ಜ್ಯೋತಿಷಿ ಕಮಲಾಕರ ಹೆಗಡೆ ಹಾಗೂ ಇತರರಿಗೆ ಜೈಲೂಟವೇ ಗತಿ

ಕಾರವಾರ: ಖ್ಯಾತ ಜ್ಯೋತಿಷಿ ಕಮಲಾಕರ ಹೆಗಡೆ ಹಾಗೂ ಸಹಚರರಿಗೆ ಜೈಲೂಟವೇ ಗತಿಯಾಗಿದೆ. ಕೊಲೆ ಪ್ರಕರಣದಲ್ಲಿ ಬಂಽಯಾಗಿರುವ 7 ಜನರಿಗೆ ಶಿರಸಿಯ 1 ನೇ ಹೆಚ್ಚುವರಿ ಜಿಲ್ಲಾ ಮತ್ತು ಸೆಶನ್ಸ್ ನ್ಯಾಯಾಲಯ ಜಾಮೀನು ತಿರಸ್ಕಾರ ಮಾಡಿದೆ.

ಶಿರಸಿಯ ಅವರಗುಪ್ಪಾದ ವಸಂತ ನಾಯ್ಕ ಅವರು ಫೆ.2 ರಂದು ತಮ್ಮ ಮನೆಯಲ್ಲೇ ಚಾಕು ಇರಿತಕ್ಕೆ ಒಳಗಾಗಿ ಕೊಲೆಯಾಗಿದ್ದರು. ಆ ಆರೋಪದ ಮೇಲೆ ಟಿವಿ ವಾಹಿನಿಗಳಲ್ಲಿ ಕಮಲಾಕರ ಗುರುಜೀ ಎಂದು ಖ್ಯಾತರಾಗಿದ್ದ ಕಮಲಾಕರ ಹೆಗಡೆ, ಆತನ ಪ್ರಿಯತಮೆ ಸುಚಿತ್ರಾ ನಾಯ್ಕ, ಆಕೆಯ ತಂದೆ ಲೋಕನಾಥ ನಾಯ್ಕ ಹಾಗೂ ಶಿವಮೊಗ್ಗ ಮೂಲದ ಇತರ 4 ಜನರನ್ನು ಸಿದ್ದಾಪುರ ಪೊಲೀಸರು ಬಂಧಿಸಿ, ನ್ಯಾಯಾಂಗ ಬಂಧನಕ್ಕೊಪ್ಪಿಸಿದ್ದರು.

ಈ ಮೊದಲು ಒಮ್ಮೆ ಕಮಲಾಕರ ಹೆಗಡೆ ಹಾಗೂ ಇತರರು ಜಾಮೀನು ಅರ್ಜಿ ಸಲ್ಲಿಸಿದ್ದರು. ಆಗಲೂ ಶಿರಸಿಯ ನ್ಯಾಯಾಲಯ ಜಾಮೀನು ತಿರಸ್ಕಾರ ಮಾಡಿತ್ತು. ಇತ್ತೀಚೆಗೆ ಪೊಲೀಸರು ತನಿಖೆ ನಡೆಸಿ, ನ್ಯಾಯಾಲಯಕ್ಕೆ ಚಾರ್ಜ್ ಶೀಟ್ ಸಲ್ಲಿಸಿದ ನಂತರ ಎಲ್ಲ 8 ಜನರು ಮತ್ತೊಮ್ಮೆ ಜಾಮೀನು ಅರ್ಜಿ ಸಲ್ಲಿಸಿದ್ದರು. ತಮ್ಮ ಮೇಲಿನ ಆರೋಪಗಳು ಸಾಬೀತಾಗಿಲ್ಲ ಇದರಿಂದ ಜಾಮೀನು ನೀಡುವಂತೆ ಮನವಿ ಮಾಡಿದ್ದರು. ವಾದ, ವಿವಾದಗಳನ್ನು ಆಲಿಸಿದ ಶಿರಸಿಯ 1 ನೇ ಹೆಚ್ಚುವರಿ ಜಿಲ್ಲಾ ನ್ಯಾಯಾಧೀಶೆ ಹೇಮಲತಾ ಅವರು ಜಾಮೀನು ತಿರಸ್ಕಾರ ಮಾಡಿದ್ದಾರೆ. ಸರ್ಕಾರದ ಪರವಾಗಿ ಸರ್ಕಾರಿ ಅಭಿಯೋಜಕ ರಾಜೇಶ ಮಳಗೀಕರ್ ವಾದ ಮಂಡಿಸಿದ್ದರು.

ಶಿವಮೊಗ್ಗ ಹಾಗೂ ಬೆಂಗಳೂರಿನಲ್ಲಿ ಹಲವೆಡೆ ಜ್ಯೋತಿಷ್ಯ ಕೇಂದ್ರ ಹೊಂದಿದ್ದ ಸಿದ್ದಾಪುರ ಮೂಲದ ಕಮಲಾಕರ ಭಟ್ ಹಾಗೂ ಸಿದ್ದಾಪುರದ ಸುಚಿತ್ರ ನಾಯ್ಕ ಅನ್ಯೂನ್ಯವಾಗಿದ್ದರು. ಸುಚಿತ್ರಾ ನಾಯ್ಕ ತನ್ನ ಗಂಡ ಮಹೇಶ ನಾಯ್ಕ ಅವರಿಂದ ದೂರವಾಗಿ ಶಿವಮೊಗ್ಗದಲ್ಲಿ ಕಮಲಾಕರ ಭಟ್ ಕೊಡಿಸಿದ ಮನೆಯಲ್ಲಿ ವಾಸವಿದ್ದಳು. ಜೊತೆ ತನ್ನ ಇಬ್ಬರು ಹೆಣ್ಣು ಮಕ್ಕಳನ್ನೂ ಕರೆದೊಯ್ದಿದ್ದಳು. ಆದರೆ, ಅಪ್ರಾಪ್ತ ಹೆಣ್ಣು ಮಗಳೊಬ್ಬಳು ತಾಯಿಯ ವರ್ತೆನೆಯಿಂದ ಬೇಸತ್ತು ತಂದೆ ಮಹೇಶ ನಾಯ್ಕ ಅವರಿದ್ದಲ್ಲಿಗೆ ಬಂದಿದ್ದಳು. ತಾಯಿ ಹಾಗೂ ಕಮಲಾಕರ ಹೆಗಡೆ ವಿರುದ್ಧ ಮಹೇಶ ನಾಯ್ಕ ಹಾಗೂ ಅವರ ಮಗಳು ಸಿದ್ದಾಪುರ ಠಾಣೆಯಲ್ಲಿ ದೂರು ನೀಡಿದ್ದರು.

ಆದರೆ, ಆ ದೂರು ದಾಖಲಾಗುವ ಮೊದಲೇ ಸುಚಿತ್ರಾ ನಾಯ್ಕ, ಕಮಲಾಕರ ಹೆಗಡೆ ಹಾಗೂ ಇತರರು ಮಹೇಶ ನಾಯ್ಕ ಉಳಿದುಕೊಂಡಿದ್ದ ಅವರ ಅಣ್ಣ ವಸಂತ ನಾಯ್ಕ ಮನೆಗೆ ರಾತ್ರೋ ರಾತ್ರಿ ನುಗ್ಗಿ ಹಲ್ಲೆ ನಡೆಸಿದ್ದರು. ಆ ಗಲಾಟೆಯಲ್ಲಿ ವಸಂತ ನಾಯ್ಕ ಅವರಿಗೆ ಚಾಕು ಇರಿತವಾಗಿದ್ದು, ಅವರು ಮೃತಪಟ್ಟಿದ್ದರು. ಶಿರಸಿ ಡಿವೈಎಸ್‌ಪಿ ಗೀತಾ ಪಾಟೀಲ್ ತನಿಖಾಽಕಾರಿಯಾಗಿ ಆರೊಪಿಗಳನ್ನು ಬಂಧಿಸಿ, ತನಿಖೆ ನಡೆಸಿ ದೋಷಾರೋಪಣಾ ಪಟ್ಟಿ ಸಲ್ಲಿಸಿದ್ದರು.