ನೂಯಿ ಪ್ರದೇಶದಲ್ಲಿ ಮನೆಗೆ ಜಲದಿಗ್ಬಂಧನ

ರಾಷ್ಟ್ರೀಯ ಹೆದ್ದಾರಿ 169ರ ವಿಸ್ತರಣೆ ಕಾಮಗಾರಿ ಅವಾಂತರದಿಂದ ಗುರುಪುರಕ್ಕೆ ಹತ್ತಿರದ ನೂಯಿ ಪ್ರದೇಶದ ಎರಡು ಮನೆಗಳು ಪದೇಪದೆ ಜಲಾವೃತಗೊಂಡು ಮನೆ ಮಂದಿ ತೀವ್ರ ಸಂಕಷ್ಟ ಎದುರಿಸುವಂತಾಗಿದೆ. ಈ ವರ್ಷವೂ ಸಮಸ್ಯೆ ಪುನರಾವರ್ತನೆಯಾಗಿದೆ.

ಹೆದ್ದಾರಿ ವಿಸ್ತರಣೆ ಸಂದರ್ಭದಲ್ಲಿ ನೂಯಿ ಪ್ರದೇಶದಿಂದ ಲ್ಗುಣಿ ನದಿಗೆ ಹರಿಯುತ್ತಿರುವ ಪರಂಬೋಕು ತೋಡು ನೆಲಸಮಗೊಳಿಸಿ, ಮೇಲ್ಗಡೆ ಹೆದ್ದಾರಿ ನಿರ್ಮಿಸಲಾಗಿದೆ. ಪರಿಣಾಮ ಪರಂಬೋಕು ತೋಡಿನ ಬದಲಾಗಿ ಹೊಸದಾಗಿ ನಿರ್ಮಾಣಗೊಂಡ ಹೆದ್ದಾರಿ ಪಕ್ಕದ ಮನೆಗಳ ಬದಿಯಲ್ಲಿ ಮಳೆ ನೀರು ಹರಿಯಲಾರಂಭಿಸಿದೆ. ಧಾರಾಕಾರ ಮಳೆಗೆ ಇಲ್ಲಿನ ಮನೆಗಳು ಸಂಪೂರ್ಣ ಜಲಾವೃತಗೊಂಡು ಮನೆ ಮಂದಿಗೆ ಜಲದಿಗ್ಭಂಧನ ಕಾಯಂ. ಮನೆಯಲ್ಲಿ ಮಕ್ಕಳು, ಮಹಿಳೆಯರು, ವಯೋವೃದ್ಧರು ವಾಸಿಸುತ್ತಿದ್ದಾರೆ.

ಮನೆಯ ಎದುರು ಹೆದ್ದಾರಿ ಪಕ್ಕದಲ್ಲಿ ಖಾಸಗಿ ವ್ಯಕ್ತಿಯೊಬ್ಬರು ಭಾರಿ ಮಣ್ಣು ಹಾಕಿ ಜಾಗ ಸಮತಟ್ಟುಗೊಳಿಸಿದ್ದಾರೆ. ಹತ್ತಿರದಲ್ಲಿ ಎತ್ತರಕ್ಕೆ ಹೆದ್ದಾರಿ ಹಾದು ಹೋಗಿದ್ದರೆ, ಮಳೆಯಾಗುತ್ತಲೇ ಎದುರಲ್ಲಿರುವ ಮನೆ ಮಂದಿ ತ್ರಿಶಂಕು ಸ್ಥಿತಿ ಅನುಭವಿಸುವಂತಾಗಿವೆ.

ಜಿಲ್ಲಾಡಳಿತದ ಸೂಚನೆ ಮೇರೆಗೆ ಇಲ್ಲಿ ನೀರು ಹರಿದು ಹೋಗಲು ತೋಡು ನಿರ್ಮಿಸಲಾಗಿದೆ. ಜೋರಾದ ಮಳೆಗೆ ಎರಡೂ ಕಡೆಯ ಮಣ್ಣು ತೋಡಿಗೆ ಜರಿದು ತೋಡೇ ಇಲ್ಲದಂತಾಗಿದ್ದು, ತೋಡಿಗೆ ಅಳವಡಿಸಿದ್ದ ಸಿಮೆಂಟ್ ಪೈಪ್ ಹೊರ ತೆಗೆಯಲಾಗಿದೆ. ಈಗ ಮತ್ತೆ ಮನೆ ಜಲಾವೃತಗೊಳ್ಳುತ್ತಿದೆ. ಇಲ್ಲಿ ಎತ್ತರಕ್ಕೆ ತಡೆಗೋಡೆ-ತೋಡು ನಿರ್ಮಿಸಿದರೆ ಮಾತ್ರ ಮೇಲಿನ ನೀರಿಗೆ ಪರಿಹಾರ ಕಂಡುಕೊಳ್ಳಲು ಸಾಧ್ಯ ಎಂಬುವುದು ಸ್ಥಳೀಯರ ಅಭಿಪ್ರಾಯ.

ತಾತ್ಕಾಲಿಕ ಪರಿಹಾರವಾಗಿ ಮನೆಯ ಎದುರು ಮಣ್ಣು ಹಾಕಿ ಸಮತಟ್ಟುಗೊಳಿಸಿ ಮನೆಯಂಗಳದಲ್ಲಿ ತುಂಬುವ ನೀರು ಬೇರೆಡೆಗೆ ಪರಿವರ್ತಿಬೇಕು ಎಂದು ಶನಿವಾರ ಸ್ಥಳಕ್ಕೆ ಭೇಟಿ ನೀಡಿದ್ದ ಜಿಲ್ಲಾಧಿಕಾರಿಯವರು ಎನ್‌ಎಚ್ ವಿಸ್ತರಣೆ ಕಾಮಗಾರಿ ನಡೆಸುತ್ತಿರುವ ಡಿಬಿಎಲ್ ಇಂಜಿನಿಯರ್‌ಗಳಿಗೆ ಸೂಚಿಸಿದ್ದಾರೆ. ಮನೆಯಂಗಳಕ್ಕೆ ಮಣ್ಣು ತುಂಬಿಸುವುದರಿಂದ ಮೇಲಿನ ನೀರಿಗೆ ಪರಿಹಾರವಲ್ಲ ಎಂದು ಸ್ಥಳೀಯ ವ್ಯಕ್ತಿ ಇಂತಿಯಾಜ್ ಹೇಳಿದ್ದಾರೆ.

ಜೋರು ಮಳೆಯಾದರೆ ಮನೆಯ ಸುತ್ತ ನೀರು ತುಂಬುತ್ತದೆ. ಮನೆ ಖಾಲಿ ಮಾಡಬೇಕಾಗುತ್ತದೆ. ಈಗ ಮನೆಮಂದಿ ಜೀವ ಭಯದಿಂದ ವಾಸಿಸುವಂತಾಗಿದೆ. ಹಿಂದೆ ಮೇಲ್ಭಾಗದಿಂದ ಹರಿಯುತ್ತಿದ್ದ ಮಳೆ ನೀರಿನ ತೋಡು ಈಗ ಹೆದ್ದಾರಿಯಡಿಗೆ ಬಿದ್ದಿದೆ. ನೀರು ಹರಿಯುವ ದಿಕ್ಕು ಬದಲಾಗಿ ಸಮಸ್ಯೆ ಉದ್ಭವಿಸಿದೆ. ಮನೆಗೆ ಹತ್ತಿರದ ಖಾಸಗಿ ಜಾಗದಲ್ಲಿ ಭಾರಿ ಪ್ರಮಾಣದಲ್ಲಿ ಮಣ್ಣು ಹಾಕಲಾಗಿದೆ. ಇಲ್ಲಿ ತಡೆಗೋಡೆಯುಳ್ಳ ತೋಡು ರಚಿಸಬೇಕು. ಸಿಮೆಂಟ್ ಪೈಪ್ ಅಳವಡಿಸಿದರೆ ಪ್ರಯೋಜನವಿಲ್ಲ.

— ಮೊಹಮ್ಮದ್ ಅಶ್ರ್ ಸಂತ್ರಸ್ತ

---ಫೋಟೋ---

*ಜಿಯುಆರ್-ಜು-5-ಯು.ಪಿ.ಇಬ್ರಾಹಿಂ

*ಜಿಯುಆರ್-ಜು-5-ಮೊಹಮ್ಮದ್ ಅಶ್ರ್

*ಜಿಯುಆರ್-ಜು-5-ಮನೆ-1, 2

ಮನೆಯಂಗಳದಲ್ಲಿ ನೀರು ನಿಂತಿರುವುದು.

*ಜಿಯುಆರ್-ಜು-5-ಮನೆ ಎದುರು

ಮನೆಯ ಎದುರು ಖಾಸಗಿ ವ್ಯಕ್ತಿಯೊಬ್ಬರು ಜಾಗ ಸಮತಟ್ಟುಗೊಳಿಸಲು ಮಣ್ಣು ಹಾಕಿರುವುದು.