ಕೇಶವರಾಯ ಪ್ರಭು ಅಂತಿಮ ದರ್ಶನ ಪಡೆದ ಕೇಂದ್ರ ಸಚಿವೆ

ಉಡುಪಿ: ಆರ್‌ಎಸ್‌ಎಸ್‌ನ ಹಿರಿಯ ಕಾರ್ಯಕರ್ತ ಕೇಶವರಾಯ ಪ್ರಭು (80) ಅವರು ಮಣಿಪಾಲದ ಹುಡ್ಕೋ ಕಾಲೋನಿಯ ಸ್ವಗೃಹದಲ್ಲಿ ನಿಧನರಾದ ಹಿನ್ನೆಲೆಯಲ್ಲಿ ಗುರುವಾರ ಬೆಳಗ್ಗೆ ಕೇಂದ್ರ ಸಚಿವೆ ಶೋಭಾ ಕರಂದ್ಲಾಜೆ ಉಡುಪಿಗೆ ಆಗಮಿಸಿ ಅಂತಿಮ ದರ್ಶನ ಪಡೆದು ಸಂತಾಪ ಸೂಚಿಸಿದರು.

ಈ ಸಂದರ್ಭದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು,ಕೇಶವರಾಯ ಪ್ರಭು ಅವರು ಸಮಾಜಕ್ಕಾಗಿ ತಮ್ಮ ಜೀವನವನ್ನೇ ಮುಡುಪಾಗಿಟ್ಟವರು. ವೃತ್ತಿಯಲ್ಲಿದ್ದರೂ ದಿನದ ಬಹುಪಾಲು ಸಮಯವನ್ನು ಸಂಘದ ಸೇವಾ ಕಾರ್ಯಕ್ಕೆ ಮೀಸಲಿಟ್ಟಿದ್ದರು. ಮಣಿಪಾಲದ ಹುಡ್ಕೋ ಕಾಲೋನಿಯಲ್ಲಿರುವ ಅವರ ಮನೆ ಅತ್ಯಂತ ಚಿಕ್ಕದಾಗಿತ್ತು. ಆದರೆ ಆ ಮನೆ ಹಲವಾರು ಜನರಿಗೆ ಆಶ್ರಯ ನೀಡಿದೆ. 2014ರಲ್ಲಿ ನಾನು ಲೋಕಸಭಾ ಅಭ್ಯರ್ಥಿಯಾಗಿ ಮಣಿಪಾಲಕ್ಕೆ ಬಂದಾಗ ಈ ಮನೆಯೇ ನನಗೆ ಆಶ್ರಯ ನೀಡಿತ್ತು. ಸುಮಾರು ಮೂರು ತಿಂಗಳು ಇಲ್ಲಿಯೇ ಇದ್ದು ಊಟ ಮಾಡಿದ್ದೆ ಎಂದರು.

ತಮಗೆ ಇಬ್ಬರು ಮಕ್ಕಳಿದ್ದರೂ ಸಂಘದ ಸೇವಾ ಕಾರ್ಯಕ್ಕೆ ಅನುಕೂಲವಾಗಲಿ ಎಂಬ ಉದ್ದೇಶದಿಂದ ತಮ್ಮ ಮನೆಯನ್ನು ಸೇವಾ ಕಾರ್ಯಗಳಿಗೆ ಬಳಸುವಂತೆ ಕೇಶವರಾಯ ಪ್ರಭು ಅವರು ಅನಾರೋಗ್ಯದ ಸಂದರ್ಭದಲ್ಲಿ ಸಂಘದ ಪ್ರಮುಖರನ್ನು ಕರೆಸಿ ಬರೆದುಕೊಟ್ಟಿದ್ದರು ಎಂದು ಶೋಭಾ ಕರಂದ್ಲಾಜೆ ತಿಳಿಸಿದರು.

“ಇದು ರಾಷ್ಟ್ರೀಯ ಸ್ವಯಂಸೇವಕ ಸಂಘ ನಮಗೆ ಕಲಿಸುವ ಪಾಠ. ಇಂದು ಆರ್‌ಎಸ್‌ಎಸ್ ಎಂದರೇನು ಎಂದು ಚರ್ಚೆ ಮಾಡುವಾಗ ಕೇಶವರಾಯ ಪ್ರಭು ಅವರಂತಹವರೇ ಅದಕ್ಕೆ ಉತ್ತರ. ಆದರ್ಶಗಳನ್ನು ಕೇವಲ ಭಾಷಣಗಳಿಂದ ಕಲಿಯಲು ಸಾಧ್ಯವಿಲ್ಲ. ತಮ್ಮ ಬದುಕಿನ ಮೂಲಕ ಅವರು ನಮಗೆ ಪ್ರೇರಣೆ ನೀಡಿದ್ದಾರೆ ಎಂದು ಕೇಂದ್ರ ಸಚಿವೆ ಹೇಳಿದರು.