ಮೂರು ತಿಂಗಳಾದರೂ ಮುಗಿಯದ ಕಾಮಗಾರಿ

ಲಕ್ಷ್ಮೇಶ್ವರ: ಕೈಗಾ-ಇಳಕಲ್ ರಾಜ್ಯ ಹೆದ್ದಾರಿಯ ಪಟ್ಟಣದಿಂದ ಅಗಡಿ ಸನ್​ರೈಸ್ ಆಸ್ಪತ್ರೆವರೆಗಿನ 3.5 ಕಿ.ಮೀ ರಸ್ತೆ ದುರಸ್ತಿಗೆ ಮೇಲ್ಪದರ ಅಗೆದು 3 ತಿಂಗಳಾದರೂ ಕಾಮಗಾರಿ ಪ್ರಾರಂಭಿಸಿಲ್ಲ. ನಿತ್ಯ ವಾಹನ ಸಂಚಾರದಿಂದ ಏಳುವ ಧೂಳಿನ ಗೋಳಿಗೆ ಜನ ಹೈರಾಣಾಗಿದ್ದಾರೆ.

ಕರ್ನಾಟಕ ರಸ್ತೆ ಅಭಿವೃದ್ಧಿ ನಿಗಮ (ಕೆಆರ್​ಡಿಸಿಎಲ್) ದಿಂದ 23 ಕೋಟಿ ರೂ. ಅನುದಾನದಲ್ಲಿ ಮಂಗಸೂಳಿ-ಲಕ್ಷ್ಮೇಶ್ವರ ಮತ್ತು ಕೈಗಾ-ಇಳಕಲ್​ನ ಆಯ್ದ ಭಾಗದ ಅಂದಾಜು 10 ಕಿ.ಮೀ ರಸ್ತೆ ಅಭಿವೃದ್ಧಿ ಮಾಡುವುದಾಗಿದೆ. ಇದರಲ್ಲಿ ಈಗಾಗಲೇ ಹುಬ್ಬಳ್ಳಿಯಿಂದ ಲಕ್ಷ್ಮೇಶ್ವರವರೆಗಿನ ಅಂದಾಜು 6.5 ಕಿ.ಮೀ ರಸ್ತೆಯನ್ನು ಅಲ್ಲಲ್ಲಿ ರೀ-ಸರ್ಪೆಸಿಂಗ್ ಮಾಡಲಾಗಿದೆ. ಆದರೆ, ಲಕ್ಷ್ಮೇಶ್ವರದಿಂದ ಅಗಡಿ ಸನ್​ರೈಸ್ ಆಸ್ಪತ್ರೆವರೆಗಿನ ರಾಜ್ಯ ಹೆದ್ದಾರಿ ಸಂಪೂರ್ಣ ಹಾಳಾಗಿದ್ದರಿಂದ ರೀಸರ್ಪೆಸಿಂಗ್ ಬದಲಾಗಿ ರೀ-ಕನ್ಸ್​ಟ್ರಕ್ಷನ್ ಮಾಡುವ ಉದ್ದೇಶದಿಂದ ಮೂರು ತಿಂಗಳ ಹಿಂದೆಯೇ ಅಲ್ಲಲ್ಲಿ ರಸ್ತೆ ಮೇಲ್ಪದರ ತೆಗೆದು ಜಿಎಸ್​ಪಿ ಹಾಕಿ ಕೈ ಬಿಡಲಾಗಿದೆ. ನಿತ್ಯ ರಸ್ತೆ ಧೂಳಿನಿಂದ ಕೂಡಿದೆ. ಈ ಮಾರ್ಗವಾಗಿ ಸಂಚರಿಸುವ ನಾಗರಿಕರು, ಅಗಡಿ ಇಂಜಿನಿಯರಿಂಗ್ ಕಾಲೇಜಿನ ಸಾವಿರಾರು ವಿದ್ಯಾರ್ಥಿಗಳು, ಆಸ್ಪತ್ರೆಗೆ ಬರುವ ರೋಗಿಗಳು, ಮುರಾರ್ಜಿ ಶಾಲೆ ವಿದ್ಯಾರ್ಥಿಗಳು ಧೂಳಿನ ಮಜ್ಜನದಿಂದ ಬೇಸತ್ತಿದ್ದಾರೆ. ಮಳೆಯೂ ಇಲ್ಲ ಧೂಳು ನಿಯಂತ್ರಣಕ್ಕಾಗಿ ನೀರನ್ನೂ ಹಾಕುವುದಿಲ್ಲ. ಪ್ರಯಾಣಿಕರು ಲಾರಿ, ಟಿಪ್ಪರ್, ಬಸ್​ಗಳು ಎಬ್ಬಿಸುವ ಧೂಳಿನಲ್ಲಿ ಸಿಕ್ಕು ನರಕಯಾತನೆ ಅನುಭವಿಸುತ್ತಿದ್ದಾರೆ.