ರಸ್ತೆಗೆ ಮುತ್ತಿಗೆ ಹಾಕಿದ ಗಿಡ-ಗಂಟಿ...!

ವಾರ್ಡ್​ ಸಂಪರ್ಕದ ಮಾರ್ಗಗಳಲ್ಲಿ ಸಮಸ್ಯೆ

ವಿದ್ಯುತ್​ ಕಂಬ ಏರುತ್ತಿರುವ ಬಳ್ಳಿಗಳು

ಪ್ರಶಾಂತ ಭಾಗ್ವತ ಉಡುಪಿ

ನಗರದ ಮುಖ್ಯ ರಸ್ತೆಯಿಂದ ವಿವಿಧ ವಾರ್ಡ್​ಗಳಿಗೆ ಸಂಪರ್ಕ ಮಾಡುವ ರಸ್ತೆಗಳ ಅಕ್ಕ-ಪಕ್ಕದಲ್ಲಿ ವಿಪುಲವಾಗಿ ಅನಗತ್ಯ ಗಿಡ-ಗಂಟಿ ಬೆಳೆದಿದ್ದು, ಮಾರ್ಗವನ್ನೂ ಕಿರಿದಾಗಿಸಿದೆ.

ವಾರ್ಡ್​ ಸಂಪರ್ಕದ ರಸ್ತೆಗಳಾಗಿದ್ದರಿಂದ ಅಗಲ ಕಡಿಮೆ ಇದ್ದು, ಅಲ್ಲಿಯೇ ಗಿಡ-ಗಂಟಿ ಬೆಳೆದುಕೊಂಡಿದ್ದರಿಂದ ಸುಗಮ ಸಂಚಾರಕ್ಕೂ ತೊಡಕಾಗಿದೆ. ಆಟೋ ಅಥವಾ ಕಾರುಗಳು ಎದುರು-ಬದುರು ಬಂದರೆ ಸಾಗಿ ಹೋಗಲೂ ಸಮಸ್ಯೆಯಾಗುತ್ತಿದೆ.

ತಂತಿಗೆ ಸುತ್ತಿಕೊಂಡ ಬಳ್ಳಿ

ಗಿಡ-ಗಂಟಿಗಳ ನಡುವೆಯೇ ಹುಟ್ಟಿಕೊಂಡ ವಿವಿಧ ಬಗೆಯ ಬಳ್ಳಿಗಳೂ ಸಹ ಅಲ್ಲಿರುವ ಸಣ್ಣ-ಪುಟ್ಟ ಮರ ಹಾಗೂ ವಿದ್ಯುತ್​ ಕಂಬಗಳನ್ನೂ ಆವರಿಸಿ ಬೆಳೆಯತೊಡಗಿದೆ. ವಿದ್ಯುತ್​ ತಂತಿಗಳಿಗೆ ಸುತ್ತಿಕೊಳ್ಳುತ್ತ ಮುಂದೆ ಬೆಳೆಯುತ್ತಲೇ ಸಾಗುತ್ತಿದೆ. ಇದು ಮೆಸ್ಕಾಂನವರಿಗೂ ತಲೆನೋವಾಗಿ ಪರಿಣಮಿಸಿದೆ.

ಅಧಿಕಾರಿಗಳೇ ಇತ್ತ ನೋಡಿ

ವಾರ್ಡ್​ಗಳಲ್ಲಿರುವ ಜನರು ನಗರಸಭೆಯ ನಿರ್ಲಕ್ಷ್ಯಕ್ಕೆ ಅಸಮಾಧಾನ ವ್ಯಕ್ತಪಡಿಸುತ್ತಿದ್ದಾರೆ. ಅನೇಕ ಕಡೆ ಮರಗಳೂ ಅಪಾಯಕಾರಿಯಾಗಿ ರಸ್ತೆಗೆ ಬಾಗಿಕೊಂಡಿವೆ. ಅಧಿಕಾರಿಗಳು ಹಾಗೂ ಆಯಾ ವಾರ್ಡ್​ನ ಸದಸ್ಯರು ಇನ್ನೂ ಅನಗತ್ಯ ವಿಳಂಬ ಮಾಡದೆ, ಅನಗತ್ಯವಾಗಿ ಬೆಳೆಯುತ್ತಿರುವ ಗಿಡ-ಗಂಟಿ ತೆರವು ಮಾಡಲು ಕ್ರಮ ಕೈಗೊಳ್ಳಬೇಕೆಂದು ಜನರು ಒತ್ತಾಯಿಸಿದ್ದಾರೆ.

ರಸ್ತೆಗಳಲ್ಲೂ ಹೆಚ್ಚುತ್ತಿವೆ ಹೊಂಡ

ಅನೇಕ ವಾರ್ಡ್​ಗಳ ಸಂಪರ್ಕ ರಸ್ತೆಯೂ ಹದಗೆಟ್ಟಿದೆ. ಮಾರ್ಗದ ಅಲ್ಲಲ್ಲಿ ಬೃಹತ್​ ಹೊಂಡಗಳು ಉಂಟಾಗಿದ್ದು, ಸಂಚಾರಕ್ಕೆ ತೊಡಕಾಗಿದೆ. ಮಳೆಗಾಲದ ಮೊದಲು ವಿವಿಧೆಡೆ ರಸ್ತೆಯ ಹೊಂಡಗಳಿಗೆ ತೇಪೆ ಹಾಕಲಾಗಿತ್ತು. ನಿರಂತರ ಮಳೆಯಿಂದಾಗಿ ತೇಪೆಗಳೆಲ್ಲಾ ಎದ್ದು ಮತ್ತೆ ರಸ್ತೆ ಹೊಂಡಮಯವಾಗಿದೆ.