ಪ್ರತಿಯೊಬ್ಬರಿಗೂ 5 ರೂಪಾಯಿಗೆ 20 ಲೀಟರ್ ಶುದ್ಧ ನೀರು ತಲುಪಿಸುವ ಉದಾತ್ತ ಉದ್ದೇಶದಿಂದ 2015ರಲ್ಲಿ ಕರ್ನಾಟಕದಲ್ಲಿ ಶುದ್ಧಗಂಗಾ ಮಾದರಿ ಜಾರಿಗೆ ಬಂದಿತು. ಚಿಕ್ಕಮಗಳೂರು ಜಿಲ್ಲೆ ಕಡೂರು ತಾಲೂಕಿನ ಎಲ್.ಅಗ್ರಹಾರ ತಾಂಡ್ಯದಲ್ಲಿ ರಾಜ್ಯದ ಮೊದಲ ಘಟಕ ಆರಂಭವಾಗಿತ್ತು. ಇನ್ನು ಉಳ್ಳಾಲ ಕ್ಷೇತ್ರದಲ್ಲಿ 2017ರ ಆಗಸ್ಟ್ 12ರಂದು ಪಾವೂರು ಗ್ರಾಪಂ ಬಳಿ ಪ್ರಥಮ ಘಟಕ ಉದ್ಘಾಟನೆಗೊಂಡರೆ, 2019ರ ಡಿಸೆಂಬರ್ನಲ್ಲಿ ಮುಡಿಪುವಿನಲ್ಲಿ ಜಿಪಂನ ಪ್ರಥಮ ಘಟಕ ಸ್ಥಾಪನೆಯಾಗಿತ್ತು. ನಂತರ ಅಂಬ್ಲಮೊಗರು, ಕಿನ್ಯಾ, ಕೋಟೆಕಾರ್, ಸೋಮೇಶ್ವರ, ಮುನ್ನೂರು ಹಾಗೂ ಇರಾ ಗ್ರಾಮ ಪಂಚಾಯಿತಿ ವ್ಯಾಪ್ತಿಗಳಿಗೂ ಯೋಜನೆ ವಿಸ್ತರಿಸಿತು. ಆದರೆ ಅಂಬ್ಲಮೊಗರು ಘಟಕವನ್ನು ಹಸ್ತಾಂತರಿಸಲು ಗುತ್ತಿಗೆ ಸಂಸ್ಥೆ ಮುಂದಾದರೂ, ಅಲ್ಲಿನ ಅಸಮರ್ಪಕತೆ ಕಾರಣದಿಂದ ಪಂಚಾಯಿತಿಯವರು ಸುಪರ್ದಿಗೆ ಪಡೆಯಲು ನಿರಾಕರಿಸಿದರು. ಪರಿಣಾಮ, ಘಟಕವು ತುಕ್ಕುಹಿಡಿದು ಹಾಳಾಗಿದ್ದು, ಒಳಗಿನ ಯಂತ್ರೋಪಕರಣಗಳು ಹಾಗೂ ಬಾಗಿಲು ನಾಪತ್ತೆಯಾಗಿವೆ.
