ಗಿಡ-ಮರಗಳನ್ನೂ ತಾಯಿಯಂತೆಯೇ ಪ್ರೀತಿಸಿ

ಉಡುಪಿ: ಗಿಡಗಳನ್ನು ನೆಡುವುದಷ್ಟೇ ಕೆಲಸವಾಗಬಾರದು. ಅದನ್ನು ಬೆಳೆಸಿ, ಉಳಿಸುವುದೂ ಕರ್ತವ್ಯ ಆಗಬೇಕು. ಮುಂದಿನ ಪೀಳಿಗೆಗೆ ಪ್ರಕೃತಿಯನ್ನು ರಸಿ, ಅವರಿಗೆ ಉತ್ತಮ ಪರಿಸ ನೀಡುವ ಜವಾಬ್ದಾರಿಯೂ ನಮ್ಮದು. ಮಕ್ಕಳೆಲ್ಲರೂ ತಾಯಿಯ ಹೆಸರಲ್ಲಿ ಗಿಡ ನೆಟ್ಟರೆ ಆ ಗಿಡದ ಮೇಲೂ ಸಹ ತಾಯಿಯ ಮೇಲಿರುವಷ್ಟೇ ಪ್ರೀತಿ ಉಂಟಾಗುತ್ತದೆ. ಗಿಡ-ಮರಗಳನ್ನೂ ತಾಯಿಯಂತೆಯೇ ಪ್ರೀತಿಸಬೇಕು ಎಂದು ವಿದ್ಯಾರ್ಥಿಗಳಿಗೆ ಭಾರತ ಸ್ಕೌಟ್ಸ್​ ಆ್ಯಂಡ್​ ಗೈಡ್ಸ್​ ಜಿಲ್ಲಾ ಮುಖ್ಯ ಆಯುಕ್ತ ಇಂದ್ರಾಳಿ ಜಯಕರ್​ ಶೆಟ್ಟಿ ಹೇಳಿದರು.

ಉಡುಪಿ ತಾಲೂಕಿನ ಪ್ರಗತಿ ನಗರದಲ್ಲಿರುವ ಭಾರತ ಸ್ಕೌಟ್ಸ್​ ಆ್ಯಂಡ್​ ಗೈಡ್ಸ್​ನ ಡಾ. ವಿ.ಎಸ್​. ಆಚಾರ್ಯ ಜಿಲ್ಲಾ ತರಬೇತಿ ಕೇಂದ್ರದಲ್ಲಿ ಕರ್ನಾಟಕ ರಾಜ್ಯ ಸಹಕಾರ ಮಹಾಮಂಡಳ (ನಿ.) ಬೆಂಗಳೂರು, ಉಡುಪಿ ಜಿಲ್ಲಾ ಸಹಕಾರ ಯೂನಿಯನ್​ (ನಿ.), ಬಡಗಬೆಟ್ಟು ಕ್ರೆಡಿಟ್​ ಕೋ-ಆಪರೇಟಿವ್​ ಸೊಸೈಟಿ ಲಿ. ಉಡುಪಿ, ಭಾರತಸ್ಕೌಟ್ಸ್​ ಆ್ಯಂಡ್​ ಗೈಡ್ಸ್​ನ ಉಡುಪಿ ಜಿಲ್ಲಾ ಸಂಸ್ಥೆ ಹಾಗೂ ಜಿಲ್ಲಾ ಸಹಕಾರ ಇಲಾಖೆ ಆಶ್ರಯದಲ್ಲಿ ಆಯೋಜಿಸಿದ್ದ ವನಮಹೋತ್ಸವ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.