ಮುಂಬೈ-ಮಂಗಳೂರು ಎಕ್ಸ್‌ಪ್ರೆಸ್ ರೈಲಲ್ಲಿ ಪ್ರಯಾಣಿಕರಿಂದ ಕಳ್ಳ ಸೆರೆ

ಮಹಾರಾಷ್ಟ್ರದ ಕರ್ಮಾಲಿ ಹಾಗೂ ಗೋವಾ ರೈಲು ನಿಲ್ದಾಣದ ಮಧ್ಯೆ ಈ ಘಟನೆ ನಡೆದಿದೆ. ಗುರುವಾರ ಬೆಳಗ್ಗೆ ರೈಲಿನಲ್ಲಿ ಯುವಕನೊಬ್ಬ ಇದ್ದಕ್ಕಿದಂತೆ ಅನುಮಾನಾಸ್ಪದವಾಗಿ ಅಲೆದಾಡುತ್ತಿದ್ದ, ರೈಲ್ವೆ ಟಿಕೆಟ್ ಕಲೆಕ್ಟರ್ ಲಕ್ಷ್ಮಣ್ ಪವಾರ್ ಆತನನ್ನು ವಿಚಾರಣೆ ನಡೆಸಲು ಪ್ರಯತ್ನಿಸಿದಾಗ ಬೋಗಿಯೊಳಗೆ ಓಡಲಾರಂಭಿಸಿದ್ದಾನೆ. ಅದೇ ಬೋಗಿಯಲ್ಲಿ ಮಂಗಳೂರಿನತ್ತ ಆಗಮಿಸುತ್ತಿದ್ದ ಪ್ರಯಾಣಿಕರಾದ ಕುಂದಾಪುರದ ನಾಗರಾಜ ಪೂಜಾರಿ, ಸಹ ಪ್ರಯಾಣಿಕರಾದ ವಾದಿರಾಜ ಸುರತ್ಕಲ್, ಮಂಜುನಾಥ ಶಾಂತಿ ಮುಂತಾದವರು ಯುವಕನನ್ನು ಸೆರೆಹಿಡಿದರು.

ತಕ್ಷಣ ಎಚ್ಚೆತ್ತುಕೊಂಡ ಆತ ಜೇಬಿನಲ್ಲಿದ್ದ ಚೂರಿ ಹೊರ ತೆಗೆದು ಪ್ರಯಾಣಿಕರಿಗೆ ಜೀವಬೆದರಿಕೆಯೊಡ್ಡಿದ್ದು, ಜಾಗೃತರಾದ ಪ್ರಯಾಣಿಕರು ಪ್ರಯಾಸದಿಂದ ಆತನ ಕೈಯಲ್ಲಿದ್ದ ಚೂರಿ ಕಸಿದುಕೊಂಡಿದ್ದಾರೆ. ಬಳಿಕ ರೈಲ್ವೆ ಸಿಬ್ಬಂದಿ ಕಳ್ಳನನ್ನು ಗೋವಾ ಪೊಲೀಸರಿಗೆ ಹಸ್ತಾಂತರಿಸಿದ್ದಾರೆ.

ಯುವಕನ ಸೆರೆ ಹಿಡಿದ ಪ್ರಯಾಣಿಕರು ಧರ್ಮದೇಟು ನೀಡಿದ ಬಳಿಕ ವಿಚಾರಿಸಿದಾಗ ಆತ ಮುಂಬೈಯ ಮುಂಬ್ರಾದವ ಎಂದು ಗೊತ್ತಾಗಿದೆ. ಆತನ ಜೊತೆಯಲ್ಲಿ ಇನ್ನೂ 5 ಮಂದಿ ಇದ್ದು, ಘಟನೆ ನಡೆಯುತ್ತಲೇ ಬೇರೆ ಬೋಗಿಯಲ್ಲಿದ್ದ ಅವರೆಲ್ಲ ಓಡಿ ಹೋಗಿದ್ದಾರೆ. ಮಂಗಳೂರು ಎಕ್ಸ್‌ಪ್ರೆಸ್ ಮತ್ತು ಮತ್ಸ್ಯಗಂಧ ಎಕ್ಸ್‌ಪ್ರೆಸ್ ರೈಲಿನಲ್ಲಿ ಈ ಗ್ಯಾಂಗ್ ಸಕ್ರಿಯವಾಗಿದೆ.