ಉದ್ಯೋಗಾಧಾರಿತ ಕೌಶಲ ಶಿಕ್ಷಣ ಒಡಂಬಡಿಕೆ...

ತೆಂಕನಿಡಿಯೂರು ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು

ಮಣಿಪಾಲ್​ ಸ್ಕಿಲ್​ ಡೆವಲಪ್​ಮೆಂಟ್​ ಸೆಂಟರ್​ ಒಪ್ಪಂದ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಕಾಲೇಜು ವಿದ್ಯಾರ್ಥಿಗಳಿಗೆ ಉದ್ಯೋಗಾಧಾರಿತ ಕೌಶಲ ಶಿಕ್ಷಣ ನೀಡಲು ತೆಂಕನಿಡಿಯೂರಿನ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ಮತ್ತು ಸ್ನಾತಕೋತ್ತರ ಅಧ್ಯಯನ ಕೇಂದ್ರವು ಡಾ. ಟಿಎಂಎ ಪೈ ಫೌಂಡೇಷನ್​ನ ಅಂಗ ಸಂಸ್ಥೆಯಾದ ಮಣಿಪಾಲ್​ ಸ್ಕಿಲ್​ ಡೆವಲಪ್​ಮೆಂಟ್​ ಸೆಂಟರ್​ನೊಂದಿಗೆ ಜೂನ್​ 9ರಂದು ಒಡಂಬಡಿಕೆ (ಎಂಒಯು) ಮಾಡಿಕೊಂಡಿದೆ.

ಕೌಶಲಾಧಾರಿತ ಕೋರ್ಸ್​ಗಳ ರಚನೆ, ಅಭಿವೃದ್ಧಿ ಮತ್ತು ನಿರ್ವಹಣೆ, ಉದ್ಯೋಗ ಕೌಶಲ ವೃದ್ಧಿ, ವಿದ್ಯಾರ್ಥಿಗಳಿಗೆ ಇಂಟರ್ನ್ ಶಿಪ್​, ವಿವಿಧ ಶೈಕ್ಷಣಿಕ ಮತ್ತು ವೃತ್ತಿಪರ ಕಾರ್ಯಾಗಾರ, ಕೈಗಾರಿಕಾ ವಾತಾವರಣ ಪರಿಚಯಿಸುವಿಕೆ, ಎರಡೂ ಸಂಸ್ಥೆಗಳ ಸಂಪನ್ಮೂಲ ವ್ಯಕ್ತಿಗಳ

ವಿನಿಮಯ ಮತ್ತು ಪದವಿಯೊಂದಿಗೆ ಕೌಶಲ ಕೋರ್ಸ್​ಗಳ ಶಿಕ್ಷಣದ ಒಡಂಬಡಿಕೆ ಮಾಡಿಕೊಳ್ಳಲಾಯಿತು.

ಉದ್ಯೋಗ ಕೌಶಲ ಅಗತ್ಯ

ಮಣಿಪಾಲ್​ ಸ್ಕಿಲ್​ ಡೆವಲಪ್​ಮೆಂಟ್​ನ ಚೇರ್ಮನ್​ ಡಾ. ಸುರ್ಜಿತ್​ ಸಿಂಗ್​ ಪಾಬ್ಲಾ ಮಾತನಾಡಿ. ಇಂದಿನ ಸ್ಪರ್ಧಾತ್ಮಕ ಜಗತ್ತಿನಲ್ಲಿ ಉದ್ಯೋಗ ಕೌಶಲ ತೀರಾ ಅಗತ್ಯ. ಸ್ಪರ್ಧಾತ್ಮಕ ಪರೀಕ್ಷೆ ಎದುರಿಸಲು ಅಗತ್ಯವಾದ ತಯಾರಿ ಮತ್ತು ಜ್ಞಾನ ಅಗತ್ಯ. ಸ್ವ-ಉದ್ಯೋಗಕ್ಕೆ ಸಂಬಂಧಿಸಿ ವಿವಿಧ ಕೋರ್ಸ್​ಗಳಾದ ಸಿಎನ್​ಸಿ ಮಶೀನ್ಸ್​, ಕ್ಯಾಡ್​ ಸೆಂಟರ್​, ಫ್ಯಾಶನ್​ ಡಿಸೈನ್​, ರೊಬಾಟಿಕ್ಸ್​, ತ್ರಿಡಿ, ಅನಿಮೇಷನ್​ ಟೆಕ್ನಾಲಜಿ, ಆಟೊ ಮೋಟಿವ್​ ಸರ್ವೀಸ್​, ಇಂಟೀರಿಯರ್​ ಡಿಸೈನ್​, ಫರ್ನೀಚರ್​ ಆ್ಯಂಡ್​ ಪಿಕ್ಸ್​ಚರ್ಸ್​, ಆಟೋಮೇಷನ್​, ಎಐ, ಎಂಎಲ್​, ಸೈಬರ್​ ಸೆಕ್ಯೂರಿಟಿ, ಇವಿ ಟೆಕ್ನಾಲಜಿ, ಬ್ಯೂಟಿ ಆ್ಯಂಡ್​ ವೆಲ್​ನೆಸ್​ ಮುಂತಾದವು ಅವಶ್ಯಕ ಎಂದರು.

ಎಂಎಸ್​ಡಿಸಿಯ ರಿಜಿಸ್ಟ್ರಾರ್​ ಡಾ. ಅಂಜಯ್ಯ ದೇವಿನೇನಿ, ಪ್ರವೇಶ ಮತ್ತು ಸಂಪರ್ಕಾಧಿಕಾರಿ ಡಾ. ನಾರಾಯಣ ಶೆಣೈ ಕೆ., ಕಾಲೇಜಿನ ಶೈಕ್ಷಣಿಕ ಸಲಹೆಗಾರ ಡಾ.ಶ್ರೀಧರ ಭಟ್​, ಪದವಿ ವಿಭಾಗದ ವಿದ್ಯಾರ್ಥಿ ಕ್ಷೇಮಪಾಲನಾಧಿಕಾರಿ ಪ್ರಶಾಂತ ಎನ್​., ಐಕ್ಯುಎಸಿ ಸಂಚಾಲಕಿ ಡಾ. ಮೇವಿ ಮಿರಾಂದ ಉಪಸ್ಥಿತರಿದ್ದರು.

ಒಡಂಬಡಿಕೆ ಪ್ರಕ್ರಿಯೆಯಲ್ಲಿ ಕಾಲೇಜಿನ ಪ್ಲೇಸ್​ಮೆಂಟ್​ ಆಫೀಸರ್​ ದಿನೇಶ ಎಂ. ಮತ್ತು ಎಂಎಸ್​ಡಿಸಿಯ ಅನೂಷಾ ಸಹಕರಿಸಿದರು.

ಹೊಸ ಕೋರ್ಸ್​ ಆರಂಭ

 ತೆಂಕನಿಡಿಯೂರು ಕಾಲೇಜಿನಲ್ಲಿ ಬ್ಯಾಂಕಿಂಗ್​, ಫೈನಾನ್ಸ್​, ಇನ್ಶೂರೆನ್ಸ್​ ಸರ್ವಿಸಸ್​ ವಲಯಗಳಲ್ಲಿ ಉದ್ಯೋಗ ಲಭಿಸುವಂತಾಗಲು ಕಾಲೇಜಿನಲ್ಲಿ ಹೊಸ ಬಿಕಾಂ ಕೋರ್ಸ್​, ಎಇಡಿಪಿ ಈ ವರ್ಷ ಪ್ರಾರಂಭಿಸಲಾಗಿದೆ. ಕಲಿಕೆಯೊಂದಿಗೆ ಗಳಿಕೆಯನ್ನೂ ಮಾಡಲು ಅಪ್ರೆಂಟೈಸ್​ಶಿಪ್​ನ ಅವಕಾಶ ಕಲ್ಪಿಸಲಾಗಿದೆ.