ್ ವೃತ್ತದ ಹತ್ತಿರ ಸೆಪ್ಟಿಕ್ ಚೇಂಬರ್‌ನಿಂದ ತ್ಯಾಜ್ಯ ನೀರು ಹೊರಬಂದು ರಸ್ತೆಯಿಡಿ ಹರಡಿಕೊಂಡು ಅನೈರ್ಮಲ್ಯ ವಾತಾವರಣ ಸೃಷ್ಟಿಸಿದೆ. (CLEAN) ನಗರಾಡಳಿತ ಸ್ಥಳೀಯ ಗಟಾರದ ಸ್ವಚ್ಛತೆ ಹಾಗೂ ದುರಸ್ತಿ ಕಾರ್ಯಕ್ಕೆ ಮುಂದಾಗಿದ್ದು ಪ್ಲಾಸ್ಟಿಕ್‌ನಿಂದಾದ ಅವಾಂತರ ಅನಾವರಣಗೊಂಡಿದೆ.

ಗಟಾರದಲ್ಲಿ ತ್ಯಾಜ್ಯ ತುಂಬಿ ಹೋಗಿರುವುದರಿಂದ, ಅಲ್ಲಿನ ತ್ಯಾಜ್ಯ ಚೇಂಬರಿಗೆ ಸೇರಿದೆ ಎನ್ನಲಾಗಿದೆ. ಯುಜಿಡಿ ಯೋಜನೆಯ ಲೋಕಾರ್ಪಣೆಯ ಮುನ್ಮವೇ ಸೆಪ್ಟಿಕ್ ಚೇಂಬರ್ ಈ ರೀತಿಯಾದರೆ ಮುಂದೇನು ಎಂಬ ಆತಂಕ ಸಾರ್ವಜನಿಕ ವಲಯದಲ್ಲಿ ಮೂಡಿದೆ. ಹೀಗಾಗಿ ದಾಂಡೇಲಿ ನಗರದಲ್ಲಿ ನಿರ್ಮಿಸಲಾದ ಎಲ್ಲ ಯುಜಿಡಿ ಸೆಪ್ಟಿಕ್ ಚೇಂಬರ್‌ಗಳನ್ನು ನುರಿತ ಇಂಜಿನಿಯರ್‌ಗಳಿಂದ ಪರಿಶೀಲಿಸಿ ಸಂಭಾವ್ಯ ಅನಾಹುತ ತಪ್ಪಿಸಲು ಕ್ರಮ ಕೈಗೊಳ್ಳುವ ಅಗತ್ಯವಿದೆ.

ಹಾಗೆ ನೋಡಿದರೆ ಇಲ್ಲಿಯ ಸೆಪ್ಟಿಕ್ ಚೇಂಬರ್‌ನ ದುರಸ್ತಿಯನ್ನು ಯುಜಿಡಿ ಗುತ್ತಿಗೆ ಸಂಸ್ಥೆಯವರೇ ಮಾಡಬೇಕಿತ್ತು. ಆದರೆ ಕಳೆದ ಒಂದು ವಾರದಿಂದ ಇದ್ದ ಈ ಸಮಸ್ಯೆಗೆ ತಹಸೀಲ್ದಾರ್ ಶೈಲೇಶ ಪರಮಾನಂದ ಹಾಗೂ ಪೌರಾಯುಕ್ತ ವಿವೇಕ ಬನ್ನೆ ಅವರ ನೇತೃತ್ವದಲ್ಲಿ ನಗರಾಡಳಿತವು ಸ್ಥಳೀಯ ಗಟಾರದ ಸ್ವಚ್ಛತೆ ಹಾಗೂ ದುರಸ್ತಿಗೆ ಮುಂದಾಗಿದೆ.

ಸಾರ್ವಜನಿಕರು, ವ್ಯಾಪಾರಸ್ಥರು, ಪ್ಲಾಸ್ಟಿಕ್ ಬಾಟಲಿ ಹಾಗೂ ಪ್ಲಾಸ್ಟಿಕ್ ವಸ್ತುಗಳನ್ನು ಗಟಾರದಲ್ಲಿ ಚೆಲ್ಲುತ್ತಿರುವುದರಿಂದ ಗಟಾರ ತುಂಬಿ ತುಳುಕುವಂಥ ಸ್ಥಿತಿ ತಲುಪುತ್ತದೆ. ದಯವಿಟ್ಟು ಸಾರ್ವಜನಿಕರು ಹಾಗೂ ವ್ಯಾಪಾರಸ್ಥರು ಪ್ರತಿದಿನ ಬರುವ ಕಸ ಸಂಗ್ರಹಕಾರರಿಗೆ ಕಸಗಳನ್ನು ಕೊಟ್ಟು ಸಹಕರಿಸಬೇಕು. ನಾವೆಲ್ಲರೂ ಸ್ವಚ್ಛತೆಯ ಬಗ್ಗೆ ಹೆಚ್ಚು ಜಾಗರೂಕರಾಗಿ ಇರಬೇಕು. ಎಲ್ಲೆಂದರಲ್ಲಿ ತ್ಯಾಜ್ಯವನ್ನು ಚೆಲ್ಲದೇ ನಗರದ ಸ್ವಚ್ಛತೆಗೆ ನಗರಸಭೆ ಹಾಗೂ ತಾಲೂಕು ಆಡಳಿತದ ಜೊತೆ ಎಲ್ಲರೂ ಕೈಜೋಡಿಸಬೇಕು ಎಂದು ತಹಸೀಲ್ದಾರ್ ಶೈಲೇಶ ಪರಮಾನಂದ ಹಾಗೂ ಪೌರಾಯುಕ್ತ ವಿವೇಕ ಬನ್ನೆ ಮನವಿ ಮಾಡಿದರು.