Aghanashini ಅಘನಾಶಿನಿ ಕಣಿವೆಯಲ್ಲಿ ತೀವ್ರವಾಗಲಿ ಹೋರಾಟ

ಸಿದ್ದಾಪುರ: ತಾಲೂಕಿನ ಶ್ರೀ ಮನ್ನೆಲೆಮಾವು ಮಠದಲ್ಲಿ ಶ್ರೀ ಮಾಧವಾನಂದ ಭಾರತೀ ಮಹಾಸ್ವಾಮಿಗಳವರ ಸಾನ್ನಿಧ್ಯದಲ್ಲಿ ಸೋಮವಾರ ಏರ್ಪಡಿಸಿದ್ದ ಬೇಡ್ತಿ-ಅಘನಾಶನಿ ಕೊಳ್ಳ Aghanashini ಸಂರಕ್ಷಣಾ ಸಮಿತಿ ಸಭೆಯಲ್ಲಿ 10 ಪ್ರಮುಖ ನಿರ್ಣಯಗಳನ್ನು ಕೈಗೊಳ್ಳಲಾಯಿತು.

ಶ್ರೀ ಮಾಧವಾನಂದ ಭಾರತೀ ಸ್ವಾಮೀಜಿ ಮಾತನಾಡಿ, ಅಘನಾಶಿನಿ ಕಣಿವೆಯಲ್ಲಿ ಇನ್ನಷ್ಟು ತೀವ್ರವಾಗಿ ಹೋರಾಟ ನಡೆಸಲು ಕರೆ ನೀಡಿ, ಪ್ರತಿ ಗ್ರಾಮದಲ್ಲೂ ದೇವರ ಕಾನು ರಕ್ಷಣಾ ಕಾರ್ಯಕ್ರಮ ನಡೆಸಬೇಕು, ಪಾದಯಾತ್ರೆ ನಡೆಸಬೇಕು. ಸ್ವರ್ಣವಲ್ಲೀ ಶ್ರೀಗಳು ಸೂಚಿಸಿರುವಂತೆ ಪತ್ರ ಚಳವಳಿ, ಬೆಂಗಳೂರಿನಲ್ಲಿ ಪ್ರತಿಭಟನೆ, ರಾಸ್ತಾ ರೋಕೋ ಮತ್ತಿತರ ಹೋರಾಟಗಳನ್ನು ಯಶಸ್ವಿಯಾಗಿ ನಡೆಸೋಣ ಎಂದರು.

ಟಿಎಂಎಸ್ ಅಧ್ಯಕ್ಷ ಆರ್.ಎಂ. ಹೆಗಡೆ ಬಾಳೇಸರ ಮಾತನಾಡಿ, ತಾಲೂಕಿನ ಎಲ್ಲ ಸಹಕಾರಿ ಸಂಘಗಳ ವಾರ್ಷಿಕ ಸಭೆಗಳಲ್ಲಿ ಬೇಡ್ತಿ, ಅಘನಾಶಿನಿ ಯೋಜನೆ ಕೈಬಿಡಲು ನಿರ್ಣಯ ಕೈಗೊಳ್ಳಬೇಕು. ಬೆಂಗಳೂರಿನಲ್ಲಿ ಪ್ರತಿಭಟನೆ, ಮುಖ್ಯಮಂತ್ರಿ ಭೇಟಿ ತುರ್ತಾಗಿ ಆಗಬೇಕು ಎಂದರು.

ಡಾ. ಕೇಶವ ಕೊರ್ಸೇ ಅವರು ವಿಜ್ಞಾನಿಗಳ ವರದಿ ಮಂಡಿಸಿದರು. ಸಭೆಯಲ್ಲಿ ಪಾಲ್ಗೊಂಡಿದ್ದ ಜನತೆ ಜಿಲ್ಲೆಯ ಜನಪ್ರತಿನಿಧಿಗಳು ಒಟ್ಟಾಗಿ ಹೋರಾಟ ನಡೆಸಬೇಕು ಎಂದು ಆಗ್ರಹಿಸಿದರು.

ಸಮಿತಿ ಅಧ್ಯಕ್ಷ ಅನಂತ ಹೆಗಡೆ ಅಶೀಸರ ಬೇಡ್ತಿ-ಅಘನಾಶಿನಿ ಹೋರಾಟದ ಹಾಗೂ ಅದರ ಬೆಳವಣಿಗೆ ಕುರಿತು ಮಾಹಿತಿ ನೀಡಿದರು. ಮಠದ ಅಧ್ಯಕ್ಷ ಜಿ.ಎಂ. ಹೆಗಡೆ ಹೆಗ್ನೂರು, ಗೋಪಾಲಕೃಷ್ಣ ತಂಗಾರಮನೆ, ಹಾಗೂ ಮಹೇಶ ಮುಕ್ರಮನೆ ನಿರ್ವಹಿಸಿದರು.

*ಅಘನಾಶಿನಿ ಅಪ್ಪೇಮಿಡಿ ಪಾದಯಾತ್ರೆ ನದಿ ತೀರದ ಜನಜಾಗೃತಿಗೆ ಕಾರಣವಾಗಿದೆ. ದೆಹಲಿಯಲ್ಲಿ ವಾಣಿಜ್ಯ ಸಚಿವರಿಂದ ಹಿಡಿದು ಸಂಸದರವರೆಗೆ ಅಘನಾಶಿನಿ ಮುಟ್ಟಲು ಪಾದಯಾತ್ರೆ, ಕಾರ್ಯಾಗಾರ.

* ಅಪ್ಪೇಮಿಡಿ ಸಾಂಬಾರು ಬೆಳೆಪಟ್ಟಿ ಸೇರಲಿದೆ.

*ರಾಜ್ಯ ಜೀವವೈವಿಧ್ಯ ಮಂಡಳಿ ಅಘನಾಶಿನಿ ಜೀವ ವೈವಿಧ್ಯ ತಾಣ ಎಂದು ಮಾನ್ಯತೆ ನೀಡಲು ನಿರ್ಧಾರ. ಇದು ಅಘನಾಶಿನಿ ಚಳವಳಿಗೆ ಉತ್ತಮ ಬೆಂಬಲ ನೀಡುವ ಬೆಳವಣಿಗೆಯಾಗಿದೆ.

* ಶಿರಸಿಯಲ್ಲಿ ಆ. 5ರಂದು ಬೇಡ್ತಿ ಅಘನಾಶಿನಿ ಸಭೆ ಕೈಗೊಂಡ ಕಾರವಾರ-ಕರಾವಳಿ ಜಾಗೃತಿ ಅಭಿಯಾನ, ಪತ್ರ ಚಳವಳಿ, ರಾಸ್ತಾರೋಕೋ ನಿರ್ಣಯ ಜಾರಿಗೆ ಎಲ್ಲರ ಪಾಲ್ಗೊಳ್ಳುವಿಕೆ ಬೇಕು.

*ತಾಲೂಕಿನ ಎಲ್ಲ ಸಹಕಾರಿ ಸಂಘಗಳ ವಾರ್ಷಿಕ ಸಭೆಗಳಲ್ಲಿ ಪುನಃ ಬೇಡ್ತಿ-ಅಘನಾಶಿನಿ ಯೋಜನೆಗಳನ್ನು ಕೈಬಿಡುವ ನಿರ್ಣಯ ಮಾಡಬೇಕು.

*ಉ.ಕ. ಜಿಲ್ಲೆಯ ಎಲ್ಲ ಶಾಸಕರು ವಿಧಾನಸಭೆ ಅಧಿವೇಶನದಲ್ಲಿ ‘ಬೇಡ್ತಿ-ಅಘನಾಶಿನಿ ಉಳಿಸಿ’ ಎಂದು ಆಗ್ರಹಿಸಲು ಪುನಃ ನೆನಪಿಸಲಾಗಿದೆ.

*ಬೆಂಗಳೂರಿನಲ್ಲಿ ನಡೆಸುವ ಬೇಡ್ತಿ-ಸತ್ಯಾಗ್ರಹದಲ್ಲಿ ಬೆಂಗಳೂರಿನಲ್ಲಿ ಉದ್ಯೋಗದಲ್ಲಿರುವ ಅಘನಾಶಿನಿ ಕಣಿವೆಯ ಮಣ್ಣಿನ ಮಕ್ಕಳು ಪಾಲ್ಗೊಳ್ಳಲು ವಿಶೇಷ ಗಮನ ನೀಡಬೇಕು.

*ಕ್ಯಾದಗಿ-ಇಟಗಿ-ಸಂತೆಗುಳಿ-ದೊಡ್ಮನೆ ಹಳ್ಳಿಗಳಲ್ಲಿ ಇನ್ನಷ್ಟು ನದಿ ಉಳಿಸಿ ಜಾಗೃತಿ ಸಭೆ ನಡೆಸಬೇಕು.

* ನದಿ ಸಮೀಕ್ಷೆಗೆ ಬರುವ ನೀರಾವರಿ ಅಧಿಕಾರಿಗಳಿಗೆ ಅಹಿಂಸಾತ್ಮಕವಾಗಿ ತಡೆ ಹಾಕಬೇಕು.

* ಎಲ್ಲ ಪಂಚಾಯಿತಿಗಳಿಗೆ ನಮ್ಮ ಮುಖಂಡರು, ಕಾರ್ಯಕರ್ತರು ‘ಅಘನಾಶಿನಿ-ಬೇಡ್ತಿ ಉಳಿಸಿ’ ಮನವಿ ಸಲ್ಲಿಸಿ, ಸರ್ಕಾರಕ್ಕೆ ಒತ್ತಾಯಿಸಬೇಕು.