ಉಡುಪಿ: ಯಾವುದೇ ಕ್ಷೇತ್ರ ಅಭಿವೃದ್ಧಿಯಾಗಬೇಕಾದರೆ ಅನೇಕ ಸವಾಲುಗಳನ್ನೂ ಎದುರಿಸಬೇಕಾಗುತ್ತದೆ. ಎಲ್ಲರೂ ಒಟ್ಟಾಗಿ ಒಳಿತಿಗಾಗಿ ಮುಂದಡಿಯಿಟ್ಟಾಗ ತೊಡಕುಗಳನ್ನೆಲ್ಲ ನಿವಾರಿಸಿಕೊಂಡು ಯಶಸ್ಸು ಕಾಣಬಹುದು. ಉಡುಪಿಯು ಜಾಗತಿಕವಾಗಿ ಗಮನ ಸೆಳೆಯಬಲ್ಲ ತಾಣವಾಗಿದ್ದು ಇಲ್ಲಿನ ಸಮುದ್ರ, ಪಶ್ಚಿಮ ಘಟ್ಟ ಪ್ರದೇಶಗಳು ಪ್ರವಾಸೋದ್ಯಮಕ್ಕೆ ಪೂರಕವಾಗಿವೆ. ಗ್ರಾಮೀಣ ಭಾಗವೂ ಸಶಕ್ತವಾಗುವ ನಿಟ್ಟಿನಲ್ಲಿ ಜಿಲ್ಲೆಯಲ್ಲಿ ಅಭಿವೃದ್ಧಿ ಕಾರ್ಯ ಆಗಬೇಕಿದೆ. ಆ ನಿಟ್ಟಿನಲ್ಲಿ ಹೊಸ ವಿಚಾರಧಾರೆಗಳೊಂದಿಗೆ 'ವಿಷನ್​ ಉಡುಪಿ'ಯು ಜಿಲ್ಲೆಯ ಸಂಸ್ಕೃತಿ ಉಳಿಸಿಕೊಂಡು ಮಹಿಳಾ&ಯುವ ಸಬಲೀಕರಣ ಚಳವಳಿಗೆ ವೇದಿಕೆಯಾಗಲಿ ಎಂದು ಜಿಪಂ ಸಿಇಒ ಪ್ರತೀಕ್​ ಬಾಯಲ್​ ಆಶಿಸಿದರು. 

ಉಡುಪಿಯ ಕಿದಿಯೂರು ಹೋಟೆಲ್​ನ ಶೇಷಶಯನ ಸಭಾಂಗಣದಲ್ಲಿ ಉಡುಪಿ ಚೇಂಬರ್​ ಆಫ್​ ಕಾಮರ್ಸ್​ ಆ್ಯಂಡ್​ ಇಂಡಸ್ಟ್ರೀ ವತಿಯಿಂದ ಹಾಗೂ ಅಸೋಸಿಯೇಷನ್​ ಆಫ್​ ಕನ್ಸಲ್ಟಿಂಗ್​ ಸಿವಿಲ್​ ಇಂಜಿನಿಯರ್ಸ್​ ಆ್ಯಂಡ್​ ಆರ್ಕಿಟೆಕ್ಟ್​ ಮತ್ತು ಬಿಲ್ಡರ್ಸ್​ ಅಸೋಸಿಯೇಷನ್​ ಆಫ್​ ಇಂಡಿಯಾ ಉಡುಪಿ ಇವರ ಸಹಕಾರದಲ್ಲಿ ಭಾನುವಾರ ಸಂಜೆ ಆಯೋಜಿಸಿದ್ದ 'ಉಡುಪಿ ವಿಷನ್​ 20-30-35' ಎಂಬ ಚಿಂತನ-ಮಂಥನ ಚಳವಳಿಗೆ ಚಾಲನೆ ನೀಡಿ ಮಾತನಾಡಿದರು.

ಸಂಸದ ಕೋಟ ಶ್ರೀನಿವಾಸ ಪೂಜಾರಿ, ಶಾಸಕರಾದ ಸುನೀಲ್​ ಕುಮಾರ್​, ಯಶ್​ಪಾಲ್​ ಸುವರ್ಣ, ಗುರುರಾಜ ಗಂಟಿಹೊಳೆ, ಕಿರಣ್​ ಕುಮಾರ್​ ಕೊಡ್ಗಿ, ಗುರ್ಮೆ ಸುರೇಶ್​ ಶೆಟ್ಟಿ , ವಿಪ ಸದಸ್ಯ ಧನಂಜಯ್​ ಸರ್ಜಿ, ಮಾಜಿ ಸಂಸದ ಜಯಪ್ರಕಾಶ್​ ಹೆಗ್ಡೆ, ಮಾಜಿ ಸಚಿವ ವಿನಯ ಕುಮಾರ್​ ಸೊರಕೆ, ಮುನಿಯಾಲು ಉದಯ ಕುಮಾರ್​ ಶೆಟ್ಟಿ, ಜಿಲ್ಲಾಧಿಕಾರಿ ಸ್ವರೂಪಾ ಟಿ.ಕೆ., ಅಪರ ಜಿಲ್ಲಾಧಿಕಾರಿ ಆಬೀದ್​ ಗದ್ಯಾಳ್​, ಕರಾವಳಿ ಅಭಿವೃದ್ಧಿ ಮಂಡಳಿ ಅಧ್ಯಕ್ಷ ಎಂ.ಎ.ಗಫೂರ್​, ಉಡುಪಿ ನಗರಾಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ದಿನಕರ್​ ಹೇರೂರು, ಉದ್ಯಮಿ ಪ್ರಸಾದ್​ ರಾಜ್​ ಕಾಂಚನ್​ ಪಾಲ್ಗೊಂಡಿದ್ದರು.

ಸಭೆಯ ಆರಂಭದಲ್ಲಿ ವಂದೇಮಾತರಂ ಗೀತೆ ಪ್ರಸ್ತುತಪಡಿಸಲಾಯಿತು. ಎಸಿಸಿಇಎ ಮಾಜಿ ಅಧ್ಯಕ್ಷ ಯೋಗೀಶ್ಚಂದ್ರ ದಾರಾ ಸ್ವಾಗತಿಸಿದರು. ಚೇಂಬರ್​ ಆಫ್​ ಕಾಮರ್ಸ್ ನ ಗೌರವ ಕಾರ್ಯದರ್ಶಿ ಹಾಗೂ ಮುಖ್ಯ ಸಂಯೋಜಕ ಡಾ. ವಿಜಯೇಂದ್ರ ವಿ. ರಾವ್​ ಕಾರ್ಯಕ್ರಮ ನಿರೂಪಿಸಿದರು.