ಉಡುಪಿ: ಸಾಧನೆಗಳ ಮಾತಿಲ್ಲದ, ಆರೋಪ-ನಿಂದನೆಗಳಿಲ್ಲದ ಹಾಗೂ ಆಸೆ, ಕನಸುಗಳ ಬೆನ್ನುಹತ್ತಿ ಜಗತ್ತು ಉಡುಪಿಯತ್ತ ಹೆಮ್ಮೆಯಿಂದ ನೋಡುವ ಛಲ, ಗುರಿ ಮತ್ತು ಸಂಕಲ್ಪದೊಂದಿಗೆ ಜು.12ರಂದು ಸಂಜೆ 5 ಗಂಟೆಗೆ ಕಿದಿಯೂರು ಹೋಟೆಲ್​ನ ಶೇಷಶಯನ ಹಾಲ್​ನಲ್ಲಿ 'ಉಡುಪಿ ವಿಷನ್​ 20-30-35' ಎಂಬ ಚಿಂಥನ-ಮಂಥನ ಸಭೆ ಆಯೋಜಿಸಲಾಗಿದೆ ಎಂದು ಚೇಂಬರ್​ ಆಫ್​ ಕಾಮರ್ಸ್​ ಆ್ಯಂಡ್​ ಇಂಡಸ್ಟ್ರೀಯ ಅಧ್ಯಕ್ಷ ಅಮ್ಮುಂಜೆ ಪ್ರಭಾಕರ್​ ನಾಯಕ್​ ತಿಳಿಸಿದರು. 

ಉಡುಪಿಯ ಪತ್ರಿಕಾ ಭವನದಲ್ಲಿ ಶನಿವಾರ (ಜು.11) ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಸಮೃದ್ಧ, ಸುಸ್ಥಿರ ಹಾಗೂ ಆದರ್ಶ ಉಡುಪಿ ನಿರ್ಮಾಣದ ಉದ್ದೇಶವೇ ಈ ಚಿಂಥನ-ಮಂಥನದ ಉದ್ದೇಶವಾಗಿದೆ ಎಂದರು.

2035ರ ವೇಳೆಗೆ ಉಡುಪಿ ಜಿಲ್ಲೆಯನ್ನು ಭಾರತದ ಅತ್ಯುತ್ತಮ, ತಂತ್ರಜ್ಞಾನ ಆಧಾರಿತ, ಪರಿಸರ ಸ್ನೇಹಿ, ಹೂಡಿಕೆಗೆ ಆಕರ್ಷಿಸುವ, ಸುರತ, ಸಾಂಸ್ಕೃತಿಕವಾಗಿ ಶ್ರೀಮಂತ ಹಾಗೂ ಜೀವನ ಮಟ್ಟದಲ್ಲಿ ಮಾದರಿ ಜಿಲ್ಲೆಯಾಗಿಸುವುದು ನಮ್ಮ ದೂರದೃಷ್ಟಿಯಾಗಿದೆ. ಜಿಲ್ಲೆಯ ಅಭಿವೃದ್ಧಿಗೆ ಸಂಬಂಧಿಸಿದ ಎಲ್ಲ ಪಾಲುದಾರರನ್ನು ಒಂದೇ ವೇದಿಕೆಗೆ ತಂದು ಮುಂದಿನ 10 ವರ್ಷದಲ್ಲಿ ಸಮಗ್ರ ಅಭಿವೃದ್ಧಿಗೆ ಕಾರ್ಯ ಸಾಧ್ಯವಾದ ನೀಲಿನಕ್ಷೆ ರೂಪಿಸುವುದು ನಮ್ಮ ಧ್ಯೇಯವಾಗಿದೆ ಎಂದರು.

ಸಂಸ್ಥೆಯ ಗೌರವ ಕಾರ್ಯದರ್ಶಿ ಡಾ. ವಿಜಯೇಂದ್ರ ವಿ. ರಾವ್​ ಮಾತನಾಡಿ, ನಾವು ಕೇವಲ ಅಭಿವೃದ್ಧಿಯ ಕನಸು ಕಾಣುವುದಿಲ್ಲ. ಅಸೋಸಿಯೇಷನ್​ ಆಫ್​ ಕನ್​ಸಲ್ಟಿಂಗ್​ ಸಿವಿಲ್​ ಇಂಜಿನಿಯರ್ಸ್​ ಆ್ಯಂಡ್​ ಆರ್ಕಿಟೆಕ್ಟ್​, ಕ್ರೆಡೈ ಹಾಗೂ ಬಿಲ್ಡರ್ಸ್​ ಅಸೋಸಿಯೇಷನ್​ ಆಫ್​ ಇಂಡಿಯ ಉಡುಪಿ ಹಾಗೂ ಇನ್ನಿತರ ಸಂಘ-ಸಂಸ್ಥೆಗಳ ಸಹಭಾಗಿತ್ವದಲ್ಲಿ 'ಉಡುಪಿ ವಿಷನ್​ 20-30-35' ಎಂಬ ಚಳವಳಿ ಆರಂಭಿಸಲಿದ್ದೇವೆ. ಅವುಗಳನ್ನು ಕಾರ್ಯರೂಪಕ್ಕೆ ತಂದು ಮುಂದಿನ ಪೀಳಿಗೆಗೆ ಶಾಶ್ವತ ಪರಂಪರೆಯಾಗಿ ನೀಡುತ್ತೇವೆ ಎಂದರು.

ಸಮನ್ವಯಕರಾಗಿ ಜಯಕರ್​ ಶೆಟ್ಟಿ ಇಂದ್ರಾಳಿ, ಡಾ. ಪಿ.ಎ. ಆಚಾರ್​, ಡಾ. ಶಿವಾನಂದ್​ ನಾಯಕ್​, ಸುರೇಂದ್ರ ನಾಯಕ್​, ಪ್ರಸಾದ್​ ಉಪಾಧ್ಯ, ಕಿರಣಕುಮಾರ್​ ಪಾಳ್ಗೊಳ್ಳಲಿದ್ದಾರೆ. ಇಂದಿನ ಚಿಂತನೆ ನಾಳಿನ ಇತಿಹಾಸ ನಿರ್ಮಾಣಕ್ಕೆ ಕಾರಣವಾಗಲಿದೆ ಎಂದರು.

ಸುದ್ದಿಗೋಷ್ಠಿಯಲ್ಲಿ ಎಸಿಸಿಇಎ ಅಧ್ಯಕ್ಷ ಭಗವಾನ್​ ದಾಸ್​, ಮಾಜಿ ಅಧ್ಯಕ್ಷ ಯೋಗೀಶ್ಚಂದ್ರ ದಾರ, ಕ್ರೆಡೈನ ಜನರಲ್​ ಸೆಕ್ರೆಟರಿ ಅಮಿತ್​ ಅರವಿಂದ್​, ಎಸಿಸಿಇಎ ಇಂಜಿನಿಯರ್​ ನಿಶ್ಚಲ್​ ಜಾನ್​ ಇದ್ದರು.