ಉಡುಪಿ: ಜಿಲ್ಲೆಯ 179 ಪ್ರೌಢಶಾಲೆಗಳು ಈ ಬಾರಿಯ ಎಸ್​ಎಸ್​ಎಲ್​ಸಿ ಪರೀಕ್ಷೆಯಲ್ಲಿ ಶೇ.100 ಫಲಿತಾಂಶ ದಾಖಲಿಸಿದ್ದು, ತಾಲೂಕಾವಾರು ಫಲಿತಾಂಶದಲ್ಲೂ ಸಹ ಈ ಬಾರಿ ಏರಿಕೆ ಕಂಡಿದೆ. ಕಳೆದ ಬಾರಿ ಕೇವಲ 57 ಶಾಲೆಗಳು ಶೇ.100 ಫಲಿತಾಂಶ ದಾಖಲಿಸಿದ್ದವು. ಕಾರ್ಕಳ ತಾಲೂಕು ಶೇ.99.02, ಕುಂದಾಪುರ ಶೇ.98.52, ಬ್ರಹ್ಮಾವರ ಶೇ.98.26, ಬೈಂದೂರು ಶೇ.97.91, ಉಡುಪಿ ಶೇ.97.21 ಫಲಿತಾಂಶ ದಾಖಲಾಗಿದೆ.  

ಕನ್ನಡ, ಆಂಗ್ಲ ಭಾಷೆ ಫಲಿತಾಂಶ

ಈ ಬಾರಿ ಇಂಗ್ಲಿಷ್​ ಭಾಷೆಗಿಂತ ಕನ್ನಡ ಮಾಧ್ಯಮದ ವಿದ್ಯಾರ್ಥಿಗಳೇ ಶೇಕಡಾವಾರು ಫಲಿತಾಂಶದಲ್ಲಿಯೂ ಸಾಧನೆ ಮಾಡಿದ್ದಾರೆ. ಕನ್ನಡ ಶೇ.96.66 ಹಾಗೂ ಇಂಗ್ಲಿಷ್​ 99.22 ಫಲಿತಾಂಶ ಬಂದಿದೆ. ಗ್ರಾಮೀಣ ಹಾಗೂ ನಗರ ಫಲಿತಾಂಶದಲ್ಲಿ ನಗರದ ವಿದ್ಯಾರ್ಥಿಗಳು ಗ್ರಾಮೀಣರಿಗಿಂತ 0.06 ಫಲಿತಾಂಶ ಹೆಚ್ಚು ಗಳಿಸಿರುವುದು ಕಂಡುಬಂದಿದೆ. ಗ್ರಾಮೀಣ ಶೇ.98.16 ಹಾಗೂ ನಗರ ಶೇ.98.22 ಫಲಿತಾಂಶ ಗಳಿಸಿದೆ.

ಅನುದಾನ ರಹಿತ ಶಾಲೆಗಳ ಸಾಧನೆ

ಈ ಬಾರಿಯ ಪರೀಕ್ಷೆಯಲ್ಲಿ ಅನುದಾನ ರಹಿತ ಶಾಲೆಗಳ ಫಲಿತಾಂಶ ಅತ್ಯುತ್ತಮವಾಗಿದೆ. ಸರ್ಕಾರಿ ಶಾಲೆ ಶೇ.97.61, ಅನುದಾನಿತ ಶಾಲೆ ಶೇ.97.24 ಹಾಗೂ ಅನುದಾನ ರಹಿತ ಶಾಲೆಗಳು ಶೇ.99.39 ಫಲಿತಾಂಶದೊಂದಿಗೆ ದಾಖಲೆ ಮೆರೆದಿದೆ.

ಕುಂದಾಪುರ ತಾಲೂಕಿನ ಶಂಕರನಾರಾಯಣ ಗ್ರಾಮದ ಮದರ್​ ಥೆರೆಸಾ ಮೆಮೋರಿಯಲ್​ ಸ್ಕೂಲ್​ನ ವಿದ್ಯಾರ್ಥಿ ಪ್ರೀತಮ್​ ಜಿ. ಪೂಜಾರಿ 625 ಅಂಕ, ಕುಂದಾಪುರದ ಶ್ರೀ ವೆಂಕಟರಮಣ ಇಂಗ್ಲಿಷ್​ ಮೀಡಿಯಂ ಸ್ಕೂಲ್​ನ ಅನ್ವರ್ಥ್​ ಪೂಜಾರಿ 624 ಅಂಕ, ಕಾರ್ಕಳ ತಾಲೂಕು ಬೈಲೂರಿನ ಸರ್ಕಾರಿ ಜೂನಿಯರ್​ ಕಾಲೇಜಿನ ವಿದ್ಯಾರ್ಥಿನಿ ಲಿಸಾ ಬಾಬೋರ್ಜಾ, ಕಾರ್ಕಳ ತಾಲೂಕಿ ಕುಕ್ಕುಂದೂರು ಗಣಿತ ನಗರದ ಕಾರ್ಕಳ ಜನಸುಧಾ ಇಂಗ್ಲಿಷ್​ ಮೀಡಿಯಂ ಹೈಸ್ಕೂಲ್​ನ ಮಹಾಲಕ್ಷ್ಮೀ ಬಿ. 624 ಅಂಕ ಹಾಗೂ ಮಹಾಲಕ್ಷ್ಮೀ ಪೈ ಬಿ. 624 ಅಂಕ, ಬ್ರಹ್ಮಾವರ ತಾಲೂಕಿನ ಕೋಟದ ವಿವೇಕ ಇಂಗ್ಲಿಷ್​ ಮೀಡಿಯಂ ಹೈಸ್ಕೂಲ್​ನ ಚೈತನ್ಯಶ್ರೀ ಆರ್​. ಉಡುಪ, ಕುಂದಾಪುರ ತಾಲೂಕಿನ ಶ್ರಿ ವೆಂಕಟರಮಣ ಇಂಗ್ಲಿಷ್​ ಮೀಡಿಯಂ ಹೈಸ್ಕೂಲ್​ನ ಪ್ರಾರ್ಥನಾ ಜಿ., ಸಾತ್ವಿಕ್​ ಎಸ್​. ಭಟ್​ ಹಾಗೂ ತಕ್ಷಾ ಪಿ. ಶೆಟ್ಟಿ ತಲಾ 623 ಅಂಕ, ಕಾರ್ಕಳ ಜನಸುಧಾ ಇಂಗ್ಲಿಷ್​ ಮೀಡಿಯಂ ಹೈಸ್ಕೂಲ್​ನ ವೈಷ್ಣವಿ ಶೆಟ್ಟಿಗಾರ್​ 623 ಅಂಕ, ಕೋಟ ವಿವೇಕ ಇಂಗ್ಲಿಷ್​ ಮೀಡಿಯಂ ಸ್ಕೂಲ್​ನ ಸಂಕಲ್ಪ ಕುಮಾರ್​ 622 ಅಂಕ ಗಳಿಸಿ ಗಮನ ಸೆಳೆದಿದ್ದಾರೆ. 

ಪಡುಬಿದ್ರಿ ಹೆಜಮಾಡಿ ಕೋಡಿಯ ಸರ್ಕಾರಿ ಪ್ರೌಢಶಾಲೆಯ ವಿದ್ಯಾರ್ಥಿ ಬಸವರಾಜ್​ ಎಂಬಾತ ಎಸ್​ಎಸ್​ಎಲ್​ಸಿ ಪ್ರಿಪರೇಟರಿ ಪರೀಕ್ಷೆಗೆ ಹಾಜರಾಗಿರಲಿಲ್ಲ. ಹೀಗಾಗಿ ಡಿಡಿಪಿಐ ಲೋಕೇಶ್​ ಸಿ. ಹಾಗೂ ಶಿಕ್ಷಕರು, ಅಧಿಕಾರಿಗಳ ತಂಡ ಆತನ ಮನೆಗೆ ತೆರಳಿ, ಮನವೊಲಿಸಿ ಪರೀಕ್ಷೆಗೆ ಕರೆತಂದಿದ್ದರು. ಆ ವಿದ್ಯಾರ್ಥಿಯೂ ಸಹ ಅಂತಿಮ ಪರೀಕ್ಷೆಯಲ್ಲಿ ಉತ್ತೀರ್ಣನಾಗಿದ್ದಾನೆ. ಕಾರ್ಕಳದ ಅನುದಾನಿತ ವಸತಿ ಶಾಲೆಯ ವಿದ್ಯಾರ್ಥಿಯೋರ್ವ ಪ್ರಕರಣವೊಂದಕ್ಕೆ ಸಂಬಂಧಿಸಿ, ಕಾನೂನು ಸಂರ್ಷಕ್ಕೆ ಒಳಗಾಗಿದ್ದ ಕಾರಣದಿಂದ ಆತನನ್ನು ಉಡುಪಿಯ ಮಕ್ಕಳ ಕಲ್ಯಾಣ ಸಮಿತಿಯ ಕೇಂದ್ರದಲ್ಲಿ ದಾಖಲಿಸಲಾಗಿತ್ತು. ಶಾಲೆಯ ಮುಖ್ಯ ಶಿಕ್ಷಕರು, ಶಿಕ್ಷಕರು ಹಾಗೂ ಇಲಾಖೆಯ ಕೌನ್ಸೆಲರ್​ ಇವರ ತಂಡ ಕಾನೂನಾತ್ಮಕವಾಗಿ ವಿದ್ಯಾರ್ಥಿಯನ್ನು ಕಾರ್ಕಳದ ಕೇಂದ್ರಕ್ಕೆ ಕರೆದೊಯ್ದು ಪರೀಕ್ಷೆ ಬರೆಸಿದ್ದರು. ಆ ವಿದ್ಯಾರ್ಥಿಯೂ ಸಹ ಉತ್ತೀರ್ಣ ಆಗಿರುವುದಾಗಿ ಡಿಡಿಪಿಐ ಲೋಕೇಶ್​ ಸಿ. ಮಾಹಿತಿ ನೀಡಿದ್ದಾರೆ.