male-calves : ಹೊರೆಯಾಗುತ್ತಿವೆ ಗಂಡು ಕರು

ಕೃತಕ ಗರ್ಭ ಧಾರಣೆಯ ವೇಳೆ ಹೆಣ್ಣುಕರುಗಳು ಮಾತ್ರ ಜನಿಸುವಂತೆ ನೀಡುವ ಸಂಸ್ಕರಿಸಿದ ಸಿಮನ್‌ಗಳು (ಲಿಂಗ ನಿರ್ಧಾರಿತ ವೀರ್ಯ ನಳಿಕೆ) ಕೇವಲ ಕೆಎಂಎಫ್ ಪಶು ವೈದ್ಯರಿಗೆ ಮಾತ್ರ ಪೂರೈಕೆ ಆಗುತ್ತಿದೆ. ಪಶು ಸಂಗೋಪನಾ ಇಲಾಖೆಯ ವೈದ್ಯರಿಗೆ ಈ ಸಿಮನ್‌ಗಳು ಪೂರೈಕೆಯಾಗದ ಕಾರಣ, ಕೆಎಂಎಫ್ ವೈದ್ಯರು ಇಲ್ಲದ ಸ್ಥಳಗಳಲ್ಲಿ ರೈತರು ಸಮಸ್ಯೆ ಎದುರಿಸುವಂತಾಗಿದೆ.

ಜಿಲ್ಲೆಯ ಹೈನುಗಾರಿಕೆ ಈಗ ಬದಲಾಗಿದೆ. ಕೆಲ ದಶಕಗಳ ಹಿಂದೆ ನಾಡ ಆಕಳುಗಳನ್ನು ಕೊಟ್ಟಿಗೆ ತುಂಬ ಕಟ್ಟಿ ಸಾಕುತ್ತಿದ್ದ ದಿನಗಳು ಈಗ ದೂರವಾಗಿದ್ದು, ಹಳ್ಳಿಗಳಲ್ಲಿಯೂ ಜರ್ಸಿ, ಎಚ್‌ಎಫ್‌ನಂತಹ ಸುಧಾರಿತ ತಳಿಗಳನ್ನು ಸಾಕುತ್ತಿದ್ದಾರೆ. ಇಂದಿನ ಮೇವು ವೆಚ್ಛ, ದುಬಾರಿಯಾದ ಹಿಂಡಿ ದರದಿಂದಾಗಿ ಹೈನುಗಾರಿಕೆಯೂ ರೈತರಿಗೆ ಕಠಿಣವಾಗಿದೆ. ಅನೇಕ ರೈತರು ಹೈನುಗಾರಿಕೆಯನ್ನು ತ್ಯಜಿಸಿದ್ದರೆ ಉಳಿದವರು ತಮ್ಮ ಕೊಟ್ಟಿಗೆಯಲ್ಲಿ ಒಂದು ಅಥವಾ ಎರಡು ಆಕಳುಗಳ ಸಾಕುವಿಕೆಗೆ ಮಾತ್ರ ಸೀಮಿತಗೊಳಿಸಿದ್ದಾರೆ. ಇಂತಹ ಸ್ಥಿತಿಯಲ್ಲಿ ಗಂಡು ಕರುಗಳು ( male-calves ) ಹುಟ್ಟಿದರೆ ರೈತರಿಗೆ ನುಂಗಲಾರದ ತುತ್ತಿನಂತಾಗುತ್ತದೆ. ಜಿಲ್ಲೆಯಲ್ಲಿ ಕೃಷಿ ಭೂಮಿಗಳು, ಭತ್ತದ ಗದ್ದೆಗಳೆಲ್ಲ ಅಡಕೆ ತೋಟಗಳಾಗಿ ಈಗ ಬದಲಾಗಿವೆ. ಹೀಗಾಗಿ, ಭೂಮಿ ಹೂಳುವ ಅಗತ್ಯತೆ ಇಲ್ಲದ ಕಾರಣ ಎತ್ತುಗಳ ಬಳಕೆ ಜಿಲ್ಲೆಯಲ್ಲಿ ಬಹುತೇಕ ನಿಂತಿದೆ. ಅಲ್ಲದೇ ಜರ್ಸಿ ಅಥವಾ ಎಚ್‌ಎಫ್ ಗಂಡು ಕರುಗಳು ಕೃಷಿ ಕಾರ್ಯಕ್ಕೆ ಬಳಕೆ ಆಗುವುದಿಲ್ಲ. ಮೇವಿನ ಕೊರತೆಯ ಈ ದಿನಗಳಲ್ಲಿ ರೈತರಿಗೆ ಸಾಕಲೂ ಸಾಧ್ಯವಾಗದೇ, ಕಟುಕರಿಗೂ ಮಾರಾಟ ಮಾಡಲು ಮನಸ್ಸು ಒಪ್ಪದೇ ಕೊಟ್ಟಿಗೆಯಲ್ಲೇ ರೈತರ ನಿರ್ಲಕ್ಷ್ಯದ ನಡುವೆ ಬೆಳೆಯುತ್ತವೆ. ಹೀಗಾಗಿ, ಗಂಡು ಕರು ಹುಟ್ಟಿದರೇ ರೈತರು ಸಮಸ್ಯೆ ಎದುರಿಸುತ್ತಿದ್ದಾರೆ.

ರಾಜ್ಯ ಸರ್ಕಾರ ಕೆಲ ವರ್ಷಗಳಿಂದ ಹೆಣ್ಣು ಕರು ಮಾತ್ರ ಜನಿಸುವ ಮಾದರಿಯಲ್ಲಿ ಸಂಸ್ಕರಿಸಿದ ಸಿಮನ್‌ಗೆ ಸಹಾಯಧನ ನೀಡುತ್ತಿತ್ತು. ಆದರೆ, ಕಳೆದ ಎರಡು ವರ್ಷಗಳಿಂದ ಈ ಜವಾಬ್ದಾರಿಯನ್ನು ಕೆಎಂಎಫ್‌ಗೆ ವಹಿಸಿದೆ. ರೈತರು ಕೆಎಂಎಫ್ ವೈದ್ಯರನ್ನೇ ಕರೆತಂದು ಈ ಕೃತಕ ಗರ್ಭಧಾರಣೆ ಮಾಡಿಸಬೇಕಾಗಿದೆ. ಇದರಿಂದಾಗಿ ಸರ್ಕಾರಿ ಪಶುವೈದ್ಯರು ಕೃತಕ ಗರ್ಭಧಾರಣೆ ನಡೆಸಿದರೆ ಗಂಡು ಕರು ಹುಟ್ಟುವ ಆತಂಕ ಹೈನುಗಾರರಲ್ಲಿ ಉಂಟಾಗಿದೆ.

ಬೇಕಿದೆ ವ್ಯಾಪಕ ಪ್ರಚಾರ

ಸುಧಾರಿತ ತಳಿಗಳ ಗಂಡುಕರುಗಳ ಜನನದಿಂದ ರೈತರು ಅನುಭವಿಸುವ ಸಮಸ್ಯೆ ತಪ್ಪಿಸಲು ರಾಜ್ಯ ಸರ್ಕಾರ ನೀಡುತ್ತಿದ್ದ ಸಹಾಯ ಧನ ಕಳೆದ ಎರಡು ವರ್ಷಗಳ ಹಿಂದಿನವರೆಗೂ ಸರ್ಕಾರಿ ಪಶು ವೈದ್ಯರಿಗೂ ಲಭಿಸುತ್ತಿತ್ತು. ಈ ಸಹಾಯಧನದ ಹೊರತಾಗಿಯೂ ರೈತರು ಪ್ರತಿ ಕೃತಕ ಗರ್ಭ ಧಾರಣೆಗೆ 500ರಿಂದ 600 ರೂ. ನೀಡಬೇಕಿತ್ತು. ಈಗ ಕೆಎಂಎಫ್‌ಗೆ ಈ ಜವಾಬ್ದಾರಿ ವಹಿಸಿದ ಬಳಿಕ ಹಾಲು ಒಕ್ಕೂಟಗಳೂ ತಮ್ಮ ವಂತಿಕೆ ಭರಿಸಿ ರೈತರ ಕೈಗೆಟಕುವ ದರ ನಿಗದಿಪಡಿಸಿವೆ. ಪ್ರತಿ ಕೃತಕ ಗರ್ಭ ಧಾರಣೆಗೆ 265 ರೂ. ಖರ್ಚು ತಗುಲಲಿದೆ ಎಂದು ಕೆಎಂಎಫ್ ದರ ನಿಗದಿಪಡಿಸಿದೆ. ಈ ಮೊತ್ತಕ್ಕೆ ಕರ್ನಾಟಕ ಹಾಲು ಮಹಾಮಂಡಳಿಯಿಂದ 90 ರೂ. ಸಹಾಯಧನ, ಆಯಾ ಹಾಲು ಒಕ್ಕೂಟದಿಂದ 75 ರೂ. ಸಹಾಯಧನ ನೀಡಲಾಗುತ್ತಿದೆ. ರೈತರು ಕೇವಲ 100 ರೂ. ತಮ್ಮ ವಂತಿಕೆ ನೀಡುವ ಮೂಲಕ ತಮ್ಮ ಆಕಳುಗಳಿಗೆ ಲಿಂಗ ಆಧಾರಿತ ಕೃತಕ ಗರ್ಭ ಧಾರಣೆ ಮಾಡಿಸಬಹುದಾಗಿದೆ. ಈ ಕುರಿತಂತೆ ಹೆಚ್ಚಿನ ಪ್ರಚಾರವನ್ನೂ ಕೈಗೊಂಡು ರೈತರಿಗೆ ಮಾಹಿತಿ ನೀಡಲು ಕೆಎಂಎಫ್ ನಿರ್ಧರಿಸಿದೆ. ಈ ಮೂಲಕ ಗಂಡು ಕರುಗಳ ಜನನ ಪ್ರಮಾಣ ಕಡಿಮೆಗೊಳಿಸಿ, ರೈತರ ಹೈನುಗಾರಿಕೆಯ ಆಸಕ್ತಿಯನ್ನು ಹೆಚ್ಚಿಸಲು ಕೆಎಂಎಫ್ ವಿವಿಧ ಕಾರ್ಯ ಯೋಜನೆ ಹಾಕಿಕೊಂಡಿದೆ. ಇದೇ ದರದಲ್ಲಿ ಪಶು ಸಂಗೋಪನಾ ಇಲಾಖೆಯ ವೈದ್ಯರೂ ಕೃತಕ ಗರ್ಭಧಾರಣೆ ನಡೆಸುವಂತಾಗಬೇಕು ಎಂದು ರೈತರು ಆಗ್ರಹಿಸಿದ್ದಾರೆ.

ಲಿಂಗ ನಿರ್ಧಾರಿತ ವೀರ್ಯ ನಳಿಕೆ ಕೃತಕ ಗರ್ಭಧಾರಣೆಗೆ ಸಹಾಯಧನ ಪಶು ಸಂಗೋಪನಾ ಇಲಾಖೆಗೆ ಬರುತ್ತಿಲ್ಲ. ಕೆಎಂಎಫ್ ಮೂಲಕ ಸಹಾಯಧನದ ಪ್ರಯೋಜನವನ್ನು ರೈತರು ಪಡೆಯಬಹುದಾಗಿದೆ.

— ಡಾ. ದಿನೇಶ, ಸಹಾಯಕ ನಿರ್ದೇಶಕರು, ಪಶು ಸಂಗೋಪನಾ ಇಲಾಖೆ ಶಿರಸಿ.