ದಾಂಡೇಲಿ-ಅಳ್ನಾವರ ರೈಲಿಗೆ ಕೇಂದ್ರ ಸಚಿವ ವಿ. ಸೋಮಣ್ಣ ಚಾಲನೆ train

ನಗರದ ಅಂಬೆವಾಡಿಯ ರೈಲು ನಿಲ್ದಾಣದಲ್ಲಿ ದಾಂಡೇಲಿ-ಅಳ್ನಾವರ ರೈಲು ಸಂಚಾರಕ್ಕೆ ಶನಿವಾರ ಚಾಲನೆ ನೀಡಿ ಅವರು ಮಾತನಾಡಿದರು. ಕೋವಿಡ್ ಕಾರಣಾಂತರದಿಂದ 2020ರಲ್ಲಿ ಸ್ಥಗಿತಗೊಂಡಿದ್ದ ರೈಲು ಸಂಚಾರಕ್ಕೆ ಈಗ ಮರು ಚಾಲನೆ ನೀಡಲಾಗುತ್ತಿದೆ ಎಂದರು.

ಬಿಜೆಪಿಗಿಂತ ಮೊದಲಿದ್ದ ಸರ್ಕಾರದಲ್ಲಿ ಒಂದು ವರ್ಷದಲ್ಲಿ 200 ಇಲೆಕ್ಟ್ರಿಕ್ ಇಂಜಿನ್‌ಗಳು ತಯಾರಾಗುತ್ತಿದ್ದವು. ಆದರೆ, ಮೋದಿ ಸರ್ಕಾರದಲ್ಲಿ ವಷರ್ಕ್ಕೆ 1500ಕ್ಕಿಂತ ಮೇಲ್ಪಟ್ಟು ಇಲೆಕ್ಟ್ರಿಕ್ ಇಂಜಿನ್‌ಗಳು ತಯಾರಾಗುತ್ತಿವೆ ಎಂದರು.

ದಾಂಡೇಲಿ ಅಳ್ನಾವರ ರೈಲು ಪುನರಾರಂಭಕ್ಕೆ ಈ ಭಾಗದ ಶಾಸಕರಾದ ಆರ್.ವಿ. ದೇಶಪಾಂಡೆ ಹಾಗೂ ಸಂಸದರಾದ ವಿಶ್ವೇಶ್ವರ ಹೆಗಡೆ ಕಾಗೇರಿ ಅವರು ಹಲವು ಬಾರಿ ನನ್ನ ಗಮನಕ್ಕೆ ತಂದಿದ್ದರು. ದಾಂಡೇಲಿ ಜನರ ಕನಸು ಈಗ ನನಸಾಗಿದೆ. ದಾಂಡೇಲಿಯಿಂದ 10 ರೂಪಾಯಿಯಲ್ಲಿ ಜನರು ಅಳ್ನಾವರಕ್ಕೆ ಹೋಗಬಹುದು ಎಂದರು.

ಶಾಸಕ ಆರ್.ವಿ. ದೇಶಪಾಂಡೆ ಹಾಗೂ ಸಂಸದ ವಿಶ್ವೇಶ್ವರ ಹೆಗಡೆ ಕಾಗೇರಿ ಅವರ ಮನವಿಯಂತೆ ದಾಂಡೇಲಿಯಿಂದ ಹುಬ್ಬಳ್ಳಿಯವರೆಗೆ ರೈಲು ಸಂಪರ್ಕ ಕೊಡಲು ಪ್ರಯತ್ನಿಸಬೇಕು ಎಂದು ರೈಲ್ವೆ ಅಧಿಕಾರಿಗಳಿಗೆ ಸಚಿವರು ಆದೇಶಿಸಿದರು.

ಶಾಸಕ ಆರ್.ವಿ. ದೇಶಪಾಂಡೆ ಮಾತನಾಡಿ, ದಾಂಡೇಲಿ-ಅಳ್ಳಾವರ ರೈಲು ಮಾರ್ಗಕ್ಕೆ ಇತಿಹಾಸವಿದೆ. ಸಚಿವ ವಿ. ಸೋಮಣ್ಣ ಅವರು ಹಸಿರು ನಿಶಾನೆ ನೀಡಿದ್ದಾರೆ. ಇದು ಸಂತೋಷದ ಸಂಗತಿ, ದಾಂಡೇಲಿ ಅಳ್ನಾವರ ರೈಲು ನಿರಂತರವಾಗಿ ನಡೆಯುತ್ತದೆ. ಅದರಲ್ಲಿ ಯಾವುದೇ ಸಂದೇಹ ಇಲ್ಲ. ದಾಂಡೇಯಿಂದ ಹುಬ್ಬಳ್ಳಿಗೆ ಹಾಗೂ ದಾಂಡೇಯಿಂದ ಬೆಳಗಾವಿಗೆ ಸಂಪರ್ಕವಾಗುವಂತೆ ರೈಲನ್ನು ಓಡಿಸಬೇಕು ಎಂದು ಮನವಿ ಮಾಡಿದರು. ದಾಂಡೇಲಿ ಜನರು ಹೆಚ್ಚಿನ ಸಂಖ್ಯೆಯಲ್ಲಿ ಪ್ರಯಾಣಿಸಬೇಕು ಎಂದರು.

ಸಂಸದ ವಿಶ್ವೇಶ್ವರ ಹೆಗಡೆ ಕಾಗೇರಿ ಮಾತನಾಡಿ, ಅಳ್ಳಾವರ-ದಾಂಡೇಲಿ ನಡುವೆ ಡೆಮು ರೈಲಿಗೆ ಸಚಿವರು ಚಾಲನೆ ನೀಡಿದ್ದು ಅತ್ಯಂತ ಸಂತೋಷದ ಸಂಗತಿಯಾಗಿದೆ. ಡೆಮು ರೈಲು ಸೇವೆಯಿಂದ ಸ್ಥಳೀಯ ನಾಗರಿಕರು, ವಿದ್ಯಾರ್ಥಿಗಳು, ಉದ್ಯೋಗಿಗಳು ಹಾಗೂ ಪ್ರವಾಸಿಗರಿಗೆ ಸುಗಮ, ಸುರಕ್ಷಿತ ಹಾಗೂ ಅಲ್ಪ ವೆಚ್ಚದ ಪ್ರಯಾಣ ಸೌಲಭ್ಯ ಲಭ್ಯವಾಗಲಿದೆ. ಜತೆಗೆ ದಾಂಡೇಲಿ ತಾಲೂಕಿನ ಪ್ರವಾಸೋದ್ಯಮ ಹಾಗೂ ಆರ್ಥಿಕ ಅಭಿವೃದ್ಧಿಗೆ ಇನ್ನಷ್ಟು ಉತ್ತೇಜನ ದೊರೆಯಲಿದೆ ಎಂದರು. 

ಮಾಜಿ ಶಾಸಕಿ ರೂಪಾಲಿ ನಾಯ್ಕ, ಮಾಜಿ ಶಾಸಕ ಸುನೀಲ ಹೆಗಡೆ, ಮಾಜಿ ಎಂಎಲ್‌ಸಿ ಎಸ್.ಎಲ್. ಘೊಟ್ನೆಕರ, ರೈಲ್ವೆ ವ್ಯವಸ್ಥಾಪಕಿ  ಬೇಲಾ ಮೀನಾ, ರೈಲ್ವೆ ಪ್ರಧಾನ ಮುಖ್ಯ ವಾಣಿಜ್ಯ ವ್ಯವಸ್ಥಾಪಕ ಸತ್ಯಪ್ರಕಾಶ ಶಾಸ್ತ್ರಿ, ಆಶಾ ಶೆಟ್ಟಿ, ಕೊಂಕಣ ರೈಲ್ವೆ ಅಧಿಕಾರಿ ಆಶಾ ಶೆಟ್ಟಿ, ವಿವಿಧ ಪಕ್ಷದ ಮುಖಂಡರು, ಸಾರ್ವಜನಿಕರು ಉಪಸ್ಥಿತರಿದ್ದರು.

ಬೆಂಗಳೂರು-ಮಂಗಳೂರು ನಡೆವೆ ವಂದೇ ಭಾರತ ಎಕ್ಸ್‌ಪ್ರೆಸ್ ರೈಲು ಸಂಚಾರಕ್ಕೆ ಯೋಜಿಸಲಾಗಿದ್ದು, ಅದನ್ನು ಕಾರವಾರವರೆಗೆ ವಿಸ್ತರಿಸಲು ಪ್ರಯತ್ನಿಸಲಾಗುವುದು ಎಂದು ರೈಲ್ವೆ ಖಾತೆ ರಾಜ್ಯ ಸಚಿವ ವಿ. ಸೋಮಣ್ಣ ತಿಳಿಸಿದರು. 

ದಾಂಡೇಲಿ-ಅಳ್ನಾವರ ರೈಲನ್ನು ಶೀಘ್ರದಲ್ಲಿ ಹುಬ್ಬಳ್ಳಿವರೆಗೆ ವಿಸ್ತರಿಸಲಾಗುವುದು. 1,700 ಕೋಟಿ ರೂ.ಗಳ ಹುಬ್ಬಳ್ಳಿ-ಅಂಕೋಲಾ ರೈಲ್ವೆ ಯೋಜನೆಗೆ ಶೀಘ್ರದಲ್ಲಿ ಅನುಮತಿ ದೊರೆಯಲಿದೆ ಎಂದರು. 

ಕೇಂದ್ರ ಸರ್ಕಾರದ ಯೋಜನೆಗಳನ್ನು ಪಡೆಯಲು ವಿಶಾಲ ಹೃದಯ ಬೇಕು. ರಾಜ್ಯ ಸರ್ಕಾರದಲ್ಲಿ ಹಣವಿಲ್ಲ. ಇದರಿಂದ ಕೇಂದ್ರದ ರೈಲ್ವೆ ಯೋಜನೆಗಳಿಗೆ ಸ್ಪಂದಿಸುತ್ತಿಲ್ಲ. ಮೈಸೂರು-ಹುಣಸೂರು, ಪಿರಿಯಾಪಟ್ಟಣ-ಕುಶಾಲನಗರ ಮುಂತಾದ ಯೋಜನೆಗಳಿಗೆ ಡಿಪಿಆರ್ ಕಳಿಸಲಾಗಿತ್ತು. ಆದರೆ, ನಮ್ಮ ಬಳಿ ಹಣವಿಲ್ಲ ಎಂದು ಯೋಜನೆಯನ್ನು ರಾಜ್ಯ ಸರ್ಕಾರ ಹಿಂಪಡೆಯಿತು ಎಂದರು.