ಮಾರಣಾಂತಿಕ ಆಯುಧ ಹೊಂದಿದ್ದ ಯುವಕನ ಬಂಧನ

* ಮಣಿಪಾಲ ಠಾಣೆ ಪೊಲೀಸರ ದಾಳಿ

ಉಡುಪಿ: ಸಾರ್ವಜನಿಕ ರಸ್ತೆಯಲ್ಲಿ ಮಾರಣಾಂತಿಕ ಆಯುಧ ಇಟ್ಟುಕೊಂಡು ಅನುಮಾನಾಸ್ಪದವಾಗಿ ವರ್ತಿಸುತ್ತಿದ್ದ ಯುವಕನ್ನು ಮಣಿಪಾಲ ಠಾಣೆ ಪೊಲೀಸರು ಬಂಧಿಸಿದ್ದಾರೆ. ಕಿನ್ನಿಮುಲ್ಕಿಯ ಮಾಂಡವಿ ಪ್ಯಾರಡೈಸ್​ನ ನಿವಾಸಿ ಮಹಮ್ಮದ್​ ಉಮರ್​ ಸಾಹೇಬ್​ ಪರ್ವೇಜ್​ (26) ಬಂಧಿತ ಆರೋಪಿಯಾಗಿದ್ದು, ಆತನ ಬಳಿಯಿದ್ದ ದೊಡ್ಡ ಚಾಕು, ಮಚ್ಚು ಹಾಗೂ ಬೈಕ್​ ವಶಕ್ಕೆ ಪಡೆಯಲಾಗಿದೆ.

ಅ.24ರಂದು ಮಣಿಪಾಲ ಠಾಣೆಯ ಪೊಲೀಸ್​ ಉಪನಿರೀಕ್ಷಕ (ತನಿಖೆ) ಶಂಭುಲಿಂಗಯ್ಯ ಎಂ.ಇ. ಗಸ್ತಿನಲ್ಲಿರುವಾಗ ದೊರೆತ ಖಚಿತ ಮಾಹಿತಿಯಂತೆ ದಾಳಿ ನಡೆಸಿದ್ದರು.

ಮಣಿಪಾಲ ವಿದ್ಯಾರತ್ನ ನಗರದ ಮಾಂಡವಿ ಎಮರಾಲ್ಡ್​ ಕಟ್ಟಡದ ಹಿಂಭಾಗದ ಸಾರ್ವಜನಿಕ ರಸ್ತೆಯಲ್ಲಿ ಮಾರಣಾಂತಿಕ ಆಯುಧ ಇಟ್ಟುಕೊಂಡು ಯುವಕ ಅನುಮಾನಾಸ್ಪದವಾಗಿ ವರ್ತಿಸುತ್ತಿದ್ದನು. ಆತನನ್ನು ವಶಕ್ಕೆ ಪಡೆದು ವಿಚಾರಣೆಗೊಳಪಡಿಸಿದಾಗ ಕಬ್ಬಿಣದ ಮಚ್ಚು (ಲಾಂಗ್​) ಹಾಗೂ ಕಬ್ಬಿಣದ ಚಾಕು ಇದ್ದು ಅದನ್ನು ವಶಪಡಿಸಿಕೊಳ್ಳಲಾಗಿದೆ.

ಮಣಿಪಾಲ ಪೊಲೀಸ್​ ಠಾಣೆಯಲ್ಲಿ ಶಂಭುಲಿಂಗಯ್ಯ ಅವರು ಪ್ರಕರಣ ದಾಖಲಿಸಿದ್ದಾರೆ. ಆರೋಪಿಯನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದ್ದು, ನ್ಯಾಯಾಂಗ ಬಂಧನ ವಿಧಿಸಲಾಗಿದೆ.

ಗರುಡಾ ಗ್ಯಾಂಗ್​ ವಿರುದ್ಧ ವೈಮನಸ್ಸು

ಪೊಲೀಸರು ಮಚ್ಚು ಮತ್ತು ಚಾಕು ಇಟ್ಟುಕೊಂಡಿದ್ದೇಕೆ ಎಂದು ಪ್ರಶ್ನಿಸಿದಾಗ ಆರೋಪಿ ಮಹಮ್ಮದ್​ ಪರ್ವೇಜ್​, ನನ್ನ ವಿರುದ್ಧ ಮಾದಕ ವಸ್ತು ಮಾರಾಟ ಹಾಗೂ ಸೇವನೆ ಕುರಿತು ಈಗಾಗಲೇ ಉಡುಪಿ ನಗರ, ಶಿರ್ವ, ಉಡುಪಿ ಸೆನ್​ ಮತ್ತು ಮಂಗಳೂರು ನಗರದ ಕಾವೂರು ಪೊಲೀಸ್​ ಠಾಣೆಯಲ್ಲಿ ಪ್ರಕರಣವಿದೆ. ನನಗೆ ದಾವೂದ್​, ಇಸಾಕ್​ ಹಾಗೂ ಗರುಡಾ ಗ್ಯಾಂಗ್​ನ ಕೆಲವರೊಂದಿಗೆ ವೈಮನಸ್ಸು ಇದ್ದು ಅವರ ಮೇಲೆ ಹಲ್ಲೆ ಮಾಡಲು ಈ ಆಯುಧ ಇಟ್ಟುಕೊಂಡಿರುವುದಾಗಿ ತಿಳಿಸಿದ್ದಾನೆ.