ಗಿಡ-ಮರಗಳಿಗೂ ಜಲಭಾಗ್ಯ!

ಈ ಬಾರಿ ಸೂರ್ಯನ ತಾಪ ದಿನದಿಂದ ದಿನಕ್ಕೆ ಏರುತ್ತಲೇ ಇದ್ದು, ಮನುಷ್ಯರು, ಪ್ರಾಣಿ-ಪಕ್ಷಿಗಳ ಜೊತೆಗೆ ಗಿಡಮರಗಳೂ ಬಾಡಿ ಬೆಂಡಾಗುತ್ತಿವೆ. ಇಂತಹ ಕಠಿಣ ಸನ್ನಿವೇಶದಲ್ಲಿ ಉಳ್ಳಾಲದ ರಾಜಕೀಯ ಹಾಗೂ ಧಾರ್ಮಿಕ ಮುಖಂಡ ಸುರೇಶ್ ಭಟ್ನಗರ‌್ಟವರು ಗಿಡಮರಗಳಿಗೆ ನೀರುಣಿಸುವ ಮೂಲಕ ವಿಶಿಷ್ಟ ರೀತಿಯಲ್ಲಿ ಪರಿಸರ ಪ್ರೇಮ ಮೆರೆದಿದ್ದಾರೆ.

ಸುಮಾರು ಏಳು ವರ್ಷಗಳ ಹಿಂದೆ ತೊಕ್ಕೊಟ್ಟು ಓವರ್‌ಬ್ರಿಡ್ಜ್‌ನಿಂದ ಉಳ್ಳಾಲ ಪೇಟೆಗೆ ಹೋಗುವ ರಸ್ತೆಯ ಇಕ್ಕೆಲೆಗಳಲ್ಲಿ ರಸ್ತೆ ಅಗಲೀಕರಣದ ಬಳಿಕ ಪರಿಸರಪ್ರೇಮಿ ಮಾಧವ ಉಳ್ಳಾಲ್‌ರವರು ಅರಣ್ಯ ಇಲಾಖೆ ಸಹಕಾರದೊಂದಿಗೆ ಮಲೇಷ್ಯಾ ಮೂಲದ ‘ಅವಲಾಂಡ’ ಎನ್ನುವ ಗಿಡಗಳನ್ನು ನೆಟ್ಟಿದ್ದರು. ಅಂದು ನೆಟ್ಟ ಆ ಗಿಡಗಳು ಇಂದು ಮರವಾಗಿ ಬೆಳೆದು ನಿಂತಿದ್ದು, ಸುಂದರ ಹೂವುಗಳನ್ನು ಬಿಟ್ಟು ಪರಿಸರಕ್ಕೆ ತಂಪೆರೆಯುತ್ತಿವೆ. ಉಳ್ಳಾಲ ದರ್ಗಾ, ಶ್ರೀ ಭಗವತೀ ದೇವಸ್ಥಾನ, ಸೋಮೇಶ್ವರ ದೇವಸ್ಥಾನ ಹಾಗೂ ಉಳ್ಳಾಲ ಬೀಚ್‌ಗೆ ಬರುವ ಪ್ರವಾಸಿಗರ ಮನತಣಿಸುತ್ತಿವೆ.

ಆದರೆ ಈ ವರ್ಷದ ತೀವ್ರ ಬಿಸಿಲಿನಿಂದಾಗಿ ಈ ಮರಗಳು ಸೊರಗುತ್ತಿರುವುದನ್ನು ಗಮನಿಸಿದ ಸುರೇಶ್ ಭಟ್ನಗರ ಅವರು ಕೂಡಲೇ ಕಾರ್ಯಪ್ರವೃತ್ತರಾದರು. ಶ್ರೀ ಚೀರುಂಭ ಭಗವತಿ ದೇವಸ್ಥಾನದ ಆಡಳಿತ ಮೊಕ್ತೇಸರರಾಗಿರುವ ಇವರು, ಪ್ರತಿದಿನ ದೇವಸ್ಥಾನಕ್ಕೆ ಹೋಗುವ ಸಂದರ್ಭ ಗಿಡಗಳ ಸ್ಥಿತಿಯನ್ನು ಕಂಡು ಬೇಸರಗೊಂಡು ವಿಧಾನಸಭೆ ಸ್ಪೀಕರ್ ಯು.ಟಿ.ಖಾದರ್ ಅವರೊಂದಿಗೆ ಮಾತುಕತೆ ನಡೆಸಿ ನಗರಸಭೆಯಿಂದ ನೀರಿನ ವ್ಯವಸ್ಥೆ ಮಾಡುವಂತೆ ಮನವಿ ಮಾಡಿದಾಗ ಅಗತ್ಯ ಸಹಕಾರದ ಭರವಸೆ ದೊರೆತ ಹಿನ್ನೆಲೆಯಲ್ಲಿ, ಮಾರ್ಚ್ 13ರಿಂದಲೇ ಸ್ವತಃ ಸುರೇಶ್ ಅವರೇ ನೀರಿನ ವ್ಯವಸ್ಥೆಯನ್ನು ಆರಂಭಿಸಿದ್ದಾರೆ.

ಪ್ರಸ್ತುತ ವಾರದಲ್ಲಿ ಒಂದು ದಿನ ಟ್ಯಾಂಕರ್ ಮೂಲಕ ನೀರು ತಂದು ಹಾಕುವ ಯೋಜನೆ ಜಾರಿಯಲ್ಲಿದೆ. ಇಲ್ಲಿನ ಮರಗಳಿಗೆ ಸುಮಾರು ಆರು ಟ್ಯಾಂಕರ್ ನೀರಿನ ಅವಶ್ಯಕತೆಯಿದ್ದು, ಇದಕ್ಕೆ ಏಳು ಸಾವಿರ ರೂಪಾಯಿ ವೆಚ್ಚವಾಗುತ್ತಿದೆ. ಮಳೆ ಆರಂಭವಾಗುವವರೆಗೂ ಈ ವ್ಯವಸ್ಥೆಯನ್ನು ಮುಂದುವರಿಸಲು ನಿರ್ಧರಿಸಲಾಗಿದ್ದು, ಅವರ ಈ ಪರಿಸರ ಕಾಳಜಿಗೆ ಸಾರ್ವಜನಿಕ ವಲಯದಲ್ಲಿ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗಿದೆ.