ಉಡುಪಿ: ಸತತ ಪ್ರಯತ್ನದಿಂದ ಆವಿಷ್ಕರಿಸಿದ 200ಎಕ್ಸ್​ ಭೂವೀಕ್ಷಣಾ ದ್ವಿನೇತ್ರ ದೂರದರ್ಶಕ (ಬೈನಾಕ್ಯೂಲರ್​)ಕ್ಕೆ ಗೋಲ್ಡನ್​ ಬುಕ್​ ಆಫ್​ ವರ್ಲ್ಡ್​ ರೆಕಾರ್ಡ್ಸ್​ನಿಂದ ಶ್ರೇಷ್ಠತೆಯ ಪ್ರಮಾಣಪತ್ರ ಲಭಿಸಿದೆ. ಈ ಬೈನಾಕ್ಯೂಲರ್​ ವಿಶ್ವದಲ್ಲಿಯೇ ಅತ್ಯಂತ ಕಡಿಮೆ ಬೆಲೆಯದ್ದಾಗಿದ್ದು ಪ್ರಪಂಚದ ಗಮನ ಸೆಳೆದಿದೆ ಎಂದು ಉಡುಪಿ ಪರ್ಕಳದ ವಿಜ್ಞಾನಿ ಆರ್​.ಮನೋಹರ್​ ಮಾಹಿತಿ ನೀಡಿದರು.

ಉಡುಪಿಯ ಪತ್ರಿಕಾ ಭವನದಲ್ಲಿ ಶನಿವಾರ (ಸೆ.19) ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಬಾಲ್ಯದಿಂದಲೇ ನನಗೆ ದೂರದರ್ಶಕದ ಕುರಿತು ಆಸಕ್ತಿಯಿತ್ತು. ಊದಿನಕಡ್ಡಿಯ ಅಂಡೆಯಲ್ಲಿ ದುರ್ಬೀನ್​ ತಯಾರಿಸುತ್ತಿದೆ. ಇದೇ ನನಗೆ ವಿಶಿಷ್ಟವಾದ ದೂರದರ್ಶಕ ಆವಿಷ್ಕಾರ ಮಾಡಲು ಮೂಲ ಪ್ರೇರಣೆಯಾಯಿತು ಎಂದರು.

ವಿಶ್ವದಲ್ಲಿ ಒಂದೇ ಕಣ್ಣಿನಲ್ಲಿ ನೋಡಬಹುದಾದ ಕೇವಲ 40ಎಕ್ಸ್​ ಸಾಮರ್ಥ್ಯದ ದೂರದರ್ಶಕವಿದೆ. ನಾನು ಆವಿಷ್ಕಾರ ಮಾಡಿರುವ ಈ ದೂರದರ್ಶಕದಲ್ಲಿ ಎರಡೂ ಕಣ್ಣಿನಿಂದ ಏಕಕಾಲದಲ್ಲಿ ನೋಡಲು ಅವಕಾಶ ಇರುವ ವಿಶಿಷ್ಟತೆ ಹೊಂದಿದೆ. ಸುಮಾರು 20 ಕಿ.ಮೀ. ದೂರದ ವಸ್ತು ಅಥವಾ ಪ್ರಕೃತಿಯ ಚಿತ್ರಣ ಅತ್ಯಂತ ಕ್ಲಿಯರ್​ ಆಗಿ ಕಾಣಿಸುತ್ತದೆ. 1984ರಿಂದ ಎರಡೂ ಕಣ್ಣಿನಿಂದ ನೋಡಬಹುದಾದ ಬೈನಾಕ್ಯೂಲರ್​ ಆವಿಷ್ಕಾರ ಮಾಡುತ್ತಿದ್ದೆ. ಪೇಟೆಂಟ್​ ಸಲುವಾಗಿ ಅದನ್ನು ಬಹಿರಂಗ ಮಾಡಿರಲಿಲ್ಲ. 40 ವರ್ಷದ ಬಳಿಕ ಅದನ್ನು ಪ್ರಚಾರ ಮಾಡಿದ್ದೇನೆ ಎಂದರು.

ವಿಶ್ವದಲ್ಲಿ ಲಭ್ಯವಿರುವ ಬೈನಾಕ್ಯೂಲರ್​ಗಿಂತ ನನ್ನ ಆವಿಷ್ಕಾರದ ದೂರದರ್ಶಕ ಬೆಲೆಯೂ ಕಡಿಮೆಯಿದೆ. ವಿದೇಶದ ವಿವಿಧ ಖ್ಯಾತ ಕಂಪನಿಗಳ ಬೆಲೆ 4 ಲಕ್ಷ ರೂ.ನಿಂದ 11 ಲಕ್ಷ ರೂ.ವರೆಗೆ ಇದೆ. ಆದರೆ, ನನ್ನ ಬೈನಾಕ್ಯೂಲರ್​ ಬೆಲೆ ಕೇವಲ 85 ಸಾವಿರ ರೂ. ಇದೆ. ಅಲ್ಲದೆ, 3 ಬಗೆಯ ಝೂಮ್​ ವ್ಯವಸ್ಥೆ ಹೊಂದಿರುವುದು ಈ ದೂರದರ್ಶಕದ ವಿಶೇಷತೆಯಾಗಿದೆ ಎಂದರು.

ಗೆಲಿಲಿಯೋ, ನ್ಯೂಟನ್​ ಅವರ ದೂರದರ್ಶಕವೂ ಸೇರಿದಂತೆ ಮಾರುಕಟ್ಟೆಯಲ್ಲಿ ಲಭ್ಯವಿರುವ ಎಲ್ಲವೂ ಸಹ 40ಎಕ್ಸ್​ಗಿಂತ ಹೆಚ್ಚಿನ ಸಾಮರ್ಥ್ಯ ಹೊಂದಿಲ್ಲ. ಆದರೆ, ನನ್ನ ಆವಿಷ್ಕಾರದ ಬೈನಾಕ್ಯೂಲರ್​ 200ಎಕ್ಸ್​, 240ಎಕ್ಸ್​ ಸಾಮರ್ಥ್ಯ ಹೊಂದಿದ್ದು 200 ಪಟ್ಟು ಹೆಚ್ಚಿನ ವೀಕ್ಷಣಾ ಸಾಮರ್ಥ್ಯ ಹೊಂದಿದೆ. ಸೌರಗ್ರಹಗಳ ಕೌತುಕ, ಸೂಪರ್​ ಮೂನ್​ನಂತಹ ದೃಶ್ಯವನ್ನು ಈ ಸಾಧನದ ಮೂಲಕ ಅತ್ಯಂತ ಹತ್ತಿರದಿಂದ ನೋಡಬಹುದಾಗಿದೆ. ಶಾಲಾ-ಕಾಲೇಜುಗಳಲ್ಲಿ ಉಚಿತವಾಗಿ ಪ್ರಾತ್ಯಕ್ಷಿಕೆಯನ್ನೂ ನೀಡುತ್ತಿರುವುದಾಗಿ ಆರ್​.ಮನೋಹರ್​ ತಿಳಿಸಿದರು.

ಸಮಾಜಿಕ ಕಾರ್ಯಕರ್ತ ಗಣೇಶ್​ ರಾಜ್​ ಸರಳಬೆಟ್ಟು ಮಾತನಾಡಿ, ಮಲ್ಪೆಯ ಸೇಂಟ್​ ಮೇರೀಸ್​ ದ್ವೀಪದಲ್ಲಿ ಜಿಲ್ಲಾಡಳಿತದಿಂದ ಡಿಜಿಟಲ್​ ಮಾದರಿ ತಾರಾಲಯ ರಚಿಸಿದರೆ ಪ್ರವಾಸೋದ್ಯಮಕ್ಕೂ ಅನುಕೂಲ ಆಗಲಿದೆ. ಇಲ್ಲಿ ಮನೋಹರ್​ ಅವರು ಆವಿಷ್ಕರಿಸಿದ ಬೈನಾಕ್ಯೂಲರ್​ ಅಳವಡಿಸಿದರೆ ಆ ಸಾಧನದ ಮೂಲಕ ಆಕಾಶಕಾಯದ ಕೌತುಕ ಹಾಗೂ ಪ್ರಕೃತಿಯ ಸೌಂದರ್ಯ ವೀಕ್ಷಿಸಲು ಪ್ರವಾಸಿಗರಿಗೆ ಸಹಕಾರಿಯಾಗಲಿದೆ ಎಂದರು.

ಸುದ್ದಿಗೋಷ್ಠಿಯಲ್ಲಿ ಗುರುರಾಜ್​ ಎಂ. ಶೆಟ್ಟಿ, ಜಯ ಶೆಟ್ಟಿ ಬನ್ನಂಜೆ, ಪ್ರಕಾಶ್​ ಭಂಡಾರಿ ಕೊಳಲಗಿರಿ ಇದ್ದರು.