ಚಂದ್ರಗ್ರಹಣದ ದಿನ ಶ್ರೀಕೃಷ್ಣ ಮಠದಲ್ಲಿ ಏಕಾದಶಿಯ ದಿನದಂತೆ ಯಾವುದೇ ಆಹಾರ ಸ್ವೀಕಾರ ಇರದು. ರಾತ್ರಿ 7 ಗಂಟೆಯ ಬಳಿಕ ಸ್ನಾನಾದಿ ಕಾರ್ಯ ಮುಗಿಸಿದ ಬಳಿಕ ಶ್ರೀಕೃಷ್ಣನ ರಾತ್ರಿ ಪೂಜೆ ನಡೆಯಲಿದೆ. ಆ ದಿನ ಹೋಳಿ ಹುಣ್ಣಿಮೆ ಆಗಿದ್ದರಿಂದ ಸಾಯಂಕಾಲ 4 ಗಂಟೆಗೆ ಶ್ರೀಕೃಷ್ಣ ಮಠದಿಂದ ತಂಗಿಯ ಮನೆಯಾದ ಕಡಿಯಾಳಿ ಮಹಿಷಮರ್ಧಿನಿ ದೇಗುಲಕ್ಕೆ ಇಲ್ಲಿಂದ ಮೆರವಣಿಗೆಯಲ್ಲಿ ಹೋಳಿ ಹಿಡಿದು ಸಾಗುವ ಸಂಪ್ರದಾಯವಿದೆ. ಅಲ್ಲಿ ಬನ್ನಿಮರಕ್ಕೆ ಪೂಜೆ ನಡೆಸಿ, ರಾತ್ರಿ ಕಾಮದಹನ ನಡೆಯಲಿದೆ. ಮರುದಿನ ಬೆಳಗ್ಗೆ (ಮಾ.4) ಮತ್ತೆ ಹೋಳಿಯ ನಿಮಿತ್ತದ ಪೂಜೆ, ಮಧ್ಯಾಹ್ನ ಯಥಾಪ್ರಕಾರ ಮಹಾಪೂಜೆಯ ಬಳಿಕ ಅನ್ನದಾನ ನಡೆಯಲಿದೆ. ದೇವರ ದರ್ಶನಕ್ಕೆ ಯಾವುದೇ ತೊಂದರೆ ಇಲ್ಲ. ಹೀಗಾಗಿ ಗ್ರಹಣದ 8 ನಿಮಿಷದ ಪುಣ್ಯಕಾಲದಲ್ಲಿ ಸಾಧ್ಯವಿರುವವರು ಜೀವಕ್ಕೆ ಅಪಾಯ ಮಾಡಿಕೊಳ್ಳದೆ ನದಿ-ಸರೋವರದಲ್ಲಿ ಸ್ನಾನ ಮಾಡಿ, ಅನುಷ್ಠಾನಾದಿ ಕೈಗೊಳ್ಳುವ ಮೂಲಕ ಭಗವಂತನ ಕೃಪೆಗೆ ಪಾತ್ರರಾಗಬೇಕು ಎಂದು ಪರ್ಯಾಯ ಶೀರೂರು ಮಠದ ದಿವಾನ ವಿದ್ವಾನ್ ಡಾ. ಉದಯಕುಮಾರ್ ಸರಳತ್ತಾಯ ತಿಳಿಸಿದ್ದಾರೆ.
