ಜಿಲ್ಲೆಯ ಐದು ತಾಲೂಕುಗಳಲ್ಲಿ ಒಟ್ಟು 83 ಕುಡಿವ ನೀರಿನ ಕೆರೆಗಳನ್ನು ನಿರ್ಮಿಸಲಾಗಿದೆ. ಸಿರಗುಪ್ಪ ತಾಲೂಕಿನ ಇಬ್ರಾಹಿಂಪುರ, ಮುದ್ದಟನೂರು, ನಡುವಿ, ದೇಶನೂರು ಹಾಗೂ ಕಂಪ್ಲಿ ತಾಲೂಕಿನ ರಾಮಸಾಗರ, ಬುಕ್ಕಸಾಗರ ಮತ್ತು ಸಣಾಪುರ ಸೇರಿ ಒಟ್ಟು ಏಳೂ ಗ್ರಾಮಗಳಿಗೆ ನೇರವಾಗಿ ನದಿಯಿಂದ ನೀರು ಪಂಪ್ ಮಾಡಿ ಕುಡಿಯಲು ಸರಬರಾಜು ಮಾಡಲಾಗುತ್ತಿದೆ. ಇನ್ನೂ ಎಚ್ಎಲ್ಸಿ ಕಾಲುವೆಯಿಂದ ಹದಿಮೂರು ಮತ್ತು ಎಲ್ಎಲ್ಸಿಯಿಂದ ಆರವತ್ತು ಕೆರೆಗಳು ಹಾಗೂ ಸಂಡೂರಿನ ಒಂದು ಕೆರೆಗೆ ನಾರಿಹಳ್ಳದಿಂದ ನೀರು ಹರಿಸಲಾಗುವುದು. ಪ್ರತಿ ಕೆರೆಗಳಲ್ಲಿ ಸ್ಲೊ ಸೆಲ್ಫ್ ಫಿಲ್ಟರ್(ಎಸ್ಎಸ್ಎಫ್) ಹಾಗೂ ಪ್ರೆಶರ್ ಫಿಲ್ಟರ್ (ಪಿಎಫ್) ಗಳಿಂದ ಶುದ್ಧಿಕರಿಸಿ ಬಿಡಬೇಕು. ಆದರೆ, ಕಳೆದ ಹಲವು ವರ್ಷಗಳ ಹಿಂದಯೇ ಅಳವಡಿಸಿರುವ ಈ ಯಂತ್ರಗಳು ಬಹುತೇಕ ಹಾಳಾಗಿದ್ದು ಕೆಲವು ಕೆಟ್ಟು ನಿಂತಿವೆ. ಆದ್ದರಿಂದ, ಹಲವು ಕೆರೆಗಳಿಂದ ಶುದ್ಧಿಕರಿಸಿದೆ ನೀರು ಹರಿಸುತ್ತಿರುವುದರಿಂದ ಮನೆಯಲ್ಲಿ ಒಂದು ದಿನವರೆಗೆ ಪಾತ್ರೆಗಳಲ್ಲಿ ಸಂಗ್ರಹಿಸುವದರಿಂದ ನೀರು ಹಸಿರು ಬಣ್ಣಕ್ಕೆ ತಿರುಗಿವೆ. ಈ ನೀರನ್ನು ಕುಡಿದ ಮಕ್ಕಳು ಹಾಗೂ ಹಿರಿಯರಿಗೆ ವಿವಿಧ ರೋಗಗಳು ಹರಡುತ್ತಿದೆ ಎಂಬ ಆರೋಪ ಬಲವಾಗಿದೆ.
