ಐದು ಜನರ ನುರಿತ ತಜ್ಞರ ತಂಡ ಥರ್ಮಲ್ ಡ್ರೋಣ್ನೊಂದಿಗೆ ಚಿರತೆ ಪತ್ತೆ ಕಾರ್ಯಾಚರಣೆಯಲ್ಲಿ ಭಾಗವಹಿಸಿದ್ದು, ಎಂ.ಎಲ್.ಹುಂಡಿ ಬಳಿಯ ಮಲ್ಲಿಕಾರ್ಜುನ ಬೆಟ್ಟದಲ್ಲಿ ಚಿರತೆ ಅಡಗಿ ಕುಳಿತಿರುವ ಬಗ್ಗೆ ನಿಖರ ಮಾಹಿತಿ ನೀಡಿದ್ದಾರೆ. ಬಳಿಕ ಭಾನುವಾರ ಬೆಳಗ್ಗೆಯಿಂದ ಎಲ್ಲ ತಂಡಗಳು ಕಾರ್ಯಾಚರಣೆಗೆ ಇಳಿದಿದ್ದರೂ ಚಿರತೆ ತಾನು ಅಡಗಿ ಕುಳಿತಿರುವ ಪೊದೆಯಿಂದ ಆಚೆ ಬರುತ್ತಿಲ್ಲ. ಜತೆಗೆ ಏಕಾಏಕಿ ಯಾರೊಬ್ಬರೂ ಅದರ ಬಳಿ ಹೋಗಲು ಸಾಧ್ಯವಾಗದ ಹಿನ್ನೆಲೆಯಲ್ಲಿ ಚಿರತೆ ಸೆರೆ ಹಿಡಿಯುವ ಕಾರ್ಯ ವಿಳಂಬವಾಗಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಕಳೆದ ಅಕ್ಟೋಬರ್ 30ರಂದು ಯುವಕ ಹಾಗೂ ಡಿ.1ರಂದು ಯುವತಿಯನ್ನು ಬಲಿ ಪಡೆದಿರುವ ಚಿರತೆ ಚಾಲಾಕಿಯಾಗಿದ್ದು, ತಾನು ಓಡಾಡುವ ಪ್ರದೇಶದ ಒಂದಿಷ್ಟೂ ಸುಳಿವನ್ನು ಬಿಟ್ಟುಕೊಡುತ್ತಿಲ್ಲ. ಹಗಲೆಲ್ಲ ಪೊದೆ, ಕಬ್ಬಿನ ಗದ್ದೆಯಲ್ಲಿ ಅಡಗಿಕೊಳ್ಳುವ ಚಿರತೆ ಸಂಜೆಯಾಗುತ್ತಿದ್ದಂತೆ ತನ್ನ ಚಲನವಲನ ಆರಂಭಿಸುತ್ತಿದೆ. ಪರಿಣಾಮ, ಇಲಾಖೆಗೆ ರಾತ್ರಿಯಲ್ಲಿ ಚಿರತೆ ಸೆರೆ ಹಿಡಿಯುವುದು ಸವಾಲಾಗಿದೆ. ಜತೆಗೆ, ವಿವಿಧ ಭಾಗಗಳಲ್ಲಿ 16 ಬೋನ್ಗಳನ್ನು ಇರಿಸಿದ್ದರೂ ಚಿರತೆ ಅದರ ಬಳಿ ಸುಳಿಯದೆ ತನ್ನ ಚಾಲಾಕಿತನವನ್ನು ಪ್ರದರ್ಶಿಸುತ್ತಿದೆ.
