ಯಕ್ಷಗಾನದಲ್ಲಿ ಇತರ ರಂಗಕಲೆಗಳ ಅನುಕರಣೆ ಸಲ್ಲದು: ಡಾ. ಜೋಶಿ

ಉಡುಪಿ: ಶೈಲಿಬದ್ಧವಾದ ಕಲೆ ಯಕ್ಷಗಾನ. ಪರಂಪರೆ ಮಹತ್ವ ಅರಿತು ಹೊಸತನ ಅಳವಡಿಸಿಕೊಳ್ಳಬಹುದು. ಇದಕ್ಕೆ ಕಲಾವಿದನಲ್ಲಿ ಪ್ರಜ್ಞಾವಂತಿಕೆ ಇರಬೇಕು. ಬೇರೆ ರಂಗಕಲೆಗಳ ಅನುಕರಣೆ ಯಕ್ಷಗಾನದಲ್ಲಿ ಸಲ್ಲದು ಎಂದು ಹಿರಿಯ ಯಕ್ಷಗಾನ ವಿದ್ವಾಂಸ ಡಾ. ಎಂ. ಪ್ರಭಾಕರ ಜೋಶಿ ಹೇಳಿದರು.

ಯಕ್ಷಗಾನ ಕಲಾರಂಗದ ಐವೈಸಿ ಸಭಾಭವನದಲ್ಲಿ ಯಕ್ಷಗಾನ ಕಲಾರಂಗ ವತಿಯಿಂದ ವೃತ್ತಿ ಮೇಳದ ಯುವ ಕಲಾವಿದರಿಗೆ ಆಯೋಜಿಸಿದ ನಾಲ್ಕು ದಿನಗಳ ಯಕ್ಷಗಾನ ಮಾರ್ಗದರ್ಶಿ ಶಿಬಿರ ಉದ್ಘಾಟಿಸಿ ಮಾತನಾಡಿದರು.

ಯಕ್ಷಗಾನ ಕ್ಷೇತ್ರದಲ್ಲಿ ಪಾಶ್ಚಿಮಾತ್ಯ ಶೈಲಿಯ ಸಂಶೋಧನೆ ಸೂಕ್ತವಲ್ಲ. ಹಿಡನ್​ ಅಜೆಂಡಾ ಮೂಲಕ ಕಲೆಯ ಪಾವಿತ್ರ್ಯತೆಗೆ ಧಕ್ಕೆ ತರುವ ಯಾವುದೇ ಸಂಶೋಧಕರಿಗೆ ಕಲಾವಿದರು ಸಹಕಾರ ನೀಡಬಾರದು ಎಂದರು.

ಅಭ್ಯಾಗತರಾಗಿದ್ದ ಬಹುಶ್ರುತ ವಿದ್ವಾಂಸ ದಿವಾಕರ ಹೆಗಡೆ ಕೆರೆಹೊಂಡ ಮಾತನಾಡಿ, ಯಕ್ಷಗಾನ ಸಮಾಜದ ಎಲ್ಲರನ್ನೂ ಒಳಗೊಂಡ ಕಲಾಪ್ರಕಾರವಾಗಿದೆ. ಎಲ್ಲರೂ ಸಮಾನರಾಗಿ ಕುಣಿಯಲು ಅವಕಾಶವಿದೆ. ಕಲೆಗಾಗಿ ಸಮರ್ಪಿತ ಅನೇಕ ಸಂಸ್ಥೆಗಳು ರ್ನಿದಿಷ್ಟ ರಾಜಕೀಯ ಧೋರಣೆ ಅನುಸರಿಸುತ್ತಾ ಬಂದಿದ್ದು, ಸರ್ಕಾರಿ ಪ್ರಭಾವಕ್ಕೆ ಒಳಗಾಗಿವೆ. ಆದರೆ ಯಕ್ಷಗಾನ ಕಲಾರಂಗ ಸಿದ್ಧಾಂತ ಬದ್ಧವಿಲ್ಲದೆ ಸೇವೆಯ ಆಧಾರದಲ್ಲಿ ಎದ್ದು ನಿಂತಿದೆ ಎಂದು ಶ್ಲಾಘಿಸಿದರು.

ಹಿರಿಯ ಕಲಾವಿದರಾದ ಕೊಂಡದಕುಳಿ ರಾಮಚಂದ್ರ ಹೆಗಡೆ, ಎ.ಪಿ. ಪಾಠಕ್​, ಸಂಸ್ಥೆಯ ಸದಸ್ಯರಾದ ಪ್ರೊ. ಕೆ. ಸದಾಶಿವ ರಾವ್​, ಪ್ರೊ. ಎಂ. ಎಲ್​. ಸಾಮಗ ಉಪಸ್ಥಿತರಿದ್ದರು. ಸಂಸ್ಥೆಯ ಅಧ್ಯಕ್ಷ ಎಂ. ಗಂಗಾಧರ ರಾವ್​ ಸ್ವಾಗತಿಸಿದರು. ಶಿಬಿರದ ನಿರ್ದೇಶಕ ಪವನ್​ ಕಿರಣ್ಕೆರೆ ಪ್ರಾಸ್ತಾವಿಕ ಮಾತುಗಳನ್ನಾಡಿದರು. ಕಾರ್ಯದರ್ಶಿ ಮುರಲಿ ಕಡೆಕಾರ್​ ಕಾರ್ಯಕ್ರಮ ಸಂಯೋಜಿಸಿದರು. ಜತೆ ಕಾರ್ಯದರ್ಶಿ ವಿದ್ಯಾಪ್ರಸಾದ್​ ವಂದಿಸಿದರು. ನಾರಾಯಣ ಎಂ. ಹೆಗಡೆ ಕಾರ್ಯಕ್ರಮ ನಿರೂಪಿಸಿದರು.