ಮಹಾಶಿವರಾತ್ರಿ ಮಹೋತ್ಸವ ಶುಭಾರಂಭ Shivaratri

ಗೋಕರ್ಣ: ಇಲ್ಲಿನ ಪುರಾಣ ಖ್ಯಾತ ಆತ್ಮಲಿಂಗ ಸನ್ನಿಧಾನ ಶ್ರೀ ಮಹಾಬಲೇಶ್ವರ ಮಂದಿರದಲ್ಲಿ ಮಾಘ ಕೃಷ್ಣ ನವಮಿ ಬುಧವಾರ ಒಂಭತ್ತು ದಿನಗಳ ಮಹಾಶಿವರಾತ್ರಿ (Shivaratri) ಮಹೋತ್ಸವಕ್ಕೆ ಪ್ರಧಾನ ಅರ್ಚಕ ವೇ. ಅನಂತರಾಜ ಅಡಿ ವೃಷಭ ಧ್ವಜಾರೋಹಣದ ಮೂಲಕ ವಿಧ್ಯುಕ್ತವಾಗಿ ಶುಭಾರಂಭಗೈದರು.

ಇದಕ್ಕೂ ಮುನ್ನ ಪ್ರಾತಃ ಕಾಲದಲ್ಲಿ ಮಂದಿರದ ನಂದಿಗೃಹದಲ್ಲಿ ಮಂದಿರದ ಪ್ರಧಾನ ಅರ್ಚರು, ಉಪಾಧಿವಂತ ವೈದಿಕರು ಮತ್ತು ಪ್ರಧಾನ ಕ್ಷೇತ್ರ ಪುರೋಹಿತರ ದಿವ್ಯ ಉಪಸ್ಥಿತಿಯಲ್ಲಿ ಮಹಾಸಂಕಲ್ಪ, ಶ್ರೀಗಣೇಶ ಪೂಜನ ಮತ್ತಿತರ ಆಗಮೋಕ್ತ ದೈವಿಕ ಕಾರ್ಯಗಳನ್ನು ನೆರವೇರಿಸಲಾಯಿತು.

ಮಹಾಶಿವರಾತ್ರಿ ಸಾಂಗವಾಗಿ ಸಂಪನ್ನವಾಗುವ ನಿಮಿತ್ತ ಪುರಾಣ ಪ್ರಸಿದ್ಧ ಶ್ರೀಮಹಾಗಣಪತಿಗೆ ಪ್ರಥಮ ಪೂಜೆ ಸಲ್ಲಿಸಿ ನಂತರ ಶ್ರೀಪಾರ್ವತಿ ಮಂದಿರದಲ್ಲಿ ಮಹಾಮಂಗಳಾರತಿ ಪ್ರಾರ್ಥನೆ ಸಲ್ಲಿಸಲಾಯಿತು.

ಮಧ್ಯಾಹ್ನ ಆತ್ಮಲಿಂಗಕ್ಕೆ ಮಹಾಪೂಜೆ ಮತ್ತು ಬಲಿಸೇವೆ ನಡೆಯಿತು. ಮಹಾಶಿವರಾತ್ರಿ ಪ್ರಥಮ ದಿನದ ಪ್ರಾರಂಭೋತ್ಸವದಲ್ಲಿ ಮಂದಿರದ ಪ್ರಧಾನ ಅರ್ಚಕರುಗಳಾದ ವೇ.ವಿಶ್ವೇಶ್ವರ ಅಡಿ, ವೇ.ಗಣಪತಿ ಗಜಾನನ ಹಿರೇ, ವೇ.ಅಮೃತೇಶ ಹಿರೇ, ವೇ.ಗಣಪತಿ ಶಿವರಾಮ ಹಿರೇ, ವೇ.ಲಕ್ಷ್ಮೀನಾರಾಯಣ ಅಡಿ, ವೇ.ಸುಬ್ರಹ್ಮಣ್ಯ ಅಡಿ, ಕ್ಷೇತ್ರದ ಪ್ರಧಾನ ಪುರೋಹಿತರಾದ ವೇ.ಉದಯ ಉಪಾಧ್ಯ, ವೇ.ಮಹಾಬಲ ಉಪಾಧ್ಯ, ವೇ.ಪ್ರಭಾಕರ ದೀಕ್ಷಿತ, ವೇ.ಗಜಾನನ ಉಪಾಧ್ಯ, ವೇ.ಉದಯ ಮಯ್ಯರ್, ವೇ.ಗಣೇಶ ಜೋಗಳೇಕರ, ಉಪಾಧಿವಂತ ವೇ.ಸುಬ್ರಹ್ಮಣ್ಯ ಪಂಡಿತ, ಗಣಪತಿ ಪಂಡಿತ ಮತ್ತಿತರ ಪ್ರಮುಖರು ಸಹಯೋಗವಿತ್ತರು. ವ್ಯವಸ್ಥಾಪಕ ಸುಬ್ರಹ್ಮಣ್ಯ ಹೆಗಡೆ ಮತ್ತು ಸಿಬ್ಬಂದಿ ನಿರ್ವಹಿಸಿದರು.

ಸಂಜೆ ಮಹಾಶಿವರಾತ್ರಿಯ ಪ್ರಥಮ ದಿನ ಶ್ರೀಮಹಾಬಲೇಶ್ವರ ಪುರ ಪರ್ಯಟನ ನಿಮಿತ್ತ ಪಂಚ ಮಹಾವಾದ್ಯ ಸಹಿತ ಭವ್ಯ ಮೆರವಣಿಗೆಯಲ್ಲಿ ಪುರಾಣ ಖ್ಯಾತ ಶ್ರೀಪರಶುರಾಮ ಮಂದಿರಕ್ಕೆ ಶ್ರೀದೇವರ ಉತ್ಸವ ಬಿಜಯಂಗೈದು ಅಷ್ಟಾವಧಾನ ಸೇವೆ ಸ್ವೀಕರಿಸಿತು.