ನಗರದಲ್ಲಿ ಸೋಮವಾರ ಆಯೋಜಿಸಲಾಗಿದ್ದ ಸಮಿತಿ ಸಭೆಯಲ್ಲಿ ಮಾತನಾಡಿದ ಅವರು, ಉತ್ತರ ಕನ್ನಡ ಜಿಲ್ಲೆ ವಿಸ್ತೀರ್ಣದಲ್ಲಿ ಹೆಚ್ಚಿರುವುದು ಮತ್ತು ಜಿಲ್ಲಾ ಕೇಂದ್ರ ಒಂದು ಮೂಲೆಯಲ್ಲಿರುವುದು ಸಮಸ್ಯೆ ಆಗಿದೆ. ಇದರಿಂದಾಗಿ ಅಧಿಕಾರಿಗಳಿಗೆ ಕಾರವಾರಕ್ಕೆ ಮೀಟಿಂಗ್ಗೆ ಹೋಗಿ ಬರುವುದರಲ್ಲೇ ಸಮಯ ಹಿಡಿಯುತ್ತಿದೆ. ಪ್ರತಿ ದಿನ ಒಂದಿಲ್ಲೊಂದು ಅಧಿಕಾರಿಗಳು ಕಾರವಾರಕ್ಕೆ ತೆರಳಿದ್ದಾರೆ ಎಂಬ ಮಾತುಗಳು ಪ್ರತಿ ಕಚೇರಿಯಲ್ಲೂ ಕೇಳಿಬರುವಂತಾಗಿದೆ. ಪ್ರತಿ ತಿಂಗಳಿಗೆ ಕಾರವಾರಕ್ಕೆ ತೆರಳುವ ಅಧಿಕಾರಿಗಳ ಡೀಸೆಲ್ ಖರ್ಚು ಲಕ್ಷಾಂತರ ರೂ. ದಾಟುತ್ತಿದೆ. ಶಿರಸಿಯ ಜೈಲನ್ನೂ ಕಾರವಾರಕ್ಕೆ ವರ್ಗಾಯಿಸಿದ್ದರಿಂದ ಕೈದಿಗಳನ್ನು ನ್ಯಾಯಾಲಯಕ್ಕೆ ಕರೆತರಲು ಪೊಲೀಸ್ ಇಲಾಖೆ ಲಕ್ಷಾಂತರ ರೂ. ಖರ್ಚು ಮಾಡಬೇಕಾದ ಸ್ಥಿತಿ ಇದೆ. ಈ ಮೊದಲು ಶಿಕ್ಷಣ ವ್ಯವಸ್ಥೆಯಲ್ಲೂ ಅಧಿಕಾರಿಗಳು ಇದೇ ರೀತಿ ಓಡಾಡಬೇಕಿತ್ತು. ಈಗ ಶಿರಸಿ ಪ್ರತ್ಯೇಕ ಶೈಕ್ಷಣಿಕ ಜಿಲ್ಲೆ ಆಗಿದ್ದರಿಂದ ಈ ಓಡಾಟ ಸ್ಥಗಿತಗೊಂಡಿದೆ. ಇದೇ ರೀತಿ ಜಿಲ್ಲೆಯೂ ಆಡಳಿತಾತ್ಮಕವಾಗಿ ಪ್ರತ್ಯೇಕಗೊಳ್ಳಬೇಕು ಎಂದರು.
