ತೊಕ್ಕೊಟ್ಟು ಬಸ್ ತಂಗುದಾಣ ಅವ್ಯವಸ್ಥೆ

ತೊಕ್ಕೊಟ್ಟು ಎಂದರೆ ಉಳ್ಳಾಲ ನಗರಸಭೆಯ ಹೃದಯಭಾಗವಿದ್ದಂತೆ. ರಾಷ್ಟ್ರೀಯ ಹೆದ್ದಾರಿಯನ್ನು ಹೊಂದಿರುವ ಈ ವ್ಯಾಪ್ತಿಯಲ್ಲಿ ದಿನಂಪ್ರತಿ ಸಾವಿರಾರು ಜನರು ಸಂಚರಿಸುತ್ತಾರೆ. ಆದರೆ, ಇಲ್ಲಿನ ಕೇಂದ್ರ ಬಸ್ ತಂಗುದಾಣ ಮಾತ್ರ 20 ವರ್ಷಗಳಿಂದ ಯಾವುದೇ ಪ್ರಗತಿ ಕಾಣದೆ ಅಧೋಗತಿಯಲ್ಲೇ ಮುಂದುವರಿದಿದ್ದು, ಉಭಯ ರಾಜ್ಯಗಳ ಜನರ ಮುಂದೆ ಉಳ್ಳಾಲದ ಮಾನ ಹರಾಜು ಹಾಕುತ್ತಿದೆ.

ಈ ತಂಗುದಾಣವು ಕೇವಲ ಸ್ಥಳೀಯ ಪ್ರದೇಶಗಳಿಗೆ ಮಾತ್ರವಲ್ಲದೆ ಅಂತರರಾಜ್ಯ ಸಂಪರ್ಕಕ್ಕೂ ಪ್ರಮುಖ ಕೇಂದ್ರವಾಗಿದೆ. ಇಲ್ಲಿಂದ ಮುಡಿಪು, ಕೊಣಾಜೆ, ಬಿ.ಸಿ.ರೋಡು, ತಲಪಾಡಿ, ಉಳ್ಳಾಲ ಕೇರಳ ಹಾಗೂ ತಮಿಳುನಾಡಿಗೆ ನೂರಾರು ಬಸ್‌ಗಳು ಸಂಚರಿಸುತ್ತವೆ.

ಇಷ್ಟೊಂದು ಆಯಕಟ್ಟಿನ ಜಾಗದಲ್ಲಿದ್ದರೂ ಇಲ್ಲಿಯವರೆಗೆ ಒಂದು ಸುಸಜ್ಜಿತ ಬಸ್ ತಂಗುದಾಣ ನಿರ್ಮಿಸಲು ಸಾಧ್ಯವಾಗಿಲ್ಲ ಎನ್ನುವುದೇ ಸಾರ್ವಜನಿಕರ ಅಚ್ಚರಿಗೆ ಕಾರಣವಾಗಿದೆ. ಹಿಂದೊಮ್ಮೆ ವಾಣಿಜ್ಯ ಸಂಕೀರ್ಣ ಸಹಿತ ಅತ್ಯಾಧುನಿಕ ಬಸ್ ತಂಗುದಾಣ ನಿರ್ಮಾಣದ ಯೋಜನೆ ರೂಪಿಸಲಾಗಿತ್ತಾದರೂ, ನಂತರದ ದಿನಗಳಲ್ಲಿ ಅದು ಅಧಿಕಾರಿಗಳ ನಿರ್ಲಕ್ಷ್ಯದಿಂದಾಗಿ ನನೆಗುದಿಗೆ ಬಿದ್ದಿದೆ.

ಪ್ರಸ್ತುತ ಈ ನಿಲ್ದಾಣವು ಸಾರ್ವಜನಿಕರ ಪಾಲಿಗೆ ನರಕಸದೃಶವಾಗಿದೆ. ನಗರಸಭೆಯ ಜವಾಬ್ದಾರಿಯಾಗಿದ್ದರೂ ಇದರ ನಿರ್ವಹಣೆಯನ್ನು ಸಂಪೂರ್ಣವಾಗಿ ಗಾಳಿಗೆ ತೂರಲಾಗಿದೆ. ನಿಲ್ದಾಣದ ಆವರಣದ ರಸ್ತೆಯಲ್ಲಿ ಬೃಹತ್ ಹೊಂಡಗಳು ಬಿದ್ದಿದ್ದು, ಇಂಟರ್‌ಲಾಕ್‌ಗಳು ಎದ್ದು ಹೋಗಿವೆ. ಮಳೆಗಾಲದಲ್ಲಿ ಇಲ್ಲಿ ನೀರು ನಿಂತು ಪ್ರಯಾಣಿಕರು ಕೆಸರು ನೀರಿನಲ್ಲೇ ಓಡಾಡಬೇಕಾದ ಪರಿಸ್ಥಿತಿ ಇದೆ. ಮಳೆ ಬರುವಾಗ ಪ್ರಯಾಣಿಕರು ತಂಗುದಾಣದೊಳಗೆ ನಿಲ್ಲಬೇಕಾದರೂ ಕೊಡೆ ಹಿಡಿಯಲೇಬೇಕು. ಮೇಲ್ಛಾವಣಿ ಆ ಮಟ್ಟಿಗೆ ಹದಗೆಟ್ಟಿದೆ. ಒಂದೇ ಕಂಬದಲ್ಲಿ ಮೂರ್ನಾಲ್ಕು ವಿದ್ಯುತ್ ದೀಪಗಳಿದ್ದರೂ ಅವು ಸರಿಯಾಗಿ ಉರಿಯುವುದಿಲ್ಲ. ದೀಪಗಳು ಉರಿದರೂ ಇಡೀ ತಂಗುದಾಣಕ್ಕೆ ಬೆಳಕು ಸಾಕಾಗುತ್ತಿಲ್ಲ. ರಾತ್ರಿಯಾಗುತ್ತಲೇ ಇಡೀ ನಿಲ್ದಾಣ ಕತ್ತಲಲ್ಲಿ ಮುಳುಗುತ್ತದೆ.

ಮಂಗಳೂರಿನಿಂದ ಕೊಣಾಜೆ, ಬಿ.ಸಿ.ರೋಡು, ಮುಡಿಪು, ಮಂಜನಾಡಿ, ಕಾಸರಗೋಡು, ತಲಪಾಡಿ, ಉಳ್ಳಾಲಕ್ಕೆ ಸಂಚರಿಸುವ ಬಸ್ಸುಗಳು ತಂಗುದಾಣದ ಒಳಗಡೆಯೇ ಬರಬೇಕು. ಆದರೆ, ಕಾಸರಗೋಡು, ತಲಪಾಡಿ ಹಾಗೂ ಉಳ್ಳಾಲಕ್ಕೆ ತೆರಳುವ ಬಹುತೇಕ ಬಸ್‌ಗಳು ಸಮಯ ಹೊಂದಿಸುವ ನೆಪದಲ್ಲಿ ತಂಗುದಾಣಕ್ಕೆ ಬಾರದೆ, ಸರ್ವೀಸ್ ರಸ್ತೆಯಲ್ಲೇ ನೇರವಾಗಿ ಸಂಚರಿಸುತ್ತಿವೆ. ಇದರಿಂದಾಗಿ ನಿಲ್ದಾಣದಲ್ಲಿ ಗಂಟೆಗಟ್ಟಲೆ ಕಾಯುವ ಪ್ರಯಾಣಿಕರು ಬಸ್ ಸಿಗದೆ ಅಲ್ಲೇ ಬಾಕಿಯಾಗುತ್ತಿದ್ದಾರೆ.