ಸೇತುವೆಯಲ್ಲಿ ಸಂಚಾರ ಭೀತಿ!

ಮೂರು ದಶಕಗಳ ಹಿಂದೆ ಗ್ರಾಮೀಣ ಭಾಗದ ಜನರ ಸಂಚಾರ ಸುಗಮಗೊಳಿಸುವ ಉದ್ದೇಶದಿಂದ ಕುಬ್ಜ ನದಿಗೆ ಅಡ್ಡಲಾಗಿ ನಿರ್ಮಿಸಿರುವ ಸೌಕೂರು- ಕಂಡ್ಲೂರು ಸೇತುವೆ ಈಗ ಸ್ಥಳೀಯರ ಆತಂಕಕ್ಕೆ ಕಾರಣವಾಗಿದೆ.

ಮಾವಿನಕಟ್ಟೆ ಸೌಕೂರು ದೇವಸ್ಥಾನ ಕಂಡ್ಲೂರು ಸಂಪರ್ಕಿಸುವ ಈ ಪ್ರಮುಖ ಸೇತುವೆ ಹಳೆಯದಾಗಿದೆ. ಇದು ಧಾರಣಾ ಸಾಮರ್ಥ್ಯ ಕಳೆದುಕೊಳ್ಳುತ್ತಿರುವ ಲಕ್ಷಣಗಳು ಕಂಡುಬರುತ್ತಿದ್ದು, ನಿತ್ಯವೂ ಜನರು ಭೀತಿಯಲ್ಲೇ ಸಂಚರಿಸುವ ಸ್ಥಿತಿಯಿದೆ. ಮಾಜಿ ಶಾಸಕ ಐ.ಎಂ.ಜಯರಾಮ್ ಶೆಟ್ಟಿ ಅವರ ಪ್ರಯತ್ನದಿಂದ 1996-97ರ ಅವಧಿಯಲ್ಲಿ ನಿರ್ಮಾಣಗೊಂಡ ಈ ಸೇತುವೆ ಸೌಕೂರು ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನ, ಕಂಡ್ಲೂರು ಹಾಗೂ ಗುಲ್ವಾಡಿ, ಬೋಳ್ಕಟ್ಟೆ ಭಾಗಗಳಿಗೆ ಸಂಪರ್ಕ ಕಲ್ಪಿಸುವ ಪ್ರಮುಖ ಕೊಂಡಿಯಾಗಿದೆ. ನಿತ್ಯವೂ ನೂರಾರು ವಾಹನಗಳು ಈ ಮಾರ್ಗದಲ್ಲಿ ಸಂಚರಿಸುತ್ತಿದ್ದು, ಶಾಲೆ ಮತ್ತು ಕಾಲೇಜುಗಳಿಗೆ ತೆರಳುವ ವಿದ್ಯಾರ್ಥಿಗಳಿಗೂ ಇದೇ ಜೀವನಾಡಿ.

ಸಣ್ಣ ವಾಹನಗಳ ಸಂಚಾರದ ವೇಳೆ ಹೆಚ್ಚಿನ ತೊಂದರೆ ಕಾಣಿಸದಿದ್ದರೂ ಲಾರಿ ಹಾಗೂ ಟಿಪ್ಪರ್‌ಗಳಂತಹ ಭಾರಿ ವಾಹನಗಳು ಸೇತುವೆ ಮೇಲೆ ಚಲಿಸುವಾಗ ಸೇತುವೆ ನಡುಗುತ್ತಿರುವ ಅನುಭವ ಜನರಲ್ಲಿ ಭೀತಿ ಮೂಡಿಸಿದೆ. ಸೇತುವೆ ಅಗಲವೂ ಕಿರಿದಾಗಿರುವುದರಿಂದ ಒಂದು ಭಾರಿ ವಾಹನ ಮಾತ್ರ ಸಂಚರಿಸಬಹುದು. ಪರಿಣಾಮ ಶಾಲಾ ಸಮಯದಲ್ಲಿ ಬಸ್, ಆಟೋ ಹಾಗೂ ರಿಕ್ಷಾಗಳು ಎರಡೂ ಬದಿಯಲ್ಲಿ ನಿಲ್ಲಬೇಕಾದ ಪರಿಸ್ಥಿತಿ ಎದುರಾಗುತ್ತಿದೆ.

ಕಂಡ್ಲೂರು- ಕಾವ್ರಾಡಿ- ವಾಲ್ತೂರು ಮೂಲಕ ನೇರಳಕಟ್ಟೆ ಸಂಪರ್ಕಿಸುವ ದೊಡ್ಡ ರಸ್ತೆಯಿದ್ದರೂ ಇಕ್ಕಟ್ಟಾದ ಸೌಕೂರು ಸೇತುವೆ ರಸ್ತೆಯಲ್ಲೇ ಭಾರಿ ವಾಹನಗಳು ಸಂಚರಿಸುತ್ತಿವೆ. ಶಾಲೆಗಳು ಆರಂಭವಾಗಿದ್ದು, ಸೇತುವೆ ಮೇಲೆ ಭಾರಿ ವಾಹನಗಳ ಸಂಚಾರ ನಿಷೇಧಿಸಬೇಕು ಎಂದು ಸಂಬಂಧಪಟ್ಟ ಅಧಿಕಾರಿಗಳಿಗೆ ಮಾಹಿತಿ ನೀಡಲಾಗಿದೆ. ಆದರೆ ಈವರೆಗೂ ಕ್ರಮ ಕೈಗೊಂಡಿಲ್ಲ ಸ್ಥಳೀಯರು ಆರೋಪಿಸಿದ್ದಾರೆ.

ಸೇತುವೆ ಮೇಲಿನ ಡಾಂಬರು ಕಿತ್ತು ಹೋಗಿದ್ದು, ಇಕ್ಕೆಲಗಳಲ್ಲಿ ಕಬ್ಬಿಣದ ರಾಡ್ ಎದ್ದಿದ್ದು ಅಪಾಯಕ್ಕೆ ಆಹ್ವಾನಿಸುತ್ತಿದೆ. ಅಪಾಯ ಸಂಭವಿಸಿದ ಬಳಿಕ ಎಚ್ಚೆತ್ತುಕೊಳ್ಳುವ ಬದಲು ಈಗಲೇ ಕ್ರಮ ಕೈಗೊಳ್ಳಬೇಕು. ಹಳೆಯ ಸೇತುವೆಗೆ ತಾತ್ಕಾಲಿಕ ದುರಸ್ತಿ ಮಾಡುವುದಕ್ಕಿಂತ ಹೊಸ ಸೇತುವೆ ನಿರ್ಮಿಸಿ ಸುರಕ್ಷಿತ ಸಂಚಾರಕ್ಕೆ ಅವಕಾಶ ಕಲ್ಪಿಸಬೇಕು. ಜತೆಗೆ ಭಾರಿ ವಾಹನಗಳ ಸಂಚಾರಕ್ಕೆ ನಿಯಂತ್ರಣ ಹೇರಬೇಕು ಹಾಗೂ ಸಂಬಂಧಪಟ್ಟ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಬೇಕು ಎನ್ನುವುದು ಸ್ಥಳೀಯರ ಆಗ್ರಹ.

ಸೌಕೂರು ಸೇತುವೆಯ ಆರಂಭದ ಇಕ್ಕೆಲಗಳಲ್ಲಿ ಸುರಕ್ಷತಾ ಕಂಬಗಳೇ ಇಲ್ಲದಿರುವುದು ಆತಂಕ ಮೂಡಿಸಿದೆ. ಕಿರಿದಾದ ಈ ಸೇತುವೆಯಲ್ಲಿ ರಾತ್ರಿ ವೇಳೆ ವಾಹನ ಸಂಚಾರ ಹೆಚ್ಚು ಅಪಾಯಕಾರಿಯಾಗಿದ್ದು, ನಿಯಂತ್ರಣ ತಪ್ಪಿದ ವಾಹನಗಳು ನೇರವಾಗಿ ನದಿಗೆ ಉರುಳುವ ಭೀತಿಯಿದೆ. ಕೂಡಲೇ ಸುರಕ್ಷತಾ ಕಂಬಗಳನ್ನು ಅಳವಡಿಸಿ ಅನಾಹುತಗಳನ್ನು ತಪ್ಪಿಸಬೇಕು.

— ಸುರೇಂದ್ರ ಶೆಟ್ಟಿ ಗುಲ್ವಾಡಿ ಗ್ರಾಪಂ ಮಾಜಿ ಸದಸ್ಯ