ಸಾವಯವ ಕೃಷಿಯಲ್ಲಿ ಅಪೂರ್ವ ಸಾಧನೆ

ಸಾವಯವ ಕೃಷಿ ಯೋಜನೆಯನ್ವಯ ಜಿಲ್ಲೆಯ 3 ಸಾವಿರ ಹೆಕ್ಟೇರ್ ಭೂಮಿಯಲ್ಲಿ ಸಾವಯವ ಕೃಷಿ ಚಟುವಟಿಕೆ ಕೈಗೊಳ್ಳುವ ಮೂಲಕ ಜಿಲ್ಲೆ ಸಾವಯವ ಕೃಷಿ ಕ್ಷೇತ್ರದಲ್ಲಿ ಗಮನಾರ್ಹ ಪ್ರಗತಿ ಸಾಧಿಸಿದೆ.

ಯೋಜನೆಯಲ್ಲಿ ಪಾಲ್ಗೊಳ್ಳುವ ರೈತರಿಗೆ ಕೃಷಿ ಉತ್ಪನ್ನ ಆನ್‌ಲೈನ್ ಮೂಲಕ ಮಾರಾಟ ಮಾಡುವ ಅವಕಾಶ ಲಭ್ಯವಾಗಲಿದ್ದು, ತಮ್ಮ ಉತ್ಪನ್ನಗಳಿಗೆ ಧಾರಣೆ ಸ್ವತಃ ತಾವೇ ನಿರ್ಧರಿಸಲು ಅನುವು ಮಾಡಿಕೊಡಲಿದೆ. ಸಾವಯವ ಕೃಷಿ ನೀತಿಯ ಅನುಷ್ಠಾನ ಅಂಗವಾಗಿ 2012ರಲ್ಲಿ ಕಾಸರಗೋಡು ಜಿಲ್ಲೆಯನ್ನು ‘ಸಾವಯವ ಜಿಲ್ಲೆ’ ಎಂದು ಘೋಷಿಸಲಾಗಿದ್ದು, ಪ್ರಮುಖ ಬೆಳೆಗಳಿಗೆ ಸಾವಯವ ಕೃಷಿ ಪದ್ಧತಿ ಅಳವಡಿಸಿಕೊಳ್ಳುವ ಯೋಜನೆ ಪ್ರಾರಂಭಿಸಲಾಗಿದೆ.

ಪಾಲ್ಗೊಳ್ಳುವಿಕೆಯ ಖಾತ್ರಿ ವ್ಯವಸ್ಥೆ ಬಳಸಿಕೊಂಡು ಸಮೂಹ ಆಧಾರಿತವಾಗಿ ಸಾವಯವ ಕೃಷಿ ಉತ್ತೇಜಿಸಲು 2020-21ರಲ್ಲಿ ಭಾರತೀಯ ಪ್ರಕೃತಿ ಕೃಷಿ ಪದ್ಧತಿ ಯೋಜನೆ ಆರಂಭಿಸಲಾಗಿದೆ. ಪಿಜಿಎಸ್ ಇಂಡಿಯಾ ವೆಬ್ ಪೋರ್ಟಲ್‌ನಲ್ಲಿ ನೋಂದಾಯಿಸಿಕೊಂಡು, ಯೋಜನೆ ಮಾನದಂಡಗಳಿಗೆ ಅನುಗುಣವಾಗಿ ಬೆಳೆ ಬೆಳೆಯುವ ರೈತರು 3 ವರ್ಷಗಳ ನಂತರ ಪಿಜಿಎಸ್ ಸಾವಯವ ಪ್ರಮಾಣಪತ್ರ ಪಡೆಯುತ್ತಾರೆ. ಈ ಪ್ರಮಾಣಪತ್ರ ಪಡೆದ ರೈತರು ಮಾತ್ರ ತಮ್ಮ ಉತ್ಪನ್ನಗಳನ್ನು ಸಾವಯವ ಆನ್‌ಲೈನ್ ಮಾರುಕಟ್ಟೆಯಾದ ‘ಜೈವಿಕಖೇತಿ’ ಪೋರ್ಟಲ್ ಮೂಲಕ ಮಾರಾಟ ಮಾಡಲು ಅರ್ಹರಾಗಿರುತ್ತಾರೆ.

ಯೋಜನೆಯನ್ವಯ ಜಿಲ್ಲೆಯನ್ನು ಆರು ಬ್ಲಾಕ್‌ಗಳಾಗಿ ವಿಂಗಡಿಸಲಾಗಿದ್ದು, ರಾಸಾಯನಿಕ ರಸಗೊಬ್ಬರ ಮತ್ತು ಕೀಟನಾಶಕಗಳಿಗೆ ಪರ್ಯಾಯವಾಗಿ ಜೀವಾಮೃತ, ಬೀಜಾಮೃತ ಹಾಗೂ ಪಂಚಗವ್ಯದಂಥ ನೈಸರ್ಗಿಕ ಉತ್ಪನ್ನ ತಯಾರಿಸುವ ತರಬೇತಿ ನೀಡಲಾಗುತ್ತಿದೆ. ಯೋಜನೆಯ ಸುಗಮ ಅನುಷ್ಠಾನ ಖಾತ್ರಿಪಡಿಸಲು ಆಯ್ಕೆ ಮಾಡಿದ ರೈತರ ನೇತೃತ್ವದಲ್ಲಿ ತರಬೇತಿ, ಕ್ಷೇತ್ರಮಟ್ಟದ ಮೇಲ್ವಿಚಾರಣೆ ಮತ್ತು ವಿಚಾರ ಸಂಕಿರಣ ಆಯೋಜಿಸಲಾಗುತ್ತಿದೆ. ಕೃಷಿ ಭವನದ ಆಶ್ರಯದಲ್ಲಿ ಅಧ್ಯಯನ ಪ್ರವಾಸ, ಕಿಸಾನ್ ಮೇಳ ಮತ್ತು ಮಾದರಿ ಕೃಷಿ ಸಹ ಜಾರಿಗೆ ತರಲಾಗುತ್ತಿದೆ. ಜಿಲ್ಲೆಯ ಆರು ಬ್ಲಾಕ್‌ಗಳಲ್ಲಿ ಸಾವಯವ ಕೃಷಿ ಕೈಗೊಳ್ಳಲಾಗುತ್ತಿದ್ದು, ಇದಕ್ಕಾಗಿ ಪ್ರತಿ ಬ್ಲಾಕ್‌ನಲ್ಲಿ 500 ಹೆಕ್ಟೇರ್ ಕೃಷಿಭೂಮಿ ಬಳಸಿಕೊಳ್ಳಲಾಗುತ್ತಿದೆ.

ಜಿಲ್ಲೆಯ ಒಟ್ಟು 6,492 ರೈತರು ಯೋಜನೆಯ ಭಾಗವಾಗಿದ್ದು, 3 ಸಾವಿರ ಹೆಕ್ಟೇರ್ ಭೂಮಿಯನ್ನು ಯಶಸ್ವಿಯಾಗಿ ಸಾವಯವ ಕೃಷಿ ವ್ಯಾಪ್ತಿಗೆ ತಂದಿರುವುದು ಕೃಷಿ ಇಲಾಖೆ ಸಾಧನೆಯಾಗಿದೆ. ಕಾಸರಗೋಡು ಜಿಲ್ಲೆ ಈ ಉಪಕ್ರಮದನ್ವಯ ಗುರುತಿಸಲಾದ ಸಂಪೂರ್ಣ ಪ್ರದೇಶಕ್ಕೆ ‘ಪಿಜಿಎಸ್ ಗ್ರೀನ್ ಸ್ಕೋಪ್’ ಪ್ರಮಾಣಪತ್ರ ಪಡೆಯುವಲ್ಲಿ ಯಶಸ್ವಿಯಾದ ಏಕೈಕ ಜಿಲ್ಲೆಯಾಗಿದೆ. ಈ ವಿಧಾನ ಬಳಸಿ ತೆಂಗು, ಅಡಿಕೆ, ಬಾಳೆ, ಕಾಳುಮೆಣಸು, ತರಕಾರಿಗಳು ಮತ್ತು ಹಣ್ಣುಗಳಂಥ ಬೆಳೆ ಬೆಳೆಯಲಾಗುತ್ತದೆ.