ರಾಜ್ಯದಲ್ಲಿ 150 ಸರ್ಕಾರಿ ಐಟಿಐಗಳ ಉನ್ನತೀಕರಣ

ಬೆಂಗಳೂರು: ಟಾಟಾ ಟೆಕ್ನಾಲಜೀಸ್ ಮತ್ತು ಇತರ 20 ಖಾಸಗಿ ಉದ್ಯಮಗಳ ಸಹಭಾಗಿತ್ವದಲ್ಲಿ ರಾಜ್ಯದ 150 ಸರ್ಕಾರಿ ಕೈಗಾರಿಕಾ ತರಬೇತಿ ಸಂಸ್ಥೆಗಳನ್ನು (ಐಟಿಐ) ತಂತ್ರಜ್ಞಾನ ಕೇಂದ್ರಗಳನ್ನಾಗಿ ಪರಿವರ್ತಿಸುವ ಕರಾರು ಒಪ್ಪಂದಕ್ಕೆ ಶುಕ್ರವಾರ ಸಹಿ ಹಾಕಲಾಯಿತು. ಸಿಎಂ ಗೃಹ ಕಚೇರಿ ಕೃಷ್ಣಾದಲ್ಲಿ ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಸಮಕ್ಷಮ ಮಹತ್ವಪೂರ್ಣ ಒಡಂಬಡಿಕೆಯಾಯಿತು. ನಂತರ ಸುದ್ದಿಗಾರರ ಜತೆ ಮಾತನಾಡಿದ ಬಿಎಸ್​ವೈ, ದೇಶದಲ್ಲಿ ಮೊದಲ ಬಾರಿಗೆ ರಾಜ್ಯ ಸರ್ಕಾರ ಮತ್ತು ಉದ್ಯಮಗಳು ಪರಸ್ಪರ ಕೈಜೋಡಿಸಿ ವಿನೂತನ ಪ್ರಯತ್ನಕ್ಕೆ ಮುಂದಾಗಿದ್ದು, ಇದೊಂದು ದೊಡ್ಡ ಘೋಷಣೆಯಾಗಿದೆ ಎಂದರು.

ಕೈಗಾರಿಕೆಗಳಿಗೆ ಬೇಕಾದ ನುರಿತ ಮಾನವ ಸಂಪನ್ಮೂಲ ಸೃಜನೆಯಲ್ಲಿ ಗಮನಾರ್ಹ ಹೆಜ್ಜೆಯಾಗಿದ್ದು, ರಾಜ್ಯದ ಯುವಜನತೆಗೆ ಉತ್ಕೃ್ಟ ಹಾಗೂ ಬೇಡಿಕೆಗೆ ತಕ್ಕಂತೆ ಕೌಶಲ್ಯಾಭಿವೃದ್ಧಿ ದೊರೆಯಲಿದೆ. ಈ ಉಪ ಕ್ರಮವು ಉದ್ಯಮ, ಬಂಡವಾಳ ಹೂಡಿಕೆ ಸ್ನೇಹಿ ರಾಜ್ಯವೆಂಬ ಹೆಗ್ಗಳಿಕೆ ನಿದರ್ಶನವಾಗಲಿದೆ ಎಂದು ಪ್ರಶಂಸಿಸಿದರು.

ಬಂಡವಾಳ ಹೂಡಿಕೆ ಮತ್ತು ಉದ್ಯಮ ನೆಲೆಗೊಳಿಸುವುದಕ್ಕೆ ಬೇಕಾದ ವಿನಾಯಿತಿ, ಕಾಯ್ದೆಗಳಲ್ಲಿ ಸುಧಾರಣೆಗಳನ್ನು ತರಲಾಗಿದೆ. ಇದೀಗ ಐಟಿಐಗಳಿಗೆ ಅತ್ಯಾಧುನಿಕತೆ ಸ್ಪರ್ಶ ದೊರೆತು, ತರಬೇತಿ ಪಡೆಯಲಿರುವ ವಿದ್ಯಾರ್ಥಿಗಳು ಕೌಶಲ ಸಾಧಿಸಿ, ಕೈಗಾರಿಕೆಗಳ ಬೇಡಿಕೆಗಳನ್ನು ಸರಿದೂಗಿಸುವ ಸಾಮರ್ಥ್ಯ ಹೊಂದಲಿದ್ದಾರೆ ಎಂದು ಬಿ.ಎಸ್.ಯಡಿಯೂರಪ್ಪ ಆಶಾಭಾವನೆ ವ್ಯಕ್ತಪಡಿಸಿದರು.

ಮುಖ್ಯಾಂಶಗಳು

• ಕೌಶಲ್ಯಾಭಿವೃದ್ಧಿ ಮತ್ತು ಜೀವನೋಪಾಯ ಇಲಾಖೆಯ ಕಾರ್ಯದರ್ಶಿ ಡಾ.ಎಸ್.ಸೆಲ್ವಕುಮಾರ್ ಹಾಗೂ ಟಾಟಾ ಟೆಕ್ನಾಲಜೀಸ್ ಅಧ್ಯಕ್ಷ ಆನಂದ್ ಭಡೆ ಮಹತ್ವಪೂರ್ಣ ಒಪ್ಪಂದಕ್ಕೆ ಸಹಿ
• ಒಡಂಬಡಿಕೆಯ ಅವಧಿ 10 ವರ್ಷ, 9 ತಿಂಗಳು ್ಝ50 ಸರ್ಕಾರಿ ಐಟಿಐಗಳು ಪ್ರಮುಖ ತರಬೇತಿ ಕೇಂದ್ರಗಳಾಗಿ ಪರಿವರ್ತನೆ
• ಒಟ್ಟು ವೆಚ್ಚ 4,636.50 ಕೋಟಿ ರೂ. ್ಝಾಸಗಿ ಕಂಪನಿಗಳಿಂದ ಸಿಎಸ್​ಆರ್ ನಿಧಿಯಡಿ 4,080 ಕೋಟಿ ರೂ. ಮೂಲ ಸವಲತ್ತಿಗೆ 105 ಕೋಟಿ ರೂ. ಸೇರಿ ಸರ್ಕಾರದ ಪಾಲು 657 ಕೋಟಿ ರೂ.
• ಸಹಭಾಗೀ ಕೈಗಾರಿಕೆಗಳ 300 ತರಬೇತಿದಾರರಿಂದ 150 ಐಟಿಐಗಳಲ್ಲಿ ತರಬೇತಿ
• ಮೊದಲ ಹಂತದಲ್ಲಿ ಪೀಣ್ಯ, ಹೊಸೂರು ರಸ್ತೆ, ಬಳ್ಳಾರಿ, ಮೈಸೂರು, ದಾಸ್ತಿಕೊಪ್ಪ ಹಾಗೂ ಶಿಕಾರಿಪುರ ಐಟಿಐಗಳ ವಿಸ್ತರಣೆ