ಕನ್ನಡದಲ್ಲೇ ಮಾತು ಆರಂಭಿಸಿದ ಪವನ್ ಕಲ್ಯಾಣ್, 'ಪೊಡವಿಗೊಡೆಯ ಶ್ರೀಕೃಷ್ಣನ ಪಾದಾರವಿಂದಗಳಿಗೆ, ಸುಗುಣೇಂದ್ರ ತೀರ್ಥ ಶ್ರೀಪಾದರ ಪಾದಾರವಿಂದಗಳಿಗೆ ಶಿರಸಾಷ್ಟಾಂಗ ಪ್ರಣಾಮಗಳು. ಕನ್ನಡ ನಾಡಿನ ಎಲ್ಲ ಜನತೆಗೆ ನನ್ನ ನಮಸ್ಕಾರ' ಎಂದರು. ಇದೀಗ ನಾನು ಲಾರ್ಡ್ ಮೆಕಾಲೆಯ ಇಂಗ್ಲಿಷ್ನಲ್ಲಿ ಮಾತನಾಡುತ್ತೇನೆ ಎಂದು ತಿಳಿಸಿ ಇಂಗ್ಲಿಷ್ನಲ್ಲಿ ಮಾತನಾಡತೊಡಗಿದರು. ಸನಾತನ ಧರ್ಮವನ್ನು ಇಂಗ್ಲಿಷ್ ಭಾಷೆ ನಾಶ ಮಾಡಲಿದೆ ಎಂದು ಮೆಕಾಲೆ ಹೇಳಿದ್ದ. ಆದರೆ, ಸನಾತನ ಧರ್ಮದ ಶಕ್ತಿಯ ಮುಂದೆ ಅದು ಸಾಧ್ಯವಾಗಿಲ್ಲ. ವೇದ ಮತ್ತು ಭಗವದ್ಗೀತೆಯಿಂದ ನಮ್ಮ ಸನಾತನ ಸಂಸ್ಕೃತಿ ಉಳಿದಿದೆ. ನನಗೂ ಕರ್ಮ ಯೋಗದಲ್ಲಿ ಅಪಾರ ನಂಬಿಕೆ. ಹೀಗಾಗಿ ಫಲಗಳ ನಿರೀಕ್ಷೆ ನನಗಿಲ್ಲ. ನಾನು ವಿದ್ವಾಂಸರ ಕುಟುಂಬದವನಲ್ಲ, ಭಕ್ತರ ಕುಟುಂಬದವನು. ನನ್ನ ತಂದೆ ಹನುಮನ ಭಕ್ತ. ಬಾಲ್ಯದಿಂದಲೇ ನಾನು ಶ್ರೀರಾಮ ತಾರಕ ಮಂತ್ರ ಹೇಳುತ್ತಲೇ ಬೆಳೆದವನು. ಈ ಮಂತ್ರ ನನ್ನ ಜೀವನದಲ್ಲಿ ಪವಾಡವನ್ನೇ ಮಾಡಿದೆ. ಮಾನಸಿಕವಾಗಿ ಕುಗ್ಗಿದಾಗ, ಅನಾರೋಗ್ಯಕ್ಕೊಳಗಾದಾಗ ಈ ಮಂತ್ರ ನನ್ನನ್ನು ಮೇಲಕ್ಕೆ ಎತ್ತಿದೆ. ಅಂತಹ ಶಕ್ತಿ ಹೊಂದಿರುವ ಶ್ರೀಕೃಷ್ಣ ಸನ್ನಿಧಿಯಲ್ಲಿ ನಾನಿದ್ದು, ಉಡುಪಿಯಲ್ಲಿ ವೈಕುಂಠ ಕಂಡಿದ್ದೇನೆ ಎಂದರು.
