ಉಡುಪಿ: ಇತ್ತೀಚೆಗೆ ಯುವಕನೊಬ್ಬ 'ಝಾಂಬಿ ಡ್ರಗ್ಸ್​' ಸೇವಿಸಿದಂತೆ ವರ್ತಿಸಿರುವ ವಿಡಿಯೋ ವೈರಲ್​ ಆಗಿತ್ತು. ಅದು ಸಾಕಷ್ಟು ಆತಂಕಕ್ಕೂ ಕಾರಣವಾಗಿತ್ತು. ಬಳಿಕ ಗೃಹ ಸಚಿವರು ಸ್ಪಷ್ಟನೆ ನೀಡಿ, ಡ್ರಗ್ಸ್​ ಬಗ್ಗೆ ವದಂತಿ ಹಬ್ಬಿಸುವವರ ವಿರುದ್ಧ ಕ್ರಮ ಕೈಗೊಳ್ಳುವುದಾಗಿಯೂ ಎಚ್ಚರಿಕೆ ನೀಡಿದ್ದರು. ಓರ್ವ ಯುವಕನನ್ನೂ ಈ ವಿಚಾರವಾಗಿ ಬಂಧಿಸಲಾಗಿತ್ತು. ಆದರೆ, ಝಾಂಬಿ ಡ್ರಗ್ಸ್​ ಬಳಕೆ ಭಾರತದಲ್ಲಿ ಇಲ್ಲ ಎಂದು ಖ್ಯಾತ ಮನೋವೈದ್ಯ ಡಾ. ಪಿ.ವಿ. ಭಂಡಾರಿ ತಿಳಿಸಿದ್ದಾರೆ.

ಅಮೆರಿಕದಲ್ಲಿ 2016ರಲ್ಲಿ ವರದಿಯಾದಂತೆ ಅದು ವೆಟರ್ನರಿ ಡ್ರಗ್​ ಆಗಿದೆ. ಪ್ರಾಣಿಗಳಿಗೆ ಅರಿವಳಿಕೆ ನೀಡಲು ಅದನ್ನು ಬಳಸಲಾಗುತ್ತದೆ. ಮನುಷ್ಯರು ಈ ಡ್ರಗ್​ ಬಳಸಿದರೆ ಚರ್ಮದಲ್ಲಿ ಗಾಯ ಆಗುತ್ತದೆ. ಪ್ರತಿಮೆಯಂತೆ ನಿಂತುಕೊಳ್ಳುವ ವರ್ತನೆ ಕಂಡುಬರುತ್ತದೆ. ಭಾರತದಲ್ಲಿ ಇದರ ಬಳಕೆ ಕಂಡುಬಂದಿಲ್ಲ ಎಂದು ತಿಳಿಸಿದ್ದಾರೆ.

ಬೆಂಗಳೂರು ಮತ್ತು ಚಂಡೀಗಢದಲ್ಲಿ ವೈರಲ್​ ಆದ 'ಝಾಂಬಿ ಡ್ರಗ್ಸ್​'ನ 30 ಸೆಕೆಂಡ್​ ವಿಡಿಯೋ ಆಧರಿಸಿ ತಪ್ಪು ನಿರ್ಧಾರ ಕೈಗೊಳ್ಳಬಾರದು. ಬಿಸಿಲು ಅಥವಾ ಹೈಪೋಗ್ಲೈಸಿಮಿಯಾ ಸೇರಿದಂತೆ ಅನೇಕ ಕಾರಣಗಳಿಂದ ಈ ರೀತಿಯ ವರ್ತನೆ ಮನುಷ್ಯನಲ್ಲಿ ಕಾಣಿಸಬಹುದು. ಇಂತಹ ಸಂದರ್ಭಗಳಲ್ಲಿ ವಿಡಿಯೋ ಮಾಡುವ ಬದಲು ಅಂಥವರಿಗೆ ಸಹಾಯ ಮಾಡಿ ಎಂದು ಸಲಹೆ ನೀಡಿದ್ದಾರೆ.

ನಮ್ಮಲ್ಲಿ ಝಾಂಬಿ ಬಳಕೆ ಇಲ್ಲ. ಈ ಬಗ್ಗೆ ಅನಗತ್ಯ ಭಯ ಹರಡಿಸಬೇಡಿ. ಅದರ ಬದಲು ನಮ್ಮಲ್ಲಿ ಚಾಲ್ತಿಯಲ್ಲಿರುವ ಗಾಂಜಾ, ಅಫೀಮು, ನಿದ್ರೆ ಮಾತ್ರೆ , ಎಂಡಿಎಂಎ ಗಳಂತಹ ಮಾದಕ ದ್ರವ್ಯಗಳ ನಿಯಂತ್ರಣದ ಕಡೆ ಹೆಚ್ಚು ಗಮನ ನೀಡಿ. ಇವುಗಳು ನಮ್ಮ ಯುವಜನತೆಯನ್ನು ನಿಜವಾಗಿಯೂ ಹಾಳು ಮಾಡುತ್ತಿವೆ. ಇವುಗಳ ಬಳಕೆಯ ವಿರುದ್ಧ ಎಚ್ಚರ, ಜಾಗೃತಿ ಅಗತ್ಯ ಎಂದು ಡಾ. ಭಂಡಾರಿ ಮನವಿ ಮಾಡಿದ್ದಾರೆ.