ಹೌದು. ತಾಲೂಕಿನಲ್ಲಿ ಈಗ ಮದುವೆ, ಮುಂಜಿಗಳ ಕಾರ್ಯಕ್ರಮ ಜೋರಾಗಿ ನಡೆಯುತ್ತಿದೆ. ಮದುವೆ, ಮುಂಜಿಗಳಲ್ಲಿ ಪಾಲ್ಗೊಂಡವರಲ್ಲಿ ಈ ಸಮಸ್ಯೆ ಜಾಸ್ತಿ ಆಗಿದೆ. ಆರೋಗ್ಯವಾಗಿದ್ದವರಿಗೂ ರಾತ್ರಿಯ ವೇಳೆ ಇದ್ದಕ್ಕಿದ್ದಂತೆಯೇ ಬೇಧಿ ಆರಂಭವಾಗುವುದು, ಹೊಟ್ಟೆ ತೊಳಸಿದಂತಾಗುವಿಕೆ, ಆಗಾಗ ವಾಂತಿಯ ಲಕ್ಷಣಗಳು ಕಾಣಿಸಿಕೊಂಡಿವೆ. ಮದುವೆ ಮನೆಯ ಊಟ ಮಾಡಿದ ಬಳಿಕ ವಾಂತಿ ಭೇದಿ ಆರಂಭವಾಗಿದೆ ಎಂಬ ಮಾತು ಈಗ ತಾಲೂಕಿನಲ್ಲಿ ಸಾಮಾನ್ಯವಾಗಿದೆ. ಖಾಸಗಿ ವೈದ್ಯರೂ ಸೇರಿದಂತೆ ಶಿರಸಿ ತಾಲೂಕಿನಲ್ಲಿ ಸುಮಾರು 450ಕ್ಕೂ ಅಧಿಕ ವೈದ್ಯರು, ಕ್ಲಿನಿಕ್ಗಳು ಕಾರ್ಯ ನಿರ್ವಹಿಸುತ್ತಿವೆ. ಕಳೆದ ಕೆಲ ದಿನಗಳಿಂದ ಈ ಕ್ಲಿನಿಕ್ಗೆ ಬರುವ ರೋಗಿಗಳಲ್ಲಿ ವಾಂತಿ, ಬೇಧಿ ಪ್ರಕರಣಗಳೇ ಜಾಸ್ತಿ ಆಗಿವೆ. ಪರೀಕ್ಷೆ ನಡೆಸುವ ವೈದ್ಯರು ರೋಗಿಗಳಿಗೆ ಧೈರ್ಯ ತುಂಬಿ ಔಷಧ ಕೊಡುತ್ತಿದ್ದಾರೆ.
