ಹೌದು, ಶಿರಸಿ ಮಾರಿಕಾಂಬೆ ನಾಡಿನ ಶಕ್ತಿ ದೇವತೆಗಳಲ್ಲಿ ಒಬ್ಬಳು. ದೇವಿಯ ದರ್ಶನಕ್ಕೆ ದೇವಾಲಯದಲ್ಲಿ ಸರತಿ ಸಾಲಿರುತ್ತದೆ. ಜಾತ್ರಾ ದಿನಗಳಲ್ಲಂತೂ ಗದ್ದುಗೆಯಲ್ಲಿ ಕುಳಿತ ಮಾರಿಕಾಂಬೆಯ ದರ್ಶನ ಪಡೆಯಲು ನೂಕು ನುಗ್ಗಲು, ನಾಲ್ಕಾರು ತಾಸುಗಳ ಕಾಲ ಸರತಿ ಸಾಲಿನಲ್ಲಿ ನಿಲ್ಲಬೇಕಾಗುತ್ತದೆ. ಅಂತಹದ್ದರಲ್ಲಿ ದೇವಸ್ಥಾನದ ಧರ್ಮದರ್ಶಿಯಾಗಿ ಮಾರಿಕಾಂಬೆಯ ಸೇವೆ ಮಾಡಲು ಭಕ್ತರಲ್ಲಿ ಆಸಕ್ತಿಯೂ ಸಹಜವಾಗಿ ಇಮ್ಮಡಿಸಿದೆ. ಐದು ವರ್ಷಗಳ ಅವಧಿಯ ಧರ್ಮದರ್ಶಿ ಸ್ಥಾನಕ್ಕೆ ಹಿಂದಿನ ಅವಧಿಗೆ ನಿವೃತ್ತ ವಲಯಾರಣ್ಯಾಧಿಕಾರಿ ರವೀಂದ್ರ ನಾಯ್ಕ ಅಧ್ಯಕ್ಷರಾಗಿ ಸೇವೆ ಸಲ್ಲಿಸಿದ್ದರು. ಬಿಎಸ್ಸೆನ್ನೆಲ್ ನಿವೃತ್ತ ಉದ್ಯೋಗಿ ಸುಧೇಶ ಜೋಗಳೇಕರ್ ಉಪಾಧ್ಯಕ್ಷರಾಗಿದ್ದರು. ಅದರಂತೆ ವಿವಿಧ ರೀತಿಯಲ್ಲಿ ಸಮಾಜಕ್ಕೆ ಸೇವೆ ಸಲ್ಲಿಸಿದ ಸುಧೀರ ಹಂದ್ರಾಳ, ಶಿವಾನಂದ ಶಿವನಂಚಿ ಹಾಗೂ ವತ್ಸಲಾ ಹೆಗಡೆ ಧರ್ಮದರ್ಶಿಗಳಾಗಿ ಕಾರ್ಯ ನಿರ್ವಹಿಸಿದ್ದರು. ಈ ಅವಧಿಯಲ್ಲಿ ಮೂರು ಜಾತ್ರೆಗಳು ನಡೆದು ಉತ್ತಮ ಕಾರ್ಯ ಚಟುವಟಿಕೆಗೆ ಈ ತಂಡ ಪ್ರಶಂಸೆ ಪಡೆದಿತ್ತು. ಈಗ ಅವರ ಅವಧಿ ಮುಕ್ತಾಯಗೊಂಡಿದ್ದು, ಹೊಸ ಆಡಳಿತ ಮಂಡಳಿಗೆ ಕಳೆದ ತಿಂಗಳು ಅರ್ಜಿ ಕರೆಯಲಾಗಿತ್ತು.
