ಕದಳೀವನದಲ್ಲಿ ಕೃಷ್ಣಲೋಕ ಅನಾವರಣ - ಕಲ್ಕೂರ ಪ್ರತಿಷ್ಠಾನ ಆಯೋಜಿಸಿದ ರಾಷ್ಟ್ರೀಯ ಮಕ್ಕಳ ಉತ್ಸವ

ಮಂಗಳೂರು: ಅಮ್ಮನ ಮಡಿಲಲ್ಲಿ ಮಲಗಿರುವ, ಅಳುವ, ನಗುವ ಬೆಣ್ಣೆ ಮೆಲ್ಲುವ ಮುದ್ದುಕೃಷ್ಣರು... ಕಟ್ಟಿದ ವೇಷ ಕಿರಿಕಿರಿಯಾಗಿ ಕೊಸರಾಡುವ ತುಂಟ ಕೃಷ್ಣರು... ಮಾತೆಯ ಸೆರಗು ಹಿಡಿದು ಅತ್ತಿಂದಿತ್ತ ಓಡಾಡುವ ಕಿಶೋರ ಕೃಷ್ಣರು... ರಾಧೆಯೊಂದಿಗೆ ನೃತ್ಯ ಮಾಡುವ ರಾಧಾಕೃಷ್ಣ ಹೀಗೆ ಎಲ್ಲಿ ನೋಡಿದರೂ ಕೃಷ್ಣರೇ..

ಇದು ಭಾನುವಾರ ಮಂಗಳೂರಿನ ಕದ್ರಿ ಶ್ರೀ ಮಂಜುನಾಥ ದೇವಸ್ಥಾನದ ಆವರಣದಲ್ಲಿ ಕಂಡುಬಂದ ದೃಶ್ಯ. ಕಲ್ಕೂರ ಪ್ರತಿಷ್ಠಾನ ಆಯೋಜಿಸಿದ ರಾಷ್ಟ್ರೀಯ ಮಕ್ಕಳ ಉತ್ಸವ ಶ್ರೀಕೃಷ್ಣ ವೇಷ ಸ್ಪರ್ಧೆಯಲ್ಲಿ ದೇವಸ್ಥಾನದ ಆವರಣ ಅಕ್ಷರಶಃ ನಂದಗೋಕುಲವಾಗಿ ಬದಲಾಗಿತ್ತು. ಮುಗ್ಧ ಮುಖದ ಮುದ್ದು ಮಕ್ಕಳು ಶ್ರೀಕೃಷ್ಣನ ಬಾಲಲೀಲೆಗಳ ವಿರಾಟ್ ವೈಭವ ತೆರೆದಿಟ್ಟರು. ಸಾವಿರಾರು ಜನ ಶ್ರೀಕೃಷ್ಣನ ಬಾಲಲೀಲೆ ವೀಕ್ಷಿಸಿ ಸಂತಸಪಟ್ಟರು. ಬೆಳಗ್ಗೆಯಿಂದ ರಾತ್ರಿವರೆಗೆ ವಿವಿಧ ಸ್ಪರ್ಧೆಗಳು ಇಡೀ ಕದ್ರಿ ಪರಿಸರವನ್ನು ಶ್ರೀಕೃಷ್ಣಮಯವಾಗಿಸಿತು. ಸುಮಾರು 2 ಸಾವಿರಕ್ಕೂ ಅಧಿಕ ಮಂದಿ ಮಕ್ಕಳು ಕೃಷ್ಣ ವೇಷ ಧರಿಸಿ ಸ್ಪರ್ಧೆಯಲ್ಲಿ ಭಾಗವಹಿಸಿದ್ದರು.

ಬೆಳಗ್ಗೆ 9ರಿಂದ ರಾತ್ರಿ 9ರ ತನಕ ವಿವಿಧ ಸ್ಪರ್ಧೆಗಳನ್ನು 43 ವಿಭಾಗಗಳಲ್ಲಿ ದೇವಳದ ಆವರಣದ 9 ವೇದಿಕೆಗಳಲ್ಲಿ ಏಕಕಾಲಕ್ಕೆ ನಡೆಯಿತು. ವಿಜೇತರಿಗೆ ಪ್ರಥಮ, ದ್ವಿತೀಯ ಹಾಗೂ ತೃತೀಯ ಬಹುಮಾನ ವಿತರಿಸಲಾಯಿತು. ಎಲ್ಲ ಸ್ಪರ್ಧಾಳುಗಳಿಗೂ ಉಡುಪಿ ಕಡಗೋಲು ಶ್ರೀ ಕೃಷ್ಣನ ಪಂಚಲೋಹದ ಆಕರ್ಷಕ ವಿಗ್ರಹ, ಶ್ರೀಕೃಷ್ಣ ಚರಿತ್ರೆ ಪುಸ್ತಕ, ಕದ್ರಿ ಶ್ರೀ ಮಂಜುನಾಥ ದೇವರ ಭಾವಚಿತ್ರ, ಭಗವದ್ಗೀತೆಯ ಪ್ರತಿ, ಪ್ರಶಂಸಾಪತ್ರ ವಿತರಿಸಲಾಯಿತು.

ಸ್ಪರ್ಧಿಗಳ ಜತೆ ಅವರ ಕುಟುಂಬಸ್ಥರೂ ಭಾಗವಹಿಸಿ ಸಂಭ್ರಮಿಸಿದರು. ಮುದ್ದು ಕೃಷ್ಣ, ಕಂದ ಕೃಷ್ಣ, ತುಂಟ ಕೃಷ್ಣ, ಬಾಲಕೃಷ್ಣ, ಕಿಶೋರ ಕೃಷ್ಣ, ಶ್ರೀ ಕೃಷ್ಣ ಮೊದಲಾದ ಸ್ಪರ್ಧೆಗಳಲ್ಲಿ ಪುಟಾಣಿಗಳು ಭಾಗವಹಿಸಿದರು. ಯಶೋದೆ ಕೃಷ್ಣ, ವಸುದೇವ ಕೃಷ್ಣ, ರಾಧಾಕೃಷ್ಣ, ಯಕ್ಷ ಕೃಷ್ಣ ವೇಷಧಾರಿಗಳು ಪ್ರಸ್ತುತ ಪಡಿಸಿದ ಕೃಷ್ಣನ ಲೀಲೆಗಳು ಕಣ್ಮನ ತಣಿಸಿತು.