ಉಡುಪಿ: ಶನಿವಾರ (ಜೂ.13) ಬೆಳ್ಳಂಬೆಳಗ್ಗೆ ಕೇಂದ್ರ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್​ ಅವರು ವಿವಿಧ ದೇಗುಲಗಳಿಗೆ ಭೇಟಿ ನೀಡಿ ರಾಷ್ಟ್ರದ ಒಳಿತಿಗಾಗಿ ಉಡುಪಿಯ ವಿವಿಧ ದೇವರಲ್ಲಿ ಪ್ರಾರ್ಥನೆ ಮಾಡಿದರು.

ಬೆಳಗ್ಗೆ 8 ಗಂಟೆಗೆ ಕಾಪು ಮಾರಿಗುಡಿಗೆ ತೆರಳಿ ದೇವಿಯ ದರ್ಶನ, ವಿಶೇಷ ಪೂಜೆಯಲ್ಲಿ ಪಾಲ್ಗೊಂಡರು. ಬಳಿಕ 8:45ಕ್ಕೆ ಉಡುಪಿಗೆ ಆಗಮಿಸಿದರು.

ಕನಕನ ಕಿಂಡಿಯಿಂದ ಶ್ರೀಕೃಷ್ಣನ ದರ್ಶನದಿಂದ ಸಕಲ ತಾಪತ್ರಯ ಪರಿಹಾರ ಆಗುತ್ತದೆಂಬ ನಂಬಿಕೆಯಿದ್ದು, ಸಚಿವೆ ನಿರ್ಮಲಾ ಅವರೂ ಸಹ ಕನಕನ ಕಿಂಡಿಯತ್ತ ಧಾವಿಸಿ ಅಲ್ಲಿಂದ ಶ್ರೀಕೃಷ್ಣನ ದರ್ಶನ ಮಾಡಿದರು. ಇಲ್ಲಿಂದ ಉಡುಪಿ ಮಠಕ್ಕೆ ತೆರಳಿದರು.

ಶ್ರೀಕೃಷ್ಣ ಮಠದ ದ್ವಾರದಲ್ಲಿ ಪರ್ಯಾಯ ಶೀರೂರು ಮಠದ ವತಿಯಿಂದ ಸಚಿವೆ ನಿರ್ಮಲಾ ಅವರನ್ನು ಪೂರ್ಣಕುಂಭದೊಂದಿಗೆ ಸ್ವಾಗತಿಸಿ, ಮಲ್ಲಿಗೆ ಹೂವಿನ ಹಾರ ನೀಡಿ ಬರಮಾಡಿಕೊಳ್ಳಲಾಯಿತು. ಬಳಿಕ ನವಗ್ರಹಗಳ ದೋಷ ಪರಿಹಾರಕ್ಕಾಗಿ ಮಠದೊಳಗಿರುವ ನವಗ್ರಹ ಕಿಂಡಿಯ ಮೂಲಕ ಶ್ರೀಕೃಷ್ಣನ ದರ್ಶನ ಪಡೆದು, ರಾಷ್ಟ್ರಕ್ಕೆ ಎದುರಾಗಿರುವ ಸಕಲ ಬಿಕ್ಕಟು ನಿವಾರಿಸು ಎಂಬಂರ್ಥದಲ್ಲಿ ಕೈಮುಗಿದು ನಿಂತು ಕೆಲಕ್ಷಣ ದೇವರಲ್ಲಿ ಪ್ರಾರ್ಥಿಸಿದರು.