ಕೃಷ್ಣನೂರಿಗೆ ಬಂದ ಗೌರಿ-ಗಣೇಶ

ಗೌರಿ-ಗಣೇಶ ಹಬ್ಬದ ನಿಮಿತ್ತ ಉಡುಪಿಯ ಪ್ರಮುಖ ರಸ್ತೆಗಳ ಇಕ್ಕೆಲಗಳಲ್ಲಿ ಮಾರಾಟಕ್ಕೆ ಬಂದಿರುವ ಹೂವುಗಳು. (ಚಿತ್ರ: ಅರುಣಾಚಲ ಹೆಬ್ಬಾರ್)

Published on:

12 Sep 2026, 6:28 pm

* ಲಂಬೋದರನ ಮನೆಗೆ ತರಲು ಭಕ್ತರ ಸಿದ್ಧತೆ

* ಗಣಪನ ಆರಾಧನೆಗೆ ಪೂಜಾ ಸಾಮಾಗ್ರಿ ಖರೀದಿ

* ವಿನಾಯಕನ ಹಬ್ಬಕ್ಕೆ ಉಡುಪಿ ಜಿಲ್ಲೆ ಸಜ್ಜು

ಪ್ರಶಾಂತ ಭಾಗ್ವತ ಉಡುಪಿ

ಗೌರಿ-ಗಣೇಶನ ಹಬ್ಬದ ಆಚರಣೆಗೆ ಕ್ಷಣಗಣನೆ ಆರಂಭಗೊಂಡಿದ್ದು, ಭಕ್ತರ ಮನೆ-ಮನಗಳಲ್ಲಿ ಸಂಭ್ರಮ ಕಂಡುಬರುತ್ತಿದೆ. ಜಿಲ್ಲೆಯಲ್ಲಿರುವ ಗಣೇಶನ ದೇವಾಲಯಗಳಲ್ಲಿ ಚೌತಿ ಹಬ್ಬಕ್ಕೆ ಅಗತ್ಯ ಸಿದ್ಧತೆ ಮಾಡಿಕೊಳ್ಳಲಾಗುತ್ತಿದೆ. ಸಾರ್ವಜನಿಕ ಗಣೇಶೋತ್ಸವ ಸಮಿತಿಗಳೂ ಸಹ ಕಳೆದ ವರ್ಷಕ್ಕಿಂತ ಉತ್ತಮವಾಗಿ ಆಚರಣೆಗೆ ಯೋಜಿಸಿದೆ.

ಉಡುಪಿ ನಗರದ ಮಾರುಕಟ್ಟೆಗಳಲ್ಲಿ ಚೌತಿಯ ಕಳೆ ಕಂಡುಬರುತ್ತಿದ್ದು, ಜನರು ಪೂಜಾ ಸಾಮಗ್ರಿ ಖರೀದಿ ಆರಂಭಿಸಿದ್ದಾರೆ. ಕಾಯಂ ಹೂವಿನ ಅಂಗಡಿಗಳಲ್ಲದೆ ನಗರದ ಪ್ರಮುಖ ರಸ್ತೆಗಳ ಇಕ್ಕೆಲಗಳಲ್ಲಿ ಹಾಸನ, ಹಾವೇರಿ ಹಾಗೂ ಹರಿಹರ ಭಾಗಗಳಿಂದಲೂ ಆಗಮಿಸಿದ ಹೂವಿನ ವ್ಯಾಪಾರಿಗಳು ಮಾರಾಟ ಆರಂಭಿಸಿದ್ದಾರೆ.

ಕಬ್ಬು-ಬಾಳೆ ಭರಾಟೆ

ಗಣೇಶನ ಹಬ್ಬಕ್ಕೆ ಕಬ್ಬು ಹಾಗೂ ಬಾಳೆಗಿಡಕ್ಕೆ ಹೆಚ್ಚಿನ ಬೇಡಿಕೆ ಇರುತ್ತದೆ. ಗಣೇಶನ ಮಂಟಪಗಳಿಗೆ ಅಲಂಕಾರಕ್ಕಾಗಿ ಇವು ಅಗತ್ಯವಾಗಿ ಬೇಕಾಗುವ ವಸ್ತುವಾಗಿದೆ. ಹೀಗಾಗಿ ಉಡುಪಿಯ ರಥಬೀದಿ ಹಾಗೂ ವಿವಿಧೆಡೆ ಕಬ್ಬು ಹಾಗೂ ಬಾಳೆಯ ಮಾರಾಟವೂ ಜೋರಾಗಿದೆ.

ದರವೂ ಏರಿಕೆ

ಗಣೇಶನ ಹಬ್ಬ ಸಮೀಪಿಸುತ್ತಿದ್ದಂತೆ ಹೂವು&ಹಣ್ಣುಗಳ ಬೆಲೆಯಲ್ಲೂ ಏರಿಕೆ ಆಗತೊಡಗಿದೆ. ಮಳೆಯೂ ಸರಿಯಾಗಿ ಆಗದ್ದರಿಂದ ಹೂವುಗಳು ಅಲಭ್ಯತೆಯೂ ಇದ್ದು, ದರ ಏರಿಕೆಯಾಗಿದೆ. ಹೊರ ಜಿಲ್ಲೆಗಳಿಂದ ಬಂದ ಹೂವಿನ ವ್ಯಾಪಾರಿಗಳು ಗುಲಾಬಿ, ಸೇವಂತಿಗೆ, ಕಲರ್ ಹೂವು, ಗೊಂಡೆ ಇತ್ಯಾದಿಗಳಿಗೆ ಮಾರಿಗೆ 100ರಿಂದ 150 ರೂ. ನಿಗದಿಸಿದ್ದಾರೆ. ಪ್ರಮುಖ ಹಣ್ಣುಗಳಾದ ಸೇಬು, ಬಾಳೆಹಣ್ಣು, ಮೂಸಂಬಿ. ದಾಳಿಂಬೆ, ಪೇರಲ ಹಣ್ಣುಗಳ ದರವೂ ಕಿಲೋಗೆ 50ರಿಂದ 100 ರೂ.ವರೆಗೆ ಏರಿಕೆ ಕಂಡಿದೆ. ಮಂಟಪಗಳ ಲಾವಳಿಗಳಿಗೆ ಕೆಲ ತರಕಾರಿಗಳನ್ನು ಕಟ್ಟುವುದರಿಂದ ಅವುಗಳ ಬೆಲೆಯಲ್ಲೂ ಏರಿಕೆ ಆಗಿದೆ.

ಅಂಗಡಿಗಳಲ್ಲಿ ಬಗೆಬಗೆಯ ಬಾಲಗಣಪ

ಮನೆಗಳಲ್ಲಿ ಪ್ರತಿಷ್ಠಾಪಿಸಲು ಪುಟ್ಟ ಪುಟ್ಟ ಗಣೇಶನ ಖರೀದಿಯೂ ಕಂಡುಬರುತ್ತಿದೆ. ಕೆಲವರು ಸಾಂಪ್ರದಾಯಿಕ ಶೈಲಿಯ ಗಣೇಶನನ್ನು ಕಲಾವಿದರಿಂದ ತಮಗೆ ಬೇಕಾದಂತೆ ತಯಾರಿಸಿಕೊಳ್ಳುತ್ತಿದ್ದಾರೆ. ಅನೇಕ ಹಿರಿಯ ಕಲಾವಿದರು ಕಳೆದ 2 ತಿಂಗಳಿಂದ ಗಣೇಶನ ಮೂರ್ತಿ ರಚನೆಯಲ್ಲಿ ತಲ್ಲೀನರಾಗಿದ್ದಾರೆ. ಎಲ್ಲೆಡೆ ಗಣೇಶನ ಮೂರ್ತಿ ಅಂತಿಮಗೊಂಡಿದ್ದು, ಸುಂದರ ಬಣ್ಣಗಳಿಂದ ಹಾಗೂ ವಿವಿಧ ಅವತಾರಗಳಲ್ಲಿ ಮೈದಳೆದಿರುವ ಗಜಾನನನು ಭಕ್ತರ ಮನೆ ಪ್ರವೇಶಿಸಲು ಅಣಿಯಾಗಿದ್ದಾನೆ.

ಕಳೆದ ಅನೇಕ ವರ್ಷಗಳಿಂದ ಗಣೇಶನ ಹಬ್ಬಕ್ಕಾಗಿ ಚಿಕ್ಕಚಿಕ್ಕ ಮೂರ್ತಿಗಳನ್ನು ಆವೆ ಮಣ್ಣಿನಿಂದ ತಯಾರಿಸಿ ಮಾರಾಟ ಮಾಡುತ್ತಿದ್ದೇವೆ. 6 ಇಂಚ್ನಿಂದ 36 ಇಂಚ್ ಅಳತೆಯ ಮೂರ್ತಿಗಳಿದ್ದು, ಕೆಲವರ ಬೇಡಿಕೆಯಂತೆ ಬಣ್ಣ ರಹಿತವಾಗಿಯೂ ಸಿದ್ಧಪಡಿಸಿದ್ದೇವೆ. 600 ರೂ.ನಿಂದ 13 ಸಾವಿರ ರೂ. ಬೆಲೆಯ 300ಕ್ಕೂ ಅಧಿಕ ಗಣಪನಿದ್ದಾನೆ. 250ಕ್ಕೂ ಅಧಿಕ ಜನರು ಈಗಾಗಲೇ ಬುಕ್ಕಿಂಗ್ ಮಾಡಿಕೊಂಡಿದ್ದಾರೆ.

Udupi district