ವಿಜಯವಾಣಿ ಸುದ್ದಿಜಾಲ ತೂಬಗೆರೆ
ಲಕ್ಷಾಂತರ ರೂಪಾಯಿ ವ್ಯಯಿಸಿ, ಪ್ರಾಣಿಗಳಿಂದ ಹಗಲು ರಾತ್ರಿ ಬೆಳೆ ರಕ್ಷಣೆ ಮಾಡಿ ಸಲಿಗಾಗಿ ಕಾದು ಕುಳಿತ ರೈತನಿಗೆ ಕಳಪೆಮಟ್ಟದ ಬೀಜದಿಂದ ಶೂನ್ಯ ಬೆಳೆ ಸಿಕ್ಕಿರುವುದು ಆಕ್ರೋಶಕ್ಕೆ ಕಾರಣವಾಗಿದೆ.
ದೊಡ್ಡಬಳ್ಳಾಪುರ ತಾಲೂಕಿನ ತೂಬಗೆರೆ ಹೋಬಳಿಯ ತುರುವನಹಳ್ಳಿ ವಾಸುದೇವ್ ಎಂಬ ರೈತ ತನ್ನ 3ಎಕರೆ ಜಮೀನಿನಲ್ಲಿ ಮುಸುಕಿನ ಜೋಳ ಬಿತ್ತನೆ ಮಾಡಿದ್ದಾರೆ. ಮಳೆ ನಂತರ ಎತ್ತರ ಬೆಳೆದ ಜೋಳದಲ್ಲಿ ತೆನೆ ಬಂದರೂ ಕಾಳು ಕಟ್ಟದಿರುವುದು ಬೆಳಕಿಗೆ ಬಂದಿದೆ.
ಕಳೆದ 3 ತಿಂಗಳ ಹಿಂದೆ ತೂಬಗೆರೆಯ ಬಿತ್ತನೆ ಬೀಜ ಮಾರಾಟ ಅಂಗಡಿಯಲ್ಲಿ ಹೈದರಾಬಾದ್ ಸೀಡ್ಸ್-8199 ಮುಸುಕಿನ ಜೋಳದ ಬಿತ್ತನೆ ಬೀಜ ತಂದು ಬಿತ್ತಿದ್ದರು. ಒಂದು ಜೋಳದ ಕಡ್ಡಿಯೊಳಗೆ ಒಂದರಿಂದ ಎರಡು ತೆನೆ ಬರಬೇಕು. ಆದ್ರೆ, ಈ ಬಿತ್ತನೆ ಬೀಜದಲ್ಲಿ ಒಂದು ಕಡ್ಡಿಗೆ 4-5 ತೆನೆ ಬಂದಿವೆ. ಬಂದಿರುವ ತೆನೆಯಲ್ಲೂ ಕಾಳುಗಳು ಇಲ್ಲ. ಲಕ್ಷಾಂತರ ರೂ.ಬಂಡವಾಳ ಹಾಕಿ ಬೆಳೆದ ರೈತನಿಗೆ ಕೈಗೆ ಬಂದ ತುತ್ತು ಬಾಯಿಗೆ ಬಾರದಂತಾಗಿದೆ.
