ದ್ವಿತೀಯದಿಂದ 'ಪ್ರಥಮ'ದತ್ತ ಚಿತ್ತ

ವಿದ್ಯಾರ್ಥಿಗಳ ಮನೆಗೇ ಭೇಟಿ ನೀಡಿ ಮಕ್ಕಳ ವಿದ್ಯಾಭ್ಯಾಸದ ಕುರಿತು ಪಾಲಕರಲ್ಲಿ ಮಾಹಿತಿ ಪಡೆಯುತ್ತಿರುವ ಇಲಾಖಾ ಅಧಿಕಾರಿಗಳು.

Published on:

15 Mar 2026, 11:11 am

* ಎಸ್ಎಸ್ಎಲ್ಸಿಯಲ್ಲಿ ಮತ್ತೆ 'ಫಸ್ಟ್' ತವಕ

* ಯಶ ತಂದೀತೇ ಮಕ್ಕಳ ಬರಹದ ಕೈಚಳಕ?

ಪ್ರಶಾಂತ ಭಾಗ್ವತ ಉಡುಪಿ

ವಿದ್ಯಾರ್ಥಿ ಜೀವನದ ಪ್ರಥಮ 'ಮೈಲಿಗಲ್ಲು' ಎಂದೇ ಬಿಂಬಿತವಾದ ಎಸ್ಎಸ್ಎಲ್ಸಿ ಪರೀಕ್ಷೆ ಮಾ.18ರಿಂದ ಏ.2ರ ವರೆಗೆ ನಡೆಯಲಿದ್ದು, ಪ್ರತಿಶತ 100 ಫಲಿತಾಂಶ ಗಳಿಸಿ ರಾಜ್ಯದಲ್ಲಿ ಮತ್ತೆ ಪ್ರಥಮ ಸ್ಥಾನಕ್ಕೇರಲು ಜಿಲ್ಲೆಯ ಶಿಕ್ಷಣ ಇಲಾಖೆ ಕಾರ್ಯಯೋಜನೆ ನಡೆಸಿದೆ.

ಕಳೆದ ಹತ್ತು ವರ್ಷದಲ್ಲಿ 4 ಬಾರಿ ಪ್ರಥಮ, 2 ಬಾರಿ ದ್ವಿತೀಯ ಹಾಗೂ 2 ಬಾರಿ ಟಾಪ್ ಟೆನ್ ಪಟ್ಟಿಯಲ್ಲಿ ಸ್ಥಾನ ಗಳಿಸಿದ್ದ ಉಡುಪಿ ಜಿಲ್ಲೆ, ಈ ಬಾರಿಯೂ ಮತ್ತೆ 'ಫಸ್ಟ್ ಪ್ಲೇಸ್'ನತ್ತ ಚಿತ್ತ ನೆಟ್ಟಿದೆ. ಅದಕ್ಕೆಂದೇ ಇಲಾಖೆ ಹಲವು ರೀತಿಯಲ್ಲಿ ಶೈಕ್ಷಣಿಕ ಚಟುವಟಿಕೆ ನಡೆಸಿದ್ದು, ಮಕ್ಕಳೂ ಸಹ ನಿರಾತಂಕವಾಗಿ ಪರೀಕ್ಷೆ ಎದುರಿಸಲು ಸಜ್ಜಾಗಿದ್ದಾರೆ.

ಕೈಗೊಂಡ ಕ್ರಮವೇನು?

2025-26ನೇ ಸಾಲಿನ ಶೈಕ್ಷಣಿಕ ದಿನದ ಆರಂಭದಿಂದಲೇ ಎಲ್ಲ ಸರ್ಕಾರಿ ಹಾಗೂ ಅನುದಾನಿತ ಶಾಲೆಗಳಲ್ಲಿ ಎಸ್ಎಸ್ಎಲ್ಸಿ ಮಕ್ಕಳಿಗೆ ವಿಶೇಷ ತರಗತಿ ನಡೆಸಲಾಗಿದೆ. ಕಲಿಕೆಯಲ್ಲಿ ಹಿಂದುಳಿದ ಮಕ್ಕಳನ್ನು ಗುರುತಿಸಿ, ಅವರೂ ಹೆಚ್ಚು ಅಂಕ ಗಳಿಸುವ ರೀತಿಯಲ್ಲಿ ವಿಷಯವಾರು ಹೆಚ್ಚುವರಿ ಕ್ಲಾಸ್ ನಡೆಸಲಾಗಿದೆ. ಯಾವ ಮಕ್ಕಳೂ ಅನಗತ್ಯವಾಗಿ ಶಾಲೆ ತಪ್ಪಿಸದಂತೆ ಹಾಗೂ ಕಲಿಕೆಯಲ್ಲಿ ಹಿಂದುಳಿಯದಂತೆ ನೋಡಿಕೊಳ್ಳಲಾಗಿದೆ.

ಶಿಕ್ಷಕರಿಗೂ ತರಬೇತಿ

ಪರೀಕ್ಷೆ ಇರುವುದು ಮಕ್ಕಳಿಗೇ ಆದರೂ ಅವರ ತಂದೆ-ತಾಯಿಯೂ ಸಹ ಜವಾಬ್ದಾರಿ ನಿಭಾಯಿಸುವ ದೃಷ್ಟಿಯಿಂದ ಸರ್ಕಾರದ ನಿರ್ದೇಶನದಂತೆ ಪಾಲಕರು-ಶಿಕ್ಷಕರ ಮೂರು ಮಹಾಸಭೆ ನಡೆಸಲಾಗಿದೆ. ವಿದ್ಯಾರ್ಥಿಗಳಿಗೆ ಈ ಹಂತ ಎಷ್ಟು ಪ್ರಮುಖ ಎನ್ನುವುದು ಮನದಟ್ಟಾಗಲು ಶಾಲೆಗಳಿಗೆ ಶಿಕ್ಷಣ ತಜ್ಞರು, ಮನೋವೈದ್ಯರನ್ನು ಕರೆಸಿ ಅವರಿಂದ ಪೂರಕ ಮಾರ್ಗದರ್ಶನ ಮಾಡಿಸಲಾಗಿದೆ. ಶಿಕ್ಷಕರ ಪಾತ್ರ ಪ್ರಮುಖ ಆಗಿರುವುದರಿಂದ ಎಲ್ಲ ಪ್ರೌಢಶಾಲೆಗಳ ಮುಖ್ಯ ಶಿಕ್ಷಕರು ಹಾಗೂ ಸಹಶಿಕ್ಷಕರಿಗೂ ಡಯಟ್ ವತಿಯಿಂದ 'ಪ್ರೇರಣಾ' ತರಬೇತಿ ನೀಡಲಾಗಿದೆ.

ಟಿವಿ, ಆಕಾಶವಾಣಿಯಲ್ಲಿ ಸಂವಾದ

ಎಸ್ಎಸ್ಎಲ್ಸಿ ಪರೀಕ್ಷೆ ವಿಚಾರದಲ್ಲಿ ಪಾಲಕರಿಗೆ ಹಾಗೂ ವಿದ್ಯಾರ್ಥಿಗಳಿಗೆ ಯಾವುದೇ ಸಂದೇಹ ಇದ್ದರೆ ನಿವಾರಿಸುವ ನಿಟ್ಟಿನಲ್ಲಿ ಮಣಿಪಾಲ ಆಕಾಶವಾಣಿಯ ಮೂಲಕ 3 ಬಾರಿ ಜಿಲ್ಲಾ ಮಟ್ಟದ ನೇರ ಸಂವಾದ ಕಾರ್ಯಕ್ರಮ ಏರ್ಪಡಿಸಲಾಗಿದೆ. ಸ್ಥಳೀಯ ಟಿವಿ ಚಾನಲ್ಗಳ ಮೂಲಕ ಒಟ್ಟು 15 ಲೈವ್ ಕಾರ್ಯಕ್ರಮ ನಡೆಸಲಾಗಿದೆ. ಡಿಡಿಪಿಐ, ಬಿಇಒ ಹಾಗೂ ವಿಷಯ ಸಂಪನ್ಮೂಲ ಶಿಕ್ಷಕರು ಪಾಲ್ಗೊಂಡು ಸೂಕ್ತ ಮಾರ್ಗದರ್ಶನವನ್ನೂ ಮಾಡಿದ್ದಾರೆ.

ಹತ್ತು ವರ್ಷದ ಲಿತಾಂಶ ವಿವರ

ಕ್ರ.ಸಂ. ವರ್ಷ ಫಲಿತಾಂಶ % ಸ್ಥಾನ

1) 2015 93.37 1

2) 2016 89.64 2

3) 2017 84.23 1

4) 2018 88.30 1

5) 2019 89.49 5

6) 2020 86.48 9

7) 2021 100 ಕರೊನಾ

8) 2022 89.46 13

9) 2023 91.00 17

10) 2024 88.69 1

11) 2025 89.96 2

ಉಡುಪಿ ಜಿಲ್ಲೆಯ 51 ಕೇಂದ್ರಗಳಲ್ಲಿ ಪರೀಕ್ಷೆ ನಡೆಯಲಿದ್ದು ಒಟ್ಟು 14,151 ವಿದ್ಯಾರ್ಥಿಗಳು ಪರೀಕ್ಷೆ ಬರೆಯಲಿದ್ದಾರೆ. ಜಿಲ್ಲೆ, ತಾಲೂಕು, ಹೋಬಳಿ ಹಂತದ ಎಲ್ಲ ಅನುಷ್ಠಾನಾಧಿಕಾರಿಗಳು ಶಾಲೆ, ಮನೆ ಹಾಗೂ ಹಾಸ್ಟೆಲ್ಗಳಿಗೆ ಭೇಟಿ ಮಾಡಿ ಶಿಕ್ಷಕರು, ಪಾಲಕರು ಹಾಗೂ ವಿದ್ಯಾರ್ಥಿಗಳಿಗೆ ಸಂವಾದದ ಮೂಲಕ ಅಗತ್ಯ ಮಾರ್ಗದರ್ಶನ ನೀಡಿದ್ದಾರೆ. ಕಳೆದ ವರ್ಷ ಉಡುಪಿ ಜಿಲ್ಲೆ ರಾಜ್ಯಕ್ಕೆ 2ನೇ ಸ್ಥಾನ ಗಳಿಸಿದ್ದು, ಈ ವರ್ಷ ಪ್ರಥಮ ಸ್ಥಾನ ಗಳಿಸಲು ಎಲ್ಲ ರೀತಿಯಲ್ಲೂ ಇಲಾಖೆಯ ವತಿಯಿಂದ ಶೈಕ್ಷಣಿಕ ಚಟುವಟಿಕೆ ನಡೆಸಿದ್ದೇವೆ.

Udupi district